5
Insoshi ku vhadumbwe
1 Ishi ntejeelezyi ahinza, imwe mwe vhadumbwe! Kutaaji nu kuloosya, kuzya vhuswimiilizu uvhupiti vhwe mupalamiiye kuvhwaga. 2 Ishuuma shiinyu shiliivhola, na menda giinyu galiliiha nu luswa. 3 Isahaabu zyinyu ni mpiiya zyinyu zililiiha nu vhusimu. Uvhusimu uvhwo vhuliivha shimanyilo ku vhantu kuuti uMulungu alivhalonga imwe, pe vhulinanganya amavhili giinyu inza umwoto. Mwe mulundisile ishuuma mu manda ga ku mpeleela.
4 Tejeelezyi, avhavhomvi vhiinyu vwe vhakuyivhunanzya nu kuvhalonga! Vhámazile kwefwa ivwakulya mu magunda giinyu, Niimwe mutahavhalipa. Kuyivhunanzya kwavho kwivwisile mu makutwi aga Mwene uwa maha gonti. 5 Muyihondeziizye pansi ipa ku shuuma ishipiti na ku mpapilo inyinji. Muholiine ni visugwa vwe vwinile, kuuti vhahavivhoole. Niimwe mwinile kwi siku ilya kulongwa. 6 Muhavhalonga nu kuvhagoga avhantu vhe vháali vhagolosu vhoope vhatahavhahaana.
Kujimbiilila mu mayimba
7 Mwe vhamwitu, mujimbililaje kufishila ahavhaliilizyo he uMwene aliyinza. Yeenyi uvhujimbiilizu uvhwa mulimi vwe akuguliilila umugunda wumezye nu kugomwa ahinza. Ivwakulya ivwo vili ni lonka ku kwakwe. Akujimbiilila imvula iya mundundo ni ya shisiku. 8 Niimwe vhwevhulo mujimbililaje, havhili mugomaje mu mooyo giinyu, mwe kwinza kwa Mwene kupalamiiye. 9 Mwe vhamwitu, mutakwinanaje mweka na mweka, mutahinze mulongwe. Mwe uMulonzi apalamiiye kwinza.
10 Mwe vhamwitu, yenyeelezyi avhakuvhwi vwe vhahajimbililaga mu mayimba lwe vhahayangaga mwi zina lya Mwene. Pe vhavhe shiholanyo kuli mwe. 11 Inza vwe mumanyile, vhasangalusu havhili vhalosiitwe vhaala vhe vhakujimbiilila. Mwivuuye inongwa izya vhujimbiilizu uvhwa Ayubu havhili muvhwenyi vwe uMwene ámuvhombeeye pisinda. Mwe uMwene ali nu vhwila uvhwinji nu lupepeelezyo ulupiti.
12 Kuluusya izyo zyonti, mwe vhamwitu, mutalapaje, kuzya kumwanya, na kuzya pa nsi, na ku shintu ishinji shonti. Inga mwati “Ena”, yivhanje ena, inga mwati “Ndaali”, yivhanje ndaali. Shisita vhwevhulo mukwinza kulongwa.
Kumupuuta uMulungu mu lwitiho
13 Umuntu wonti kuli imwe, inga akuyimba pe ahondeeye amulaavhaje uMulungu. Inga aliipo umuntu wonti we asankiine, ahondeeye kwimba inyimbo izya kumutiima uMulungu. 14 Kuli imwe inga aliipo we avhinile, uyo ahondeeye kuvhiita avhasongo avha shivhanza, vhamulaavhile nu kumupaha amafutaa kwi zina ilya Mwene. 15 Kulaavha ku lwitiho kulimupoha umuvhinu ula, woope uMwene alimuvhuusya. Inga atazile amalandu, aliswilwa. 16 Kuli izyo mupempulilanaje uvhutalamalandu vhwinyu mwemwe mweka nu kuputilana, inga uMwene avhaponie. Impuuto izya muntu we ahondeeye ku minso ga Mulungu zili na maha havhili zikuvhomba imbombo.
17 Umukuvhwi uEeliya áamile muntu inza iswe. Lwe alaavha ku mwoyo wonti kuuti imvula yitahatoonye, yoope yitahatoonya ku havhaliilizyo aha maaha gatatu na meezi sita. 18 Pisinda ahalaavha havhili kuuti imvula yitoonye, yoope yihanda kutoonya ni nsi yihamezya ivimelwa havhili.
19 Mwe vhamwitu, tuti inga uwamwinyu wumo alesile uvhwanalyoli, pisinda uwunji amugalusya havhili. 20 Mumanye ahinza, kuuti umuntu wonti we akumugalusya umutalamalandu kufuma kwi dala ilya vhunanjisu, akumupoha uvhupuuma vhwakwe kufuma mu vhufwe. Umutalamandu uyo aliswilwa uvhutalamalandu vhwakwe uvhwinji.