4
Kumushindiha uMulungu
1 Uvhulugu na madali ge gali muli mwe gakufuma kwoshi? Gakufuma mu mpapilo zyinyu imbiivhi zye zikulwana muhati zyinyu! 2 Mukupapila ileelo mutakuvwaga, pe mukugoga. Havhili mukuvha nu mwone ku vwa vhantu. Na she inga mutahondeeye kuvwaga, mukwanda kudalinkana nu kulwa. Musovheliilwe mwe mutakumulaavha uMulungu. 3 Lwe mukulaavha, mutakuposheela mwe pe mukulaavha ku nsiivho imbiivhi, kuuti muvivhombele ku yihondezya kuzya muvhili.
4 Imwe muholiine na vhavhembu, mwe mutali nu mushinzi kwa Mulungu! Mutamanyile kuuti we akusungwa izya mu nsi, we akuvha mulugu wa Mulungu? Ishi, wonti we akwanza kusungwa izya mu nsi, pe ayipezile kuvha mulugu wa Mulungu. 5 Mutasiivhaje kuuti uVhusimbe uVhufinjile vhukuyanga vhweleele, kuuti, “Umupepo wa Mulungu we ahatuvhiiha muhati zyitu, ali ni shikunzi nkaani kuli swe.” 6 Ileelo uweene akutwonjeelezya uvhwila. Mwe muumwo yisimviilwe mu Vhusimbe kuuti,
“UMulungu akuvhahaana avha mabaado,
ileelo akuuvhapa avhatonsu uvhwila.”a
7 Ishi leelo, mumushindihaje uMulungu. Mumuhaanaje nu kumudinda uMukwalanzi, woope kuuti avhashimbilaje. 8 Mumupalamilaje uMulungu, pe woope kwe avhapalamilaje. Muleshe kuvhomba imbiivhi, imwe mwe vhatalamalandu! Havhili muzelufwaje amooyo giinyu, imwe mwe vha nsiivho pavhili! 9 Muswimililwaje, mulosyaje nu kukuuta. Inseho zyinyu zigalunkane kuvha nkuuta nu luseshelo lwinyu luvhe vhuswimiilizu. 10 Muyisyaje ku minso ga Mwene, pe woope alivhazuvwa.
Mutavhanje ni jevhulo
11 Mwe vhamwitu, mutayanjilanaje amavhiivhi mwemwe mweka. Umuntu we akumuyanga havhiivhi uwamwavho poosye akumulonga, pe akuziyanjila havhiivhi indajizyo zya Mulungu nu kuzisuufwa. Lwe ukuzisuufwa indajizyo pe utakuzishindiha, nkandi ukuzihaana. 12 UMulungu weeka vhweleele we akuvhiiha indajizyo havhili uweene we mulonzi. Wuuyo weeka we ahondeeye kupoha, nu kulovwa. Ishi, iwe we naanu, we ukwanza ku mulonga umupalamani waaho?
Mutayibaadaje ku mbombo izya ndaavhi
13 Ishi, ntejeelezyi ahinza, imwe mwe mukuyanga mukuti, “Ileelo pamo indaavhi tulisogola mu nkaaya yimo. Tulitendama ukwo umwaha wonti, tulikazyaga nu kulonka.” 14 Ileelo mutalimanyile lye lingafumila indaavhi! Uvhulanzi vhwinyu vhwa havhaliilizyo ahafupi vhweleele. Imwe muli ngati lyosi, lye likuvhoneha ku havhaliilizyo ahansi, naluvhiilo likuteega! 15 Nkandi mukwanzilwa mutinji, “Inga uMwene asungwa, tuvhe swe vhapuuma tulivhomba ili pamo liila.” 16 Ileelo imwe mutakuvhomba vhwevhulo, nkandi mu kuyitiima nu kuyibaada, pe kuyibaada ku kwinyu ukwo kuvhiivhi. 17 Ishi, umuntu wonti we azimanyile inyinza ileelo atakuzivhomba, uyo atazile amalandu.