3
Kuyidinda nu lumili
1 Mwe vhamwitu, kuli mwe kutahaavhe avhasambiilizi avhinji avha Mazwi aga Mulungu, mwe pe mumanyile kuuti pi siku ilya kulongwa, uMulungu alitulonga iswe swe vhasambiilizi nkaani kuluusya avhanji. 2 Iswe swenti tukupuvha ku madala aminji. Inga kuli umuntu we atakupuvha ku yanga kwakwe, uyo mulunjisu, uyo we ahondeeye kuyidinda uvhupuvi uvhwa muvhili waakwe wonti.
3 Zyope imfwalaasi,a tukuzivhishila ivijela ivinsi mu malomu gaavho kuuti zitushindihaje, inga tugalongozye amavhili gaavho gonti. 4 Havhili imeeli vhwevhulo mpiti, zikubunchilwa ni nkungu impiti. Na she, vhakuzipela nu tusyetulilo utunsi vhweleele, zikusogola kwonti kwe avhalongozi vhakwanza.
5 Ulumili vhwevhulo, hantu hansi mu muvhili, ileelo lukuyibaada ku mabaado amapiti. Sivhililaaji umwoto umunsi vwe wukuholeelezya isitu ipiti! 6 Ulumili lwope luli inza umwoto. Ulwene lwizuuye uvhuvhiivhi uvhwinji kuluusya utuntu utwa mu muvhili. Lukumuhandamania umuntu umuvhili waakwe wonti nu kuholeelezya umwoto mu vhupuuma vhwakwe vhwonti. Ulumili lwope lukuholeelezwa nu mwoto uwa shiima shiima.
7 Avhantu vhakuvikonzya ivihanu ivwa nkolo zyonti, inyunyi, na vwe vikukwesuha ni vihanu ivwa mwa sumbi. 8 Ileelo naawumo umuntu we ahondeeye kuyidinda ulumili kuuti lutayangaje imbiivhi. Lunanzi lwe lukupuluputa uku na kuula, havhili lukugoga avhantu inza uwanga.
9 Ku lumili tukumutiima uTaata, uMwene wiitu. Havhili ku lunuulwo tukuvhatipa avhantu, vhe uMulungu ahavhapela ku shati shaakwe. 10 Mwi lomu liniilyo mukufuma intiimo ni ntipo. Mwe vhamwitu, zitahondeeye kuuti zivhanje vhwevhulo! 11 Vhuli, ishiduda isha lyinso lyoka shingaafumwa aminzi amanonu na minzi aga ivheeya pooka? 12 Mwe vhamwitu, ituvhu litangaahoma amantonongwa aga makusu, pamo amampensya gatangaahoma amatuvhu. Vhwevhulo ishiduda isha minzi aga ivheeya shitangaafumwa aminzi amanonu.
Uvhushindamu uvhwa njeele
13 Ishi ku limwe, inga kuli umuntu we ali nu vhushindamu uvhwa njeele, pe alolesye izyo ku lujendo lwakwe ulwinza. Havhili avhombaje imbombo ku vhutonsu vhwe vhukufumiilana nu vhushindamu uvhwa njeele. 14 Ileelo, inga amooyo giinyu gizuuye umwone nu vhupafu, pe mutayitiimaje, havhili mutayangaje ilenga kuzya nalyoli. 15 Uvhushindamu uvhwa njeele inza uvhwo vhutakufuma kumwanya nkandi nsiivho zya mu nsi munuumu, havhili zya mu muvhili, vhukufuma kwa Mukwalanzi. 16 Mwe ponti pe avhantu vhali nu mwone nu vhupafu pakuvha nu lwisi nu vhuvhiivhi uvhwinji vhwonti.
17 Ileelo, vhe vhakuvha nu vhushindamu uvhwa njeele vhwe vhukufuma kumwanya kwa Mulungu, ivho vhe vhafinjile. Ivho vhe vhakusungwa kuvha nu vhutehamu na vhantu avhanji, vhatonsu, vhamushinzi, havhili muhati zyavho vhizuuye uvhwila ni mbombo inyinza. Vhatakuvhomba uvhunyala ku vhantu vhamo, havhili vhutaliipo muhati zyavho uvhulumaluma. 18 Avhantu vhe vhakusungwa uvhutehamu, vhakuvha ngati vhakuvhwala imbeyu, pisinda vhaliivuna zye zihondeeye ku minso ga Mulungu.