2
Mutavombaje izya uvhunyala
1 Mwe vhamwitu, mutavhanje nu vhunyala, mwe mumwitisile uMwene wiitu uYeesu Chilisiti uwa vhushindamu. 2 Tuti inga umuntu wumo azwaye insalaamu iya sahaabu na menda aga mushinzi, ayinjila mu luhomaano lwinyu, havhili umupiina ayinjila we azwaye amenda amanyanka. 3 Mukumushindiha we azwaye amenda aga mushinzi mu kumuvhuuzya mukuti, “Tendaama ipa, apinza.” Havhili umupiina mukumuvhuuzya mukuti, “Iwe yimiliila paala poosye tendaama pansi ipa, sha pa vinama vwane.” 4 Vhuli, te lwe mwavhomba uvhunyala ku vhantu? Vhuli, te lwe mwafumwa uvhulonzi, kufumiilila ni nsiivho zyinyu imbiivhi?
5 Mwe vhamwitu vhankundwa, tejeelezyi ahinza! UMulungu avhasavhuuye avhantu avhapiina mu nsi umu, kuuti vhavhe vhe vhadumbwe mu lwitiho, nu kuposheela uvhumwene vhwe áfinzile ku vhonti vhe vhakumukunda. 6 Ileelo imwe mukumusuufwa ula we mupiina. Vhuli, avhadumbwe avho te vhe vhakuvhayimvwa imwe nu kuvhatwala kwi lonjelwi? 7 Vhuli, te vhe vhanaavho vhe vhakulisaamula izina ilyinza ilya Yeesu lye muhapeelwa?
8 Mu Vhusimbe uVhufinjile, indajizyo zya Mwene wiitu uMulungu zikuyanga zikuti, “Umukundaje umupalamani waaho, inza vwe uyikunzite iwe.”a Inga mukuvhomba vhwevhulo, pe lwe mukuvhomba ahinza. 9 Ileelo, inga mukuvhomba uvhunyala ku vhantu, pe mukuvhomba uvhutalamalandu, ni ndajizyo zikuvhalonga kuuti imwe mwe vhapuvi. 10 Inga umuntu wonti akulandata indajizyo zyonti izya Mulungu, ileelo aapuvha yooka vhweleele, pe uMulungu akumuvhaazya kuuti apuvile zyonti. 11 Mwe uMulungu we avhiisile ululajizyo lwe lukuti “Utavhembuhaje”,b havhili we avhiisile lwe lukuti “Utagogaje”.c Kwe kuuti, inga utakuvhembuha ileelo ukugoga, pe uMulungu akukuvhaazya kuuti upuvile indajizyo zyonti.
12 Ishi leelo, yangaji nu kuvhomba uku mukumbuhaje kuuti uMulungu alivhalonga imwe ku ndajizyo zye zikuvhwezya kuvhasatula avhantu. 13 Mwe uMulungu tahaavhe nu vhwila lwe akumulonga umuntu we atali nu vhwila. Inga umuntu ali nu vhwila ku vhantu, pe woope uMulungu alimufwila uvhwila pi siku lya vhulonzi!
Kuvha nu lwitiho ni mbombo inyinza
14 Mwe vhamwitu, zingamuvhoosya umuntu shooni inga akuti ali nu lwitiho, ileelo atakuvhomba imbombo inyinza. Mwe muumwo, ulwitiho lwakwe lutangamupoha! 15 Tuti inga uwamwitu wumo, umwanaavuli poosye umwantanda, atali na menda poosye ishaakulya isha kumukwilana. 16 Pe wumo akumuvhuuzya akuti “Sogolaaga nu vhutehamu, uyootaje umwoto nu kwikuta.” Inga atakuumupa viniivwo vwe asovheliilwe, zitahondeeye inga hansi! 17 Vhwevhulo, inga muli nu lwitiho ileelo mutali ni mbombo inyinza, pe ulwitiho lwinyu lufuuye.
18 Ileelo umuntu wumo angati, “Avhantu vhamo vhali nu lwitiho, avhamwavho vhali ni mbombo inyinza.” Uyo ingamwamula kuuti, “Undanje vwe ungavha nu lwitiho shisita kuvha ni mbombo inyinza. Ine kuzya mbombo inyinza, nkukulanga vwe ulwitiho lwane luli.” 19 Ukwitiha kuuti uMulungu ali wooka. Mwe muumwo! Zyope impepo imbiivhi zikwitiha vhwevhulo nu kutetema kwi lyoga!
20 We shipukupuku! Indikulanga kuuti ulwitiho shisita mbombo inyinza lwa vhweleele. 21 Utaata wiitu uAbulahamu ahamufumwa umwana waakwe uYisikaka avhe mpuutile iya kufwa pashifinjilo. Ku mbombo iyo, uMulungu ahamuvhaazizya kuuti ahondeeye ku minso gaakwe.d 22 Waalola vwe ulwitiho lwakwe lwávhomvile pooka ni mbombo yaakwe, kufishila ulwitiho lwakwe luhalunjiha mu mbombo yaakwe.
23 Kwi dala liniilyo vhufishile uVhusimbe uVhufinjile vhwe vhukuti, “UAbulahamu ámwitisile uMulungu, pe uMulungu ahamuvhaazizya kuuti ahondeeye ku minso gaakwe,”e pe ahavha mumanyani wa Mulungu. 24 Pe vwe mwalola kuuti te kwe ku lwitiho lweka vhweleele kuuti umuntu ahondeeye ku minso ga Mulungu. Ileelo umuntu ahondeeye ku minso ga Mulungu inga ali nu lwitiho pooka ni mbombo inyinza.
25 Pe vhwevhulo, inza vwe uLahabu ula umuvhembu, ahavhaazilwa kuuti ahondeeye ku minso ga Mulungu ku mbombo inyinza ye ahavhomba, mwe ahavhaposheela vhaala avhahoome nu kuvhavhuuzya kuuti vhatuushe idala ilinji.f
26 Kwe kuuti inza she umuvhili shisita mwuyu wufuuye, vhwevhulo ulwitiho shisita mbombo inyinza lufuuye.