Ikalaata
ilya Yaakobu
1
1 Ikalaata ili lisimviilwe niine ne Yaakobu, umuvhomvi wa Mulungu nu wa Mwene uYeesu Chilisiti. Inkuvhalamuha avhantu avha nkolo kumi na mbiili, vhe vhasatiine mu nsi zyonti.
Kuyigomwa mu ndingo
2 Mwe vhamwitu, muvhanje mu kusankaana lwe indingo izya mavhiila mu mavhiila zikuvhaaga. 3 Mwe mumanyile kuuti, ulwitiho lwinyu inga lukulingwa pe mukusambiilila uvhujimbiilizu. 4 Muvhanje nu vhujimbiilizu kufiha ku mpeleela, inga mukwilane muhaavhe mwe vhalunjisu shisita kusovhelwa naashimo.
5 Inga kuli uwamwinyu wumo we asovheliilwe nu vhushindamu uwa njeele, pe amulaavhe uMulungu, woope akuumupa ziniizyo. We akuuvhapa avhantu vhonti ku mwoyo uwa vhusankaanu, shisita kuhalapila. 6 Ileelo ahondeeye alaavhaje ku lwitiho shisita maganigani kuuti kwa aposheele. Mwe umuntu we ali na maganigani akuvha fwe livhilingwa ilya sumbi, lye likunyetulwa ni nkungu nu kutaajilwa ukwo nu kwo. 7 Umuntu inza uyo atasivhililaje kuposheela ishintu naashimo kufuma kwa Mwene, 8 mwe uweene ali ni nsiivho pavhili, atali nu vhwimiililo mu lujendo lwakwe lwonti.
Avhapiina na vhadumbwe
9 Uwamwitu we mupiina ahondeeye aseshelaje, mwe uMulungu amuzuvwa. 10 Woope udumbwe ahondeeye mwe uMulungu amwisya. Mwe alituuha ngati vhwezya vhwa mwi laala. 11 Lwe izuvha lyadula, ahasanya haalama nkaani nu kufwosya amatundu. Uvhwezya vhwakwe vhukulagala, pe uvhwinza vhwakwe vhukunanjiha. Vhwevhulo nu dumbwe woope, lwe akujendeelela mu mbombo zyakwe, munuumwo mwe alifwila.
UMulungu atakuvhinjizya avhantu mu ndingo
12 Alosiitwe umuntu we akujimbiilila mu ndingo, mwe ingazipoota, uMulungu alimupa uvhulanzi uvhwa shiima shiima vhwe áfinzile ku vhaala vhe vhakumukunda. 13 Inga umuntu akulingwa, atatinji, “Inkulingwa nu Mulungu”. Mwe uMulungu atakulingwa ni mbiivhi havhili uweene atakumulinga umuntu naawumo. 14 Ileelo umuntu wonti we akulingwa, akulemwa ni mpapilo zyakwe imbiivhi. 15 Insiivho izya mpapilo zikumutwala umuntu kuvhomba uvhutalamalandu, vhwope uvhutalamalandu vhukumutwala umuntu uyo ku vhufwe.
16 Mwe vhamwitu vhankundwa, mutahopelwaje. 17 Ivintu vwonti ivwinza ni vipeelwa vwonti ivwinza vikwiha kufuma kumwanya kwa Taata uwa nkozyo. Uweene atakugalunkana havhili atakuyandula inza ishinzyunguuli vwe shikugalunkana. 18 Inza vwe ahasungwa, kwi Izwi lyakwe ilya nalyoli ahatuvhiiha twavha swe vhaana vhaakwe, inga tuvhe mwilongolela muli vwonti vwe ahapela.
Kulitejeelezya Izwi lya Mulungu nu kulishindiha
19 Mwe vhamwitu vhankundwa, mutejelezyaje ahinza! Umuntu wonti atahaavhe we akuyanga naluvhiilo, nkandi avhe we akutejeelezya isuuti! Havhili atahaavhe we akuviitwa naluvhiilo. 20 Mwe we ali nu mulaha, atangavhomba zye zihondeeye ku minso ga Mulungu. 21 Pe, muvhuleshe uvhuhandamanu vhwonti nu vhuvhiivhi vhwe muli naavhwo. Muposheele Izwi ku vhutonsu liila lye uMulungu alivhiisile mu mooyo giinyu. Izwi ilyo lye lihondeeye kuvhapoha.
22 Mukuyihopela kuuti mukulilandata Izwi lya Mulungu, ileelo mukulitejeelezya vhweleele. Nkandi imwe muvhombaje inza vwe likuyanga. 23 Mwe umuntu we akutejeelezya Izwi vhweleele atakuvhomba vwe likuyanga, akuvha inza umuntu we akuyenyeelezya mwi looli. 24 Lwe ayenyeelezya vwe ali, akwepa, ahavhaliilizyo hanaaho akuyiluvwa vwe ali. 25 Ishingunga shaakwe muntu we akwenyeelezya nu kusivhiilila indajizyo indunjisu zye zikuvhwezya kuvhasatula avhantu. Inga akujendeelela kuvhomba vhwevhulo shisita kuluvwa shiila she ayivuuye, uyo we alilootwa kuli zyonti zye akuvhomba.
26 Inga umuntu akuyilola kuuti akuvhomba zye zikumuhondezya uMulungu, ileelo atakuyenyeelezya vwe akuyanga, akuyihopela wuuyo weeka. Pe imbombo zye akusiivha kuuti zikumuhondezya uMulungu zya vhweleele. 27 Imbombo zye zikumuhondezya uMulungu uTaata zye zino: kuvhaavwa avhantaagwa na vhafwile mu mayimba gaavho, nu kuyidinda vhuuyo, kuuti gatahamuhandamanie aga mu nsi.