Abiam rey katka ne Judá
15
Abiam opeu tlamandaroua ken rey ne Judá ijkuak Jeroboam, ikoneu Nabat, kuikaya matlaktli uan chikueyi xipan ika tlamandarouaya ken rey ne Israel, 2 niman otlamandaroj yeyi xipan ne Jerusalén. Inanaj itoka katka Maaca, ichpoch katka Absalón. 3 Abiam no ijki okichiu nochi on tlajtlakoltin yejuan itataj okichiu. Ijkon tej, xokitokak toTEKO Dios ika nochi iyojlo ken okitokak David, iueloj. 4 Pero pampa toTEKO sanoyej okitlajsojtlak David, okauilij para Abiam, ikoneu, sakin* yejua ma tlamandaro ken rey ne Jerusalén. Niman toTEKO no okichiu para Abías ma kipiya sen ikoneu yejuan okipatlak para otlamandaroj ken rey, niman yejuan okimanauij Jerusalén. 5 Ijkon onochiu pampa toTEKO sanoyej okipakaitak David ika sanoyej kuajli onouikak, niman xkaman okitlalkauij itlanauatiluan toTEKO. San sejpa otlajtlakoj itech toTEKO ika on tlen okichiuilij Urías on hitita.6-7 Chika nemiya, Roboam nochipa okipix nouijsokilistli iuan Jeroboam. Niman Abiam no okipix iuan Jeroboam ipan nochi inemilis. Ipan on amamoxtli* kampa tlajkuilolnestikaj iminnemilis on reyes de Judá, ompa kijtoua inemilis Abiam, niman ompa kijtoua nochi tlen okichiu. 8 Niman ijkuak omik Abiam, okitôkakej ne kampa toktôkej iachtojtajuan ipan Iueyikalpan David. Kemaj Asa, ikoneu, kej yejua okalak rey.
Asa rey katka ne Juda
9 Asa opeu tlamandaroa ken rey ne Judá ijkuak Jeroboam kuikaya sempoajli xipan ika tlamandarouaya ken rey ne Israel, 10 niman otlamandaroj 41 xipan ne Jerusalén. Iauelaj itoka katka Maaca, ichpoch katka Absalón.
11 ToTEKO okipakaitak Asa pampa okichiu nochi tlen kuajli, no ijki ken okichiu David, iuejkatataj. 12 Asa okinkixtij ipan on país, on ajauilnenkej yejuan kinmauistiliayaj iminídolos ipan on pipitikej tiopamej, niman okinmejkuanij nochi on ídolos yejuan okinchijchijkaj iachtojtajuan. 13 Niman Maaca, iauelaj, okixtilij on itoka yejuan ika kiueyiteneuayaj. Ijkin kitokayotiayaj: “Tonantsin Reina”. Yejua okixtilij pampa otlanauatijka ma kichijchiuakan sen ídolo sanoyej tetlajyeloj kampa okixneskayotijkej on diosa Asera ipan se kojtli. Asa, okitsontek on kojtli* kampa nestikatka on ídolo, niman okitlatij itech on pitentsin ayajtok itoka Cedrón. 14 Maski Asa xokinxoxotonij on tiopantsitsimej kampa kinmauistiliaj on ídolos, yejua nochipa okitokak toTEKO ika nochi iyojlo. 15 Niman nochi on oro niman plata yejuan yejua iuan itataj yokiyaxkatijkaj toTEKO, okitlalij ipan iueyitiopan toTEKO.
Asa okichiu sen pacto* iuan Ben-adad
16 Asa nochipa okipix nouijsokilistli iuan Baasa, on rey de Israel. 17 Niman ijkuak Baasa oyaj okuijsokito on ueyitlalpan Judá, okinoyaxkatij* on ueyikalpan Ramá, niman opeu kiyeualtsakua para on rey de Judá xok ueliya kalaki nion kisa iueyitlalpan Judá iuan isoldados. 18 Kemaj, Asa okixtij nochi on oro niman on plata yejuan sanken* onkatka ipan iueyitiopan toTEKO niman ipan ipalacio. Nochi yejua in okititlan inuan itlapeliuikauan para ma kiktikan ne Damaso para kimakaskej Ben-adad yejuan rey ne Siria. Ben-adad ikoneu katka Tabrimón, niman ixuiu katka Hezión. No ijki, otlanauatij para ijkin ma kijlikan: 19 “Ma tikchiuakan sen pacto* tejua niman nejua, ken okichijkej totajuan. Nikan nimitstitlanilia oro niman plata yejuan nimitstlayokolia. Pero xxotoni on pacto* yejuan tikpiya iuan Baasa, on rey de Israel para makasa ma techuijsokiki."
20 Niman Ben-adad onokalaktij ika on tlen okijlij on rey Asa, niman okintitlan on soldados inuan intlayekankauan para okinuijsokitoj on iuejueyikalpanuan Israel. Yejuamej okinnoyaxkatejkej Ijón, Dan, Abel-bet-Maaca, nochi on iueyitlalpan Cineret niman iueyitlalpan Neftalí. 21 Ijkuak Baasa okimat on tlen yonochiu, xok otlan kiyeualtsakua on ueyikalpan Ramá, niman oyaj para Tirsa. 22 Kemaj on rey Asa okintekuitlan nochimej on chanejkej ne Judá niman nion se xonokau, para okipaleuijkej okimejkuanijkej on temej niman on kojtin* yejuan on rey Baasa okitekitiltij para kiyeualtsakuaskia on ueyikalpan Ramá. Niman on rey Asa okintekitiltij on temej niman on kojtin* para okiyeualtsaku on ueyikalpan Geba niman Mizpa, yejuan onkaj ipan iueyitlalpan Benjamín.
Imikilis Asa
23 Ipan on amamoxtli* kampa tlajkuilolnestikaj iminnemilis on reyes de Judá, ompa kijtoua inemilis Asa. Ompa kijtoua nochi on uejueyi tlajtlamach* yejuan okichiu, niman kinteneua on uejueyikalpanmej yejuan okinchijchiu.
Ijkuak Asa ye ueuentsin katka okualok ipan ikxiuan, 24 niman ijkuak omik, okitlaltôkakej kampa toktôkej iachtojtajuan, ne kampa kuitiaj Iueyikalpan David. Kemaj Josafat, ikoneu, kej yejua okalak rey.
Nadab rey katka ne Israel
25 Ijkuak Asa kuikaya ome xipan ika tlamandarouaya ken rey ne Judá, Nadab, itelpoch Jeroboam, okalak rey ne Israel, niman otlamandaroj ken rey ome xipan. 26 Pero Nadab okichiu tlen xkuajli ixpan toTEKO pampa no ijki otlajtlakoj ken itataj, niman ijkon okichiu para on israelitas no ma tlajtlakokan.
27 Pero Baasa, ikoneu Ahías, yejuan kisaya itech itribu* Isacar, okitlajtouilij para kimiktis. Okimiktito Nadab ipan on ueyikalpan itoka Gibetón, yejuan iminueyikalpan on filisteos chika yejua iuan on soldados israelitas kiyejyeualtsakutikatkaj on ueyikalpan Gibetón para kuijsokiskiaj. 28 Baasa okimiktij Nadab niman okalak rey de Israel. Ijkuakon, Asa kuikaya yeyi xipan ika okalak rey ne Judá. 29 Niman ijkuak Baasa kemach okalak rey, okimiktij nochi ifamilia Jeroboam. Xakaj okau yoltikaj ijkon ken toTEKO yokijtojka nochiuas, ijkuak okijlij Ahías on tiotlajtojketl yejuan chantiya ne Silo. 30 Ijkin onochiu, pampa Jeroboam okichiu miyek tlajtlakojli, niman okichiu para on israelitas no ma tlajtlakokan. Yejua ika, toTEKO iminDios on israelitas, sanoyej okualan.
31 Ipan on amamoxtli* kampa tlajkuilolnestikaj iminnemilis on reyes de Israel, ompa tlami kijtoua inemilis Nadab, niman ompa kijtoua nochi tlen okichiu.
32 Asa nochipa okipix nouijsokilistli iuan Baasa, on rey de Israel.
Baasa rey katka ne Israel
33 Ijkuak Asa kuikaya yeyi xipan ika tlamandarouaya ken rey ne Judá, Baasa, itelpoch Ahías, okalak rey ne Israel. Otlamandaroj ken rey 24 xipan, niman ochantik ipan on ueyikalpan Tirsa. 34 Pero Baasa okichiu tlen xkuajli ixpan toTEKO, pampa no ijki otlajtlakoj ken Jeroboam, yejuan okichiu para on israelitas ma tlajtlakokan.