On tiotlajtolketl Ahías kijtoua tlinon ipan nochiuas Jeroboam
14
Ipan on tonaltin, Abías, itlakakoneu on rey Jeroboam, sanoyej okualok. 2 Kemaj, Jeroboam okijlij isiuau:
—Xisiui, oksekneka xmotlakenti para maka mitsixmatiskej ika tinosiuau. Kemaj xuiya Silo kampa chanti Ahías, on tiotlajtojketl yejuan onechijlij ika nejua, nirey yes ipan in nación. 3 Xkitati para ma mitsijli tlinon ipan nochiuas in tokoneu. Niman xkiktili majtlaktli pan, keski memelatsitsimej, niman se jarra nekutli.
4 Niman isiuau Jeroboam ijki okichiu. Oyaj ne Silo niman oajsik ichan Ahías. Ahías xok tlachaya pampa sanoyej ye ueuentsin katka, 5 pero toTEKO yokimachistijka ika isiuau Jeroboam yas kontas para kontlajtoltis tlinon ipan nochiuas ikoneu yejuan kualo. No ijki, okijlij kenijki yejua kinankilis. Niman okijlij ika yas xixmachyoj.
6 Niman ijkuak Ahías okak chojcholojtiu on siuatl ijkuak kalaktiaya itech on tsakuijlotl okijlij:
—Xkalaki tejua, isiuau Jeroboam. ¿Tline tikneki tinechkajkayauas ken tiókse siuatl? Nejua yonikselij tlanauatijli para ma nimitsijli ika xkuajli tlinon nochiuas. 7 Aman tej, xuiya niman xkijliti Jeroboam ika toTEKO, iDios Israel ijkin yokijtoj: 'Nejua onimitstlapejpenij intech nochimej on israelitas, niman onimitstlalij para xkinyekana notlapejpeniluan israelitas. 8 Nejua onikuilij on reino ifamilia David, para tejua onimitsmakak. Pero tejua xtimouika ken onouikak David, notekitkau. Yejua okintlakamat notlanauatiluan niman onechtokak ika nochi iyojlo. Niman yejua okichiu tlen kuajli ijkon ken nejua niknekiya. 9 Pero tejua yej, timouika más sanoyej xkuajli, xken nochimej on reyes yejuan yopanokej, niman sanoyej yotinechkualanij pampa yej yotikinmochijchiuilij oksekimej dioses niman ídolos de tepostli. Yejua ika, yotinechkualanij niman yotinechchichiu ken xitlaj* nivaleroua. 10 Yejua ika, niktitlanis nochi tlen xkuajli ipan mofamilia. Nikchiuas para ne Israel ma mikikan nochimej mokoneuan yejuan tlakamej. Nion se xnomanauis. Nikinochpanas nochimej mouejkakoneuan ken nikochpanaskia inxixalistli yolkej. 11 On yejuan mikiskej ipan ueyikalpan kinkuaskej chichimej, niman on yejuan mikiskej ipan mijlaj kinkuaskej tsojpilomej. Ijkon nochiuas pampa nejua nemoTEKO ijki yoniktlalij.’
12 "Kemaj Ahías no okijlij isiuau Jeroboam:
—Niman tejua siuatl, xuiya mochan. Ijkuak kemach tonkalaktias ipan on ueyikalpan, on mokonetsin mikis. 13 Kemaj, nochimej on israelitas najmanaskej ipampa, niman kemaj kitôkaskej. De nochimej ifamilias Jeroboam, san yejua in mokoneu kitôkaskej, pampa ixpan toTEKO, iDios Israel, san yejua xokichiu on tlen xkuajli. 14 Niman toTEKO kitlalis sen rey ne Israel, niman on rey kimpopolos ifamilias Jeroboam. Niman on nochiuas sanoyej saniman. 15 ToTEKO kintlajyouiltis on israelitas, niman kintsejtselos ijkon kenon río kitsejtseloua on xojtli ijkuak katoktia. Kinkixtis on israelitas de nikan ipan in kuajli tlajli yejuan okinmakak nemouejkatajuan, niman kinsesemanas más uejka de ikuitlapan on río Éufrates pampa okinochijchiuilijkej ixneskayomej de on diosa Astarté. Yejua ika, toTEKO sanoyej okualanijkej. 16 ToTEKO kintemaktilis on israelitas para ma kimpopolokan, pampa Jeroboám otlajtlakoj niman okichiu para on israelitas ma tlajtlakokan.”
17 Kemaj isiuau Jeroboam oyaj niman oajsik ne Tirsa. Niman ijkuak okalak ichan, on ikoneu nimantsin omik. 18 Nochimej on israelitas oyajkej okitôkatoj niman okichokilijkej. Nochi ijki onochiu ken toTEKO okijlijka on tiotlajtojketl Ahías.
19 Ipan on amamoxtli* kampa tlajkuilolnestikaj iminnemilis on reyes de Israel, ompa tlami kijtoua inemilis Jeroboam. Ompa kijtoua kenijki otekit ken rey, niman kinteneua on nouijsotilistin yejuan okichiu. 20 Jeroboam otlamandaroj ken rey sempoajli uan ome xipan, niman ijkuak omik okitôkakej kampa toktôkej iachtojtajuan. Kemaj Nadab, ikoneu, kej yejua okalak rey.
Roboam rey katka ne Judá
21 Roboam, itelpoch Salomón, yejua rey katka ne Judá. Yejua, kipiyaya 41 xipan ijkuak opeu tlamandaroua ken rey, niman otlamandaroj matlaktli uan chikome xipan. Otlamandaroj ipan on ueyikalpan Jerusalén yejuan toTEKO okitlapejpenij intech nochimej on uejueyikalpanmej de itribus Israel, para ompa onyas iueyitiopan kampa ikoneuan kimauistiliskej. Inanaj Roboam katka sen amonita, niman itoka katka Naama.
22 Pero ichanejkauan Judá sanoyej xkuajli tlen okichijkej ixpan toTEKO. Niman imintlajtlakoluan más okualanij toTEKO xken imintlajtlakoluan iminachtojtajuan, 23 pampa on chanejkej Judá okinnochijchiuilijkej tiopantsitsimej kampa kinmauistiliayaj on ídolos, ipan tepetsitsimej. No ijki, oketstejkej temej para kinmauistiliayaj, niman ipan kojtin* okixneskayotijkej on diosa Astarté, niman okintelketskej ipan tepetsitsimej, niman tlatsintlan de on kojtin* yejuan mayeualtikej. 24 Niman nemiyaj tlakamej niman siuamej ajauilnenkej yejuan nonamakayaj ikan auilnemilistli ne ipan on pipitikej tiopamej kampa kinmauistiliaj on ídolos. On chanejkej ne Juda kichiuayaj nochi tlen tetlajyeloj xkuajli no ijki ken okichijkej on tlakamej de on naciones yejuan xkixmatij toTEKO, yejuan yejua okinkixtij inmixpan on israelitas ijkuak yejuamej kalakiyaj ipan on tlajli.
25 Ijkuak Roboam kuikaya makuijli xipan ika tlamandarouaya ken rey, on rey de Egipto itoka Sisac, oyaj okuijsokito on ueyikalpan Jerusalén. 26 Niman okinoyaxkatij* nochi on tlajtlamach* yejuan patioj ipan iueyitiopan toTEKO niman ipan ipalacio on rey inuan nochi on escudos de oro yejuan okinchijchijka Salomón. 27 Yejua ika, on rey Roboam okinchijchiu oksekimej escudos de bronce para okintlalij kampa okimpatlak on yejuan de oro. Niman okinmaktilij on itlajpixkauan yejuan tlajpiyayaj ikalakiyan on palacio para ma kincuidarokan. 28 Niman nochipa ijkuak on rey yaya ipan iueyitiopan toTEKO, on itlajpixkauan yejuan yayaj iuan, kimiktiyaj on escudos. Niman ijkuak nokuepayaj ipan on palacio, on escudos oksejpa kintlaliayaj ipan on kalijtik kampa kincuidarouayaj.
29 Ipan on amamoxtli* kampa tlajkuilolnestikaj iminnemilis on reyes de Judá, ompa tlami kijtoua inemilis Roboam niman nochi tlen okichiu.
30 Roboam nochipa okipix nouijsokilistli iuan Jeroboam. 31 Niman ijkuak omik Roboam, okitôkakej kampa toktôkej iachtojtajuan ne kampa kuitiaj Iueyikalpan David. Inanaj Roboam katka sen amonita niman itoka katka Naama. Kemaj Abiam, ikoneu Roboam, kej yejua okalak rey.