2 Samuel
David okimat ika omik Saúl
1
Sakin ijkuak yomik Saúl, David oksejpa onokuep Siclag ijkuak yokintlanka on amalecitas, niman ompa onokau ome tonajli. 2 Kampa ika yeyi tonajli, oajsik sen tlakatl yejuan oualeu itech isoldados Saúl. Yonotlakentetsajtsayanka niman yonotemilijka tlajli ipan itsontekon para okiteititij ika kipiyaya ueyi ajmantli. Ijkuak oajsik itech David, onopachoj hasta ipan tlajli ikan miyek tetlakaitalistli. 3 Kemaj David okitlajtoltij on tlakatl:—¿Kanon tiualeua?
On tlakatl okinankilij:
—Nejua oniuajcholojteu ipan imincampamento on israelitas.
4 Niman David okijlij:
—Xnechijli tlinon onochiu.
On tlakatl okinankilij:
—Oonyak nouijsokilistli, niman on soldados israelitas ochojcholojtejkej, niman miyekej omikkej. ¡Niman no teuan omik Saúl niman Jonatán itelpoch!
5 Niman David okitlajtoltij:
—¿Kenijki tikmati ika Saúl niman itelpoch omikkej?
6 Yejua okinankilij:
—Nejua ninemiya ipan on tepetl Gilboa, niman onikitak ika ompa Saúl sa ipan nopachojtikatka ilanza para nomiktiskia, chika itlauelikniuan ye ajsitakatkaj itech ika imincarretas de nouijsokilistli, niman oksekimej yayaj ipan imincaballos. 7 Ijkuak yejua onechitak onechonnots, niman nejua oniktlajtoltij: “¿Tlinon tikneki ma nikchiua?”. 8 Kemaj onechtlajtoltij akin nejua, niman onikijlij ika nejua niamalecita. 9 Kemaj onechijlij: “Xnechnisiui niman xnechmikti pampa sanoyej nitlajyouiya, niman xueli nimiki, yej sanken* niyoltikaj.” 10 Ijki tej, oniknisiuij niman onikmiktij pampa onikitak ika sanoyej tlakokojli* katka niman nemiya imikilistempan. Kemaj onikixtilij icorona yejuan kipiyaya ipan itsontekon niman imakoskau yejuan kipiyaya ipan ima para onimitsajkuilij.
11 Ijkuak David niman on yejuan ompa iuan nemiyaj ijkon okakkej, onotlakentetsajtsayankej pampa sanoyej onajmankej. 12 Niman opeu kichokiliaj Saúl iuan Jonatán on itelpoch, niman no ochokakej ika okintlankej on israelitas yejuan isoldados toTEKO. Onosaukej, xitlaj* okuajkej hasta tlapoyajkan. 13 Sakin David okitlajtoltij on tlakatl yejuan okuakik on tlajtojli:
—¿Kanon tiualeua?
Yejua okinankilij:
—Nejua xnichanej, nejua niamalecita.
14 Niman David okijlij:
—¿Hasta tline* xotimomojtij niman yej otimoyolchikau para otikmiktij on rey Saúl yejuan toTEKO okitlapejpeni para rey?
15-16 Kemaj David okijlij on tlakatl:
—Tejua tikpiya tlajtlakojli tla timikis pampa sano tejua otikijtoj ika otikmiktij Saúl, on yejuan toTEKO okitlapejpeni para rey yes.
Kemaj David amanaman okonnots semej on tlakamej yejuan kinyekanaya, niman okijlij:
—¡Xmikti in tlakatl!
Niman semej on tlakamej yejuan kinyekanaya, oyaj niman okimiktij ika ilanza.
David okinchokilij Saúl niman Jonatán
17 David onokuikatij sen ajmankakuikatl ipampa imikilis Saúl niman Jonatán on ikoneu, 18 niman otlanauatij ma kinmachtijkan on chanejkej ne Judá. (In kuikatl tlajkuilolnestikaj ipan on amamoxtli* yejuan itoka Jaser.)
19 "¡Ay, Israel,
okinmiktijkej ipan on tepeyoj motlayekankauan
yejuan imintech tikpiyaya moueyilis!
¡Oxixinkej on tlakamej yejuan xmojkej!
20 Maka xtemachistikan ipan on ueyi kalpan Gat.
Nion maka xkintlajtlajtouilikan yejuan nemij ipan icalles Ascalón
para maka kimpaktis ichpochuan on filisteas,
niman ichpochuan on xtlaneltokaj kinyolpaktis.
21 ¡Ay, tepemej de Gilboa,
makasa ma xini atsintli, nion ajuichtli nemopan
nion neka mijlaj, makasa itlaj ma tlaki,
kampa nemopan sanoyej omikouak!
Ompa ouetskej imintepostlatsakuilil on tlakamej yejuan xmojkej.
Ompa okipoloj ipetlanalis itepostlatsakuilil Saúl.
22 Saúl niman Jonatán, xkaman san ijki uajnokuepayaj ijkuak ontlauijsokiyaj.
Nochipa ijkuak uajnokuepayaj,
iminespada niman imintlaminal yesyokej katkaj
niman chajkej katkaj,
pampa kinmiktiayaj imintlauelikniuan hasta yejuan más kojtikej.
23 Saúl niman Jonatán, tikintlajsojtlayaj niman tikinnekiyaj.
San sekan nemiyaj ipan iminnemilis
niman san sekan onokajkej ipan inmikilis.
Más sanoyej tlaksayaj xken on águilasa ijkuak patlanij.
Más kojtikej katkaj xken on leones.
24 ¡Ichpochuan Israel, xchokilikan Saúl
yejuan kualtsin mechtlakentiaya ikan tlakentli* chichiltik
de lino yejuan más kuajli,
yejuan mechkualnextiaya ikan tela tlachijchijtli ikan oro.
25 ¡Youetskej on xmojkej ipan tlauijsokilistli!
Jonatán omik ipan itepeyouan Gilboa.
26 "¡Nimitsajmankachokilia nokniu Jonatán!
¡Otinechnek sanoyej kualtsin!
Monekilis yejuan otinechpiyalij más sanoyej ueyi xken innekilis on siuamej.
27 ¡Youetskej on yejuan xmojkej!
¡Imintepos yokimpojpostekkej!"