1 Samuel
Dios okimakak ikonetsin Ana
1
Nemiya sen tlakatl itoka Elcana yejuan ualeuaya itech itribu* Efraín. Yejua chantiya ipan on kalpan itoka Ramá ne ipan itepeyoj Efraín. Yejua itelpoch katka Jeroham, ixuiu Elihú, niman iokpaixuiu Tohu yejuan ikoneu katka Suf yejuan kisa itech itribu* Efraín. 2 Elcana kipiyaya ome isiuau. Se itoka katka Ana niman okse Penina. Penina kimpiyaya ikoneuan; pero Ana xkimpiyaya. 3 Ipan cada xipan Elcana kisaya ikalpan niman yaya ipan on ueyikalpan Silo para konmauistiliaya toTEKO yejuan kipiya nochi poder, niman kimakaya uentli. Ompa ne Silo tekitiyaj ken tiopixkej, Ofni niman Finees, itelpochuan on tiopixki Elí. 4 Ijkuak Elcana kimakaya uentli toTEKO, no kimakaya Penina seki nakatl iuan nochimej ikoneuan tlakamej niman siuamej. 5 Pero Ana nochipa kimakaya on nakatl yejuan más kuajli, pampa sanoyej kitlajsojtlaya* maski toTEKO okichiu maka ma ueli tlaskalti. 6 Yejua ika Penina kitaya ken itlauelikniu, kipajsolouaya niman kipijpinauiyaya pampa toTEKO okichiu para xueliya tlaskaltiaya.
7 Cada xipan ijkuak yayaj Silo ne itabernáculo toTEKO, Penina sa tlamach kijliaya Ana. Yejua ika, Ana sanoyej chokaya niman hasta xtlakuaya. 8 Kemaj Elcana kijliaya:
“Ana, ¿Tline* tichoka? ¿Tline sanoyej timajmana niman xtitlakua? ¿Tlen xmás ueyi kijtosneki tla nejua tinechpiya, xken tikpiyaskia majtlaktli mokoneuan?”
9 Se tonajli ijkuak nemiyaj ipan on ueyikalpan Silo, ijkuak yejuamej otlan tlakuaj, Ana oyaj ipan itabernáculo toTEKO para onoueyikatsajtsilito. On tiopixki Elí yeuatikatka nisiu ikalakiyan on tabernáculo. 10 Ompa Ana ika ichokilis niman ikan miyek ajmantli opeu kichiua oración. 11 Niman okichiu in promesa ixpan Dios: "NoTEKO, tejua yejuan tikpiya nochi poder, tla tikita noajmanalis, niman tinechelnamiki, niman tla tinechmaka sen nokoneu, nejua nimitsmaktilis para mitstekipanos nochi inemilis. Niman para nesis ika moyaxka, xkaman kitekiliskej itson."
12 Ijkuak Ana youejkau kichiua oración ixpan toTEKO, Elí okitak ikamak chika yejua kichiuaya oración. 13 Pero yejua kichiuaya oración san yoliktsin, nion xkakistiya tlinon kijtouaya, pampa san kojoliniaya iten. Yejua ika, Elí okinemilij ika tlauanki katka, 14 niman okijlij:
—¿Hasta kamanon titlauantias? ¡Xkaua on tlauanalistli!
15 Niman Ana okinankilij:
—¡Ka noteko! Nejua xnikoni vino noso itlaj okse yejuan tetlauantij. Nejua yej sanoyej ninajmana niman nikan nikijlijtikaj toTEKO on tlen nechajmana. 16 Maka xnemili tla xnikuajli siuatl. Nejua yej nikchiua oración pampa sanoyej miyek on tlen nechajmana niman nechyolkokoua.
17 Kemaj Elí okinankilij:
—Xuiya ikan yolseuilistli, niman iDios Israel ma mitsmaka on tlen tiktlajtlanilia.
18 Ana okinankilij:
—Ueyi nimitstlajsojkamachilia, nejua nimotekipanojkau.
Kemaj, Ana onokuep kampa oualeu, niman otlakuaj. Niman xokaman onajman.
19 Uajmostla saniman, onokuitejkej, niman ijkuak yokimauistilijkej toTEKO, onokuepkej iminchan ipan on kalpan Ramá. Sakin Elcana onotekak iuan Ana, isiuau, niman toTEKO okimakak Ana on tlen okitlajtlanilij. 20 Ijki tej, Ana onokonean, niman ijkuak oajsik on tiempo, okitlakatilij sen tlakakonetl, niman okitokayotij Samuel, pampa okijtoj: "Yejua in oniktlajtlanilij noTEKO."
21 Más sakin* Elcana oyaj iuan nochi ifamilia ipan on ueyikalpan Silo para okichiuato on tlinon okiprometeroj itech toTEKO, niman para okimakak uentli, ijkon ken kichiuayaj cada xipan. 22 Pero Ana xoyaj, niman ijkin okijlij iueuentsin:
—Nejua xnias. Yej nias hasta ijkuak nikchichiualkaualtis nokoneu. Ijkuakon kemaj nikuikas para nikmaktilis toTEKO, niman ompa nikauas para nochipa.
23 Niman Elcana, iueuentsin* okinankilij:
—Xchiua ken tikita kuajli yes. Xmokaua, hasta tla yotikchichiualkaualtij mokoneu, niman toTEKO ma kichiua nochi on tlen yotiktlajtlanilij.
Ijki tej, Ana onokau niman okiskaltij ikoneu hasta kaman okichichiualkaualtij.
Ana okuikak Samuel ne Silo
24 Niman ijkuak Ana okichichiualkaualtij ikoneu, maski sanken* pitentsin katka, okuikak ipan itabernáculo toTEKO ne Silo. No okuikak sen becerro yejuan yeyi xijkayotl, okiktik 22 litros trigo, niman sen kuetlaxtekomatl ikan vino. 25 Kemaj okiuentlalijkej on becerro, niman on tlakakonetl okuikakej ixpan on tiopixki Elí. 26 Niman Ana okijlij:
—Xnechtlapojpolui tejua notataj. ¿Tinechelnamiki? Nejua niyejua on siuatl yejuan tejua otikitak kichiuaya oración ixpan toTEKO nikan nisiu kampa tinemiya. 27 Nejua oniktlajtlanilij toTEKO para ma nechmaka in nokoneu, niman yejua onechmakak. 28 Aman nikmaktilia toTEKO para ma kitekipano ipan nochi inemilis.
Kemaj Elí niman Ana onotlakuantelketskej niman onopachojkej hasta ipan tlajli, ixpan toTEKO.