Ana okuikatlalij toTEKO
2
Niman Ana ijkin okichiu oración:"NoTEKO, nejua sanoyej niyolpaki motechika
pampa tejua tinechmaka yenkuik chikaualistli.
Uelis inka niuetskas notlauelikniuan
pampa tejua yotinechpaleuij.
¡Yejua ika tej, sanoyej nipaki!
2 ¡Xakaj okse yektli ken tejua, noTEKO!
¡Xakaj okse temanauiya ken tejua, noDios!
¡Xakaj okse nemi ken tejua!
3 Maka yakaj ma tlajto ika noueyimatilistli.
Maka yakaj sa ipan ma noueyimati,
pampa toTEKO yejua Dios yejuan nochi kimatstikaj.
Yejua teyolkuitiaj ijkuak se kuajli tlen kichiua,
niman ijkuak se xkuajli tlen kichiua.
4 Yejua kimpojpostekilia inminarcotlaminal on yejuan kojtijkej,
niman kinmaka chikaualistli on yejuan xkojtikej.
5 On tlakamej yejuan kipiyayaj miyek tlakuajli
aman tlajyouiyaj ika mayantli.
Niman on yejuan mayanayaj,
aman xok mayanaj.
On siuatl yejuan tetsakatl* katka,
aman yokipix chikome ikoneu.
Niman on siuatl yejuan kipiyaya miyek ikoneu,
aman xok itlaj kipiya.
6 ToTEKO, tekixtilia nemilistli, niman kitemaka.
Yejua teuika ijtik tlalkontli,
niman yejua tekixtia.
7 ToTEKO, kichiua para sekimej mayankatsintlakamej,
niman sekimej ricojtiaj.
Yejua tetlajkali niman yejua teketsteua.
8 Dios ketsteua ipan tlajli sen mayanki.
Niman kixtia ipan tlajsojli yejuan notlajtlayeuiyaa,
para kitlalia intsajlan on yejuan uejueyixtokej.
Kemaj kitlalia kampa onkaj tetlakaitalistli,
pampa toTEKO yejua iyaxka* icimiento in tlaltikpaktli
yejuan ipan okitlalij.
9 ToTEKO kejeua inojui on yejuan kuajkualtin tlakamej,
pero yejuan xkuajkualtin mikij ipan tlayouajlotl,
pampa xakaj tetlani sano ika yejua ifuerza.
10 ToTEKO sanoyej kintlajyouiltis itlauelikniuan,
niman desde ne iluikak kuajtitlanis miyek tlauitekilistli imimpan itlauelikniuan.
Kinyolkuitis nochimej on tlakamej ipan in tlaltikpaktli.
Kimakas poder on irey yejuan yokitlapejpenij.
Niman kipaleuis para más kipiyas poder on yejuan okikuaasaitijuijkej."
11 Kemaj Elcana iminuan nochimej ifamilia onokuepkej iminchan ipan on kalpan Ramá, pero on tlakakonetl onokau para okitekipanoj toTEKO ken kinauatiaya on tiopixki Elí.
Intlajtlakol ikoneuan Elí
12 Ikoneuan Elí sanoyej xkuajli nouikayaj, niman nion achijtsin xkitlakaitayaj toTEKO, 13 nion xkuajli tekitiyaj ken tiopixkejb intech on israelitas pampa ijkuak yakaj tlauentlaliaya, yejuamej kititlaniyaj sen intlakeual. On tlakeuajli kiktiya sen teposchijkojli yejuan kipiya yeyi itlanuan yakapitstikej, niman chika iksiya on nakatl, 14 kalaktiaya on teposchijkojli ipan on kontli, kampa iksiya on nakatl. Niman nochi on nakatl yejuan kontilanaya ika on teposchijkojli, kinmiktiliaya itelpochuan Elí. Ijki kinchiuiliayaj nochimej on israelitas yejuan ontlauentlaliayaj ne Silo. 15 No, kamantika ijkuak ye kitlatiskej on chauak ipan tlaixpan*, ajsiya itlakeual on tiopixki niman kijliaya on yejuan tlauentlalia: "Xnechmaka on nakatl para niktliuachilis on tiopixki, pampa on yejuan yoyiksik xmitsselilis. Yejua kineki xoxojki para kitliuatsas." 16 Niman tla on tlakatl kijliaya ika achtoj kitlatis on chauak, niman kemaj yejua uelis kitilanas san kech nakatl kinekis, on tlakeuajli kinankiliaya: “¡Ka, ika onkaj tinechmakas amantsin! Tla xtinechmakas ika onkaj nimitskuilis.” 17 Ijki tej, on tlajtlakojli yejuan kichiuayaj in telpokamej ixpan toTEKO sanoyej xkuajli katka, pampa san kajauilmatiyaj on uentli yejuan iyaxka* toTEKO.
Samuel kitekipanoua toTEKO ipan itabernáculo
18 Chika ijkuakon, on tlakakonetl Samuel kitekipanouaya toTEKO, niman notlakentiaya ika sen tlakentli* itoka efod* yejuan de lino. 19 Cada xipan inanaj kichijchiuiliaya okse capa niman kiktiliaya ijkuak yaya ipan on tabernáculo iuan iueuentsin, para konmakayaj toTEKO on uentli yejuan kimakaya cada xipan. 20 Kemaj on tiopixki Elí kitiochiuaya Elcana iuan isiuau, niman ijkin kijliaya Elcana: "ToTEKO ma mitstiochiua, niman ma mitsmaka más mokoneuan itechkopa in siuatl, ipampa in mokoneu yejuan Ana okimaktilij toTEKO para kitekipanos." Kemaj yejuamej nokuepayaj iminchan, 21 niman toTEKO okitiochiu Ana para okipix okse yeyi tlakakonetl niman ome siuakonetl. Niman on tlakakonetl Samuel kuajli noskaltiaya ixpan toTEKO.
22 Niman Elí yejuan sanoyej ye ueuentsin katka, kimatstikatka nochi on tlen itelpochuan xkuajli kinchiuiliayaj on israelitas. Kimatiya ika notekayaj inmiuan on siuamej yejuan tekitiyaj ikalakiyan on tabernáculo kampa nemi Dios. 23 Kemaj Elí okinmijlij ikoneuan:
—Nochi tlakatl nechtlajtlajtouilia on tlen xkuajli nenkichiuaj. ¿Tline ijkon nemouikaj? 24 Ka, nokoneuan, sanoyej xkuajli on tlen nikaki nenkichiuaj. Sanoyej xkuajli on tlen ikoneuan toTEKO kijtouaj nenkichiuaj. 25 Tla sen tlakatl kichiuilia xkuajli okse tlakatl, Dios uelis kimpaleuis ma noyoltlalikan. Pero tla sen tlakatl kichiuilia xkuajli toTEKO, ¿Akinon uelis kipaleuis para maka kiselis icastigo Dios?
Maski Elí ijkon okinmijlij itelpochuan yejuamej xokinekkej okakkej on tlen kinmijliaya, pampa toTEKO yokintlajtouilijka ika kiminmiktis.
26 Chika kuakon on tlakakonetl Samuel noskaltiaya. Yejua sanoyej kuajli nouikaya, niman toTEKO Dios kipaktiaya, niman on tlakamej no kimpaktiaya.
ToTEKO okimelajkaijli Elí on tlen nochiuas imimpan ifamilia
27 Ipan on tonaltin, ouajla sen tiotlajtojketl ichan Elí, niman okijlij:
—Ijkin kijtoua toTEKO: “Ijkuak mouejkatajuan nemiyaj Egipto niman nemiyaj ken esclavos itech on rey de Egipto, nejua sanoyej kuajli oninopannexti imintech. 28 Niman itech nochimej on tribus*, nemejuamej onomechtlapejpenij para nennotiopixkauan yeskej, para nennechmakaskej uentli yejuan tlatlas ipan notlaixpan*, niman nenkitlatiskej kopajli, niman nenkitlalijtiaskej nixpan on efod*. No onikinmakak nemouejkatajuan nochi on uentli yejuan on israelitas kitlatiaj para noueyilis nejua nemoTEKO. 29 ¿Tline tej, nenkajauilmatij on uentin yejuan tlatla niman on okseki uentin yejuan onitlanauatij ma nechajkuilikan? ¿Tline más tikintlajsojtla mokoneuan xken nejua, niman tikinkauilia notomauaj ika on uentli yejuan más kuajli yejuan kuajkij nokoneuan israelitas? 30 Yejua ika tej, toTEKO iminDios on israelitas yejuan okijtojka ika nochipa nenkitekipanoskej, aman ijkin kijtoua: "Xokaman nikinkauilis ma nechtekipanokan. Nejua nikintlakaitas yejuan nechtlakaitaskej niman on yejuan noka uetskaskej, nikimpijpinajtis. Nejua nemoTEKO nikijtoua. 31 Ye ajsitikaj* ijkuak nemechkixtilis nemoueyilis niman iminueyilis nemouejkatauan, niman nion se mofamilia xueuentsintias. 32 Tikitas ikan ajmantli niman ikan nexikolistli nochi on tlen kuajli nikchiuas itech Israel, pero xakaj mofamilia ueuentsintias. 33 Nikauas se de mofamilia yejuan nechtekipanos ken tiopixki ne itech notlaixpan*, pero ixtololojuan nexikolmikiskej niman yejua noyolkokos. Niman nochimej oksekimej mouejkakoneuan kinmiktiskej. 34 Niman para tikneltokas ika nochiuas on tlen yonikijtoj, on omemej mokoneuan, Ofni niman Finees, mikiskej san setipan ipan se tonajli. 35 Kemaj niktlalis sen tiopixki yejuan kichiuas nochi tlinon nejua niknauatis. Yejua nikmakas miyekej iuejkakoneuan niman nochipa tekitiskej itech on rey yejuan nejua yoniktlapejpenij. 36 Kemaj nochi mofamilia yejuan xmikis, uajlas uajnotlakuantelketsas ixpan on tiopixki para ma kimaka se plata tomin noso tlakuajli. Kiiknotlajtlanilis ma kimaka tekitl intech on tiopixkej para uelis kinotlanilis itlakual."