El libro de Rut
Elimelec niman ifamilia oyajkej Moab
1
1-2 Ipan on tonaltin ijkuak on jueces kinmandarouayaj on israelitas, oonyak sen ueyi mayantli ipan nochi on región. Nemiya sen tlakatl yejuan itoka katka Elimelec, yejuan chanej* katka ipan on ueyikalpan Belén ne Judá. Elimelec oyaj onochantito ipan on ueyitlalpan Moab iuan isiuau niman ome itelpoch. Isiuau itoka katka Noemí, niman itelpochuan imintoka katka Mahlón niman Quelión. Nochimej yejuamej okiskej itech iueyifamilia Efrata yejuan chanejkej katka ne Belén. Oajsikej tej, ne Moab niman ompa ochantikej.3 Pero Elimelec iueuentsin* Noemí omik, niman yejua onokau sa iuan on ome itelpoch. 4 Sakin on telpokamej onosiuatijkej iminuan omemej ichpokamej moabitas. Se itoka katka Orfa niman okse Rut. Pero ijkuak opanok kanaj majtlaktli xipan, 5 no omikkej Mahlón niman Quelión. Ijki tej Noemí onokau iselti. Nion iueuentsin* nion ikoneuan xok kimpiyaya.
Rut iuan Noemí oyajkej Belén
6 Se tonajli Noemí okitekakilij ompa ne Moab ika toTEKO okinmiknelij on israelitas ikoneuan, niman okichiu para oksejpa kuajli ma tlatlaki. 7 Kemaj Noemí okinemilij nokuepas Judá, niman on omemej isiuamouan no okinekkej iuan oyajkej. Ijkon tej, okiskej kampa chantiyaj. 8 Pero ijkuak yopejka nejnemij okinmijlij isiuamouan:
—Xuiyan, xmokuepakan nemochan niman xmokauakan inuan nemonanaj, niman ma toTEKO kuajli mechpiya ijkon ken nemejuamej onentechtlajsojtlajkej nejua inuan notelpochuan. 9 Niman ma kichiua para cada se de nemejuamej oksejpa ma kinexti iueuentsin* niman xpiyakan paktli iminuan.
Kemaj Noemí okinnauatij niman okintejtenkuaj; pero yejuamej sanoyej onajmankej niman opeu chokaj, 10 niman okijlijkej:
—¡Ka! ¡Tejuamej tiknekij tiaskej mouan ipan mopaís!
11 Pero Noemí oksejpa okinmijlij:
—¡Xuiyan, nokoneuan! ¿Tline* nenkinekij nenyaskej nouan? Nejua xok nikimpiyas oksekimej nokoneuan yejuan uelis nonamiktiskej nemouan. 12 Xuiyan, xmokuepakan nemochan. Nejua ye nilamajtsin niman xok oksejpa ninonamiktis. Niman maski ninonamiktiskia in tlayoua niman nikimpiyaskia nokoneuan, 13 nemejuamej xueliskia nenkinchaskiaj hasta ma uejueyiyakan para nemonamiktiskej iminuan. ¿Tlen uelis xnemonamiktiskej san para nenkinchaskej? ¡Ka, nokoneuan, maka! ToTEKO yonechmakak ueyi ajmantli, pero más ueyi ajmantli nikpiyas tla nikitas ken nentlajyouiyaj.
14 Yejuamej ouejkau chokaj. Niman kemaj Orfa okitenkuaj imonan niman iuan ononauatij, pero Rut onokau iuan imonan. 15 Kemaj Noemí okijlij Rut:
—Xkita, Orfa, on okse nosiuamon yonokuep. Ye yau ichan ipan ipaís komintas iídolos. Xuiya iuan.
16 Pero Rut okinankilij:
—¡Maka xnechijli ma nimitskajteua niman ma ninoxelo mouan! * Kampa tias, nejua no nias; * kampa tichantis, no ompa nichantis; * mochanejkauan*, nochanejkauan yeskej, niman * moDios, yejua yes noDios. * 17 Kampa timikis tejua, no ompa nimikis niman no ompa nechtokaskej. ToTEKO ma nechcastigaro tla nimitskaua, motech san uelis nechxelos on mikilistli.
18 Ijkuak Noemí okitak ika Rut sanoyej kinekiya iuan yas, xok itlaj okijlij. 19 Niman ijkon, omemej okitokakej on ojtli hasta oajsikej ipan on ueyikalpan Belén. Ijkuak okalakkej Belén, onajkomankej nochimej on chanejkej ipan on ueyikalpan, niman on siuamej kijtouayaj:
—¿Tlen in siuatl xnejli yejua Noemí?
20 Pero yejua kiminnankiliaya:
—Makasa xnechtokayotikan Noemía. Aman xnechtokayotikan Marab pampa toTEKO yejuan nochi ueli kichiua onechmakak miyek ajmantli. 21 Nikan onikis hasta nimajmatentiu niman aman ninokuepa niuajmapijpilkatiu pampa ijki okinek toTEKO. ¿Tline nennechtokayotiaj Noemí, ijkuak Dios yejuan nochi ueli kichiua, yonechtlajyouiltij niman yonechajtitlanilij miyek ajmantli?
22 Ijkon tej, Noemí okis ne Moab iuan Rut isiuamon yejuan moabita. Yejuamej oajsikej Belén ijkuak peuaya kipixkaj cebada.