Rut tekiti ipan itlal Booz
2
Nemiya sen tlakatl yejuan ken kitaya Elimec iueuetsin Noemí. Yejua ika Noemí no ken kitaya on tlakatl yejuan itoka katka Booz. Yejua sanoyej rico katka niman ueyixtikatka.2 Se tonajli Rut okijlij imonan:
—Xnechkauili ma niuiya mijlaj. Manin yakaj yejuan pixka nechkauilis nias ikuitlapan para ninotijtixuis.
Niman imonan okinankilij:
—Xuiya, nokoneu.
3 Rut oyaj ipan sen mijloj niman opeu notijtixuiya yejuan kixkauayaj on pixkakej. Niman okimat ika on mijloj iyaxka* katka Booz yejuan ken kitaya Elimelec imontaj Rut. 4 Booz okis Belén niman oajsik ne imijlaj, niman ijkin okintlajpaloj on pixkakej:
—¡ToTEKO ma nemi nemouan!
Yejuamej okinankilijkej:
—¡Ma toTeko mitstiochiua!
5 Kemaj Booz okitlajtoltij on tlakatl yejuan kinyekana on pixkakej:
—¿Kanon kenteita on ichpochtli?
6 On tlakatl okijlij:
—Yejua sen moabita, ualeua ipan on tlajli Moab. Noemí yejua okuajuikak. 7 Onechiknotlajtlanilij tla nikauilia yas inkuitlapan on pixkakej para notijtixuis. Yejua yotekit nochi in kualkan, hasta kemach onoseuiko.
8 Kemaj Booz okijlij Rut:
—Xkaki nokoneu, maka timotijtixuis ipan okse tetlal. Xmokaua nikan inminuan nosiuatekitkauan. 9 Xkintoka kampa tikitas pixkaj. Yonikinnauatij notlakeualuan maka yakaj mitspajsolos. Ijkuak tamikis, xuiya kampa onokej on akontin, niman xkoni on atl yejuan notlakeualuan kixtiaj.
10 Kemaj Rut onotlakuantelkets ixpan niman onopachoj hasta ipan tlajli para okititij ika kitlakaita. Niman kemaj okitlajtoltij Booz:
—¿Tline nopan titlacha niman tikpiya moyojlo sanoyej kuajli nouan, maski nejua xnichanej?
11 Booz okinankilij:
—Nikmatstikaj nochi on tlen kuajli otikchiu ipampa momonan desde ijkuak omik moueuentsin. Niman no nikmatstikaj ika otikinkau motajuan niman mopaís para otiuajlaj otichantiko touan maski xtitechixmatiya. 12 ¡Ma toTEKO mitstlaxtlauili! ¡Ma toTEKO iminDios on israelitas yejuan itech otiktejtemoj temanauilistli ma mitstiochiua ipampa nochi on tlen yotikchiu!
13 Kemaj Rut okinankilij:
—Tejua sanoyej kuajli tikpiya moyojlo nouan, niman motlajtol nechyolchikaua pampa yotinechnojnots ikan tetlajsojtlalistli* maski xnimosiuatekitkau.
14 Ijkuak oajsik para tlakuaskej, Booz okonnots Rut niman okijlij:
—Xuajla nikan. Xtilana pan niman xpatso ipan in vinagrejchilmojli.
Kemaj Rut onotlalij inuan itlakeualuan Booz niman okimakak cebada tliuaki. Rut otlakuaj hasta oixuik, niman sanken* onokau tlakuajli. 15 Kemaj ijkuak oksejpa okisentlalito cebada, Booz okinnauatij itlakeualuan:
—Xkauilikan no ma kisentlali on cebada ne kampa onkaj nemotlasalol, niman maka itlaj xkijlikan. 16 Niman xchiuakan para seki miyauatl ma uetsi para ma kipejpena. ¡Maka yakaj ma kajua!
17 Rut okisentlalij imiyauayo cebada hasta otlayouilij. Niman nochi on yejuan okisentlalij, ijkuak yokiteinij katka más de 20 kilos on cebada. 18 Kemaj okiktik on cebada ipan on ueyikalpan niman okititijtajsik imonan. Sakin okixtij on tlakuajli yejuan xokitlamij niman okimakak Noemí.
19 Kemaj imonan okitlajtoltij:
—¿Kanon otitekit aman, ika sanoyej miyek otiksentlalij in cebada? ¡ToTEKO ma kitiochiua yejuan sanoyej omitspaleuij!
Rut okitlajtlajtouilij imonan ika otekit ipan itlal sen tlakatl itoka Booz.
20 Niman Noemí okinankilij:
—¡Ma Dios kitiochiua! ¡Ma tikueyilikan toTEKO pampa kuajli tlen kichiua topampa no ijki ken achtoj okichiu inuan toueuentsitsiuan yejuan yomikkej! Booz sen tonisiufamilia, niman yejua semej on yejuan kitocaroua topan tlachas.
21 Rut oksejpa okijlij Noemí:
—No onechijlij sanken* ma nitekiti iminuan isiuatekitkauan hasta ma tlami pixkilistli.
22 Kemaj Noemí okinankilij isiuamon:
—Nokoneu, nikita kuajli tla timokaua iminiuan isiuatekitkauan, niman maka tias ipan okse tlajli, le yakaj mitspajsolos.
23 Ijki tej, Rut sanken* okisentlalij on cebada iminuan isiuatekitkauan Booz hasta ijkuak otlan kipixkaj on cebada niman on trigo. San chika yejua chantiya iuan imonan.