Rut 3

Rut okinextij iueuentsin

Se tonajli Noemí okijlij Rut:

—Nokoneu, noneki nimitstejtemouilis akinon iuan timonamiktis yejuan mitspaktis. 2 Xkita, on tlakatl Booz yejua ken tikitaj, yejuan iminuan otitekit isiuatekitkauan. In yeuajli, yejua yas ne kampa imijlaj niman konajanis on cebada. 3 Xchiua ken nimitsijlis. Xmalti, xmoajuiyali niman xtlali motlaken yejuan más kuajli, niman xuiya ompa. Pero maka tikmotitis tla yejua xe tlami tlakua niman tlaoni. 4 Xkita kuajli kanon notekas ijkuak kochis. Niman kemaj xuiya xkikxitsotsolo niman ompa xmoteka. Niman kemaj sano yejua mitsijlis tlinon tikchiuas.

5 Rut okinankilij:

—Nikchiuas nochi tlen yotikijtoj.

6 Rut oyaj mijlaj niman okichiu nochi tlen imonan okinauatij.

7 Booz otlakuaj, otlaonik niman nesiya ken sanoyej pakiya. Kemaj onotekak para kochis itech on cebada yejuan tepayolijtikatka. Sakin oajsik Rut yolik ochojcholojtiaj, kemaj okikxitsotsoloj niman ompa onotekak ikxitlan chika Booz kochiya. 8 Ijkuak kanaj tlajkoiuan, Booz otlachixteu, niman ijkuak onokuep, okimat ika sen siuatl onok ikxitlan.

9 Booz okitlajtoltij Rut:

—¿Akin tejua?

Niman Rut okinankilij:

—Nejua niRut, mosiuatekitkau. Tejua nisiu ken timitsitaj niman tejua timoneki nopan titlachas. Nejua nikneki nouan xmonamikti.

10 Booz okinankilij:

—¡Ma toTEKO mitstiochiua! Aman kuajli tikpanextia ika sanoyej otiktlakaitak moueuentsin. Tiueliskia tiktejtemoskia yakaj yejuan más konetl xken nejua, yejuan mayanki, noso yejuan tominpiya, pero xotikchiu. 11 Maka xmakajsi nokoneu on tlen kijtoskej nochanejkauan, pampa nochanejkauan nochimej kimatstokej ika tejua sanoyej tikuajli siuatl. Yejua ika, nikchiuas on tlen tinechtlajtlanilia. 12 On melauak, nisiu ken titotaj, pero nemi okse tlakatl yejuan más nisiu ken tikita yejuan noneki mopan tlachas. 13 Aman in yeuajli xmokaua nikan. Tla mostla on tlakatl kinekis kichiuas on tlen kitocaroua kichiuas iuan se yejuan ken kita, ma kichiua. Pero tla xkichiua, niktestigojtlalia toTEKO ika nejua nikchiuas. Aman, xkochi nikan hasta ma tlanesi.

14 Rut okoch ikxitlan Booz on tlayoua. Uajmostla onokuiteu saniman ijkuak xe tlanesiya, ijkuak sanken* tlayouatok katka, pampa Booz yokijtojka: "Maka yakaj kimatis ika in siuatl oualajka nikan mijlaj."

15 Kemaj Booz okijlij Rut:

—Xmokixtili mocapa niman kuajli xkitski.

Chika Rut kitskijtikatka icapa, Booz ipan okiten más de 40 kilos cebada. Kemaj okipaleuij para okimamaltij ikechpan, niman Rut oyaj ne ueyikalpan.

16 Ijkuak Rut oajsik ichan, imonan okitlajtoltij:

—Nokoneu, ¿Ken otikis iuan Booz?

Rut okitlajtlajtouilij nochi tlen Booz okichiu ipampa, 17 niman no okijlij:

—Onechmakak nochi in cebada niman onechijli: “Tejua xtajsis ichan momonan timapijpilkatiu.”

18 Kemaj Noemí okijtoj:

—Aman, nokoneu, xcha tlinon nochiuas. Booz xnoseuis hasta kaman kuajli tlamis on tlen noneki kichiuas.