Booz ononamiktij iuan Rut
4
Booz oyaj onotlalito kampa ikalakiyan on ueyikalpan, pampa ompa nosentlaliayaj on tlakamej. Kemaj okitak ompa panotiaya on tlakatl yejuan más nisiu ken kita Rut yejuan noneki ipan tlachas. Booz okonots, niman okijlij:—Xuajla nikan niman xmotlali.
Kemaj on tlakatl ouajlaj niman iminuan onotlalij. 2 Kemaj Booz okinots majtlaktli tekiuajkej ipan on ueyikalpan niman no okinmijlij ma notlalikan iuan. Ijkuak yonotlalijkej, 3 Booz okijlij on yejuan más nisiu ken kita Rut yejuan noneki ipan tlachas:
—Noemí, yejuan youajnokuepato ipan on tlajli Moab, kinamaka on tlajli yejuan iyaxka* katka Elimelec on yejuan ken tikitayaj. 4 Nikneki xmati tla saman tiknekis tikouas. Niman tla tikneki tikouas amantsin xkijto, imixpan in tojlanmej tlakamej niman imixpan in tekiuajkej. Pampa tejua más nisiu ken tikitaya Elimelec, tejua mitstocaroua tikouas itlal. Pero tla xtikouas, xnechijli aman, pampa kemaj sa nejua nechtocaroua nikouas.
On tlakatl okinankilij Booz:
—Kemaj, nejua nikouas.
5 Kemaj Booz okimelajkaijlij:
—Nikneki no xmati, pampa tla tikouas on itlal Noemí, ika onkaj no iuan timonamiktis Rut on kaualtsintli moabita, para ijki on tlajli sanken* onyas ikan itoka on mikatsintli.
6 Ijkuak on tlakatl yejuan noneki ipan tlachas Rut ijkin okak, okinankilij:
—Tla ijkon, nejua xnikneki nikouas on tlajli pampa uelis niknejnelos iminherencia nokoneuan. Pero tla tejua tikneki tikouas, xkoua. Nimitskauilia on tlakouajli yejuan nechmelauaya nejua.
7 (On tiempo ipan on país Israel ijkin nochiuaya: Ijkuak yakaj kitekauiliaya on tlen kitocaroua yejua kikouas pampa más nisiu kenteita, noso ijkuak itlaj kikouayaj noso kinamakayaj, on tlakatl yejuan kitekauiliaya iderechos, kinokixtiliaya sen ikak niman kimakaya on yejuan kauiliaya iderechos.) Ijkon ken nochiuaya ipan on tiempo, 8 on tlakatl yejuan ken kitaya Rut yejuan noneki ipan tlachas, okinokixtilij se ikak niman okimakak Booz, niman okijlij:
—Tejua xkoua on tlajli.
9 Kemaj Booz okinmijlij on tekiuajkej ipan on ueyikalpan niman nochimej yejuan yonosentlalijkaj ompa:
—Nochimej nemejuamej nentestigos ika nikouilia Noemí on tlajli yejuan iminyaxka katka Elimelec niman ikoneuan Quelión niman Mahlón. 10 No ijki nentestigos ika ninonamiktis iuan Rut on siuakaualtsintli moabita. Ijki, on tlajli sanken* iyaxka* yes Mahlón, on iueuentsin* Rut yejuan yomik. Ijki xpopoliuis itoka Mahlón itech ifamilia, nion xkelkauaskej ipan in ueyikalpan. Aman nemejuamej nentestigos.
11 On tekiuajkej ipan on ueyikalpan niman nochimej yejuan ompa nemiyaj otlanankilijkej:
—¡Kemaj, tejuamej titestigos! ¡ToTEKO ma kichiua para on siuatl yejuan kalakis mochan ma nochiua ken Raquel niman ken Lea, yejuan intech tiualejtokej tinochimej tejuamej yejuan tiisraelitas! Niman tejua xmochiua sen ueyixtikaj tlakatl ipan in ueyikalpan Belén. 12 ToTEKO ma mitsinmaka miyekej mokoneuan de in siuatl para nenkimpiyaskej miyekej nemouejkakoneuan ken okimpix Fares yejuan ikoneu katka Tamar iuan Judá.
13 Ijkon tej Booz ononamiktij iuan Rut. Kemaj ijkuak Booz iuan onotekak Rut, toTEKO okintiochiu, niman Rut okipix sen tlakakonetl.
14 Kemaj on siuamej kijliayaj Noemí:
—¡Ma tikueyilikan toTEKO ika aman yomitsmakak sen moxuiu yejuan mopan tlachas! ¡Moxuiu, ma nochiua sen ueyixtikaj tlakatl ipan in tlajli Israel! 15 Yejua mitsyoleuas niman mitstekipanos ijkuak ye tilamajtsin yes, pampa yejua ikoneu mosiuamon, yejuan sanoyej mitstlajsojtla, niman para tejua, on mosiuamon, más ueyi kijtosneki xken chikome motelpochuan yeskia.
16 Noemí okinapaloj on konetsintli niman okiskaltij ken yejua ikoneu yeskia. 17 Ijkuak okitakej isiuanisiuchanejkauan, okijtojkej:
—¡Tlakaj yotlakat sen ikoneu Noemí!
Niman okitokayotijkej Obed. Obed onochiu tajtli de Isaí, niman David onochiu teixuiu* itech Obed.
Iuejkatajuan David
18 In yejuamej katkaj iuejkakoneuan Fares: Fares tajtli katka de Hezrón, 19 Hezrón tajtli katka de Ram, Ram tajtli katka de Aminadab, 20 Aminadab tajtli katka de Naasón, 21 Naasón tajtli katka de Salmón, Salmón tajtli katka de Booz, Booz tajtli katka de Obed, 22 Obed tajtli katka de Isaí, niman Isaí tajtli katka de David.