Jueces
Itribu Juda okitlan on rey Adonisedec
1
Ijkuak yomik Josué, on israelitas okitlajtoltijkej ToTEKO para kimatiskej katlejua tribu* achtoj yas kominuijsokis on cananeos. 2 ToTEKO okiminnankilij: “Achtoj yaskej ontlauijsokiskej itribu* Judá niman nikimpaleuis ma kitekuilikan on ueyitlalpan yejuan yonikinmakak.” 3 Kemaj on tlakamej ipan itribu* Judá okinotskej itribu* Simeón niman ijkin okijlijkej: “Xuiyan touan tikominuijsokij on cananeos para tikinkuiliskej on ueyitlalpan yejuan ye toyaxka, niman ijkuak nemejuamej nemontlauijsokiskej para nenkitekuiliskej nemoueyitlalpan, tejuamej no tiaskej nemoua.”Niman itribu* Simeón okinekkej oyajkej iuan itribu* Judá. 4 ToTEKO okichiu para itribu* Judá ma kinnoyaxkatikan inueyitlalpan on cananeos niman on ferezeos, yejuan ToTEKO okintemaktilij itech Judá. San ne Bezec okimiktijkej 10 mil tlakamej. 5 Ompa teuan nemiya Adonisedec, 6 pero yejua ocholojteu. Yejuamej okitojtokakej, niman ijkuak okajsitoj, okitekilijkej imajpiluan tomajkej niman ikxipiluan tomajkej. 7 Kemaj Adonisedec okijtoj: “Achtoj, nejua 70 reyes oninkintejtekilij inmajpiluan tomajkej niman inmikxipiluan tomajkej, niman onikinchiualtij ma kipejpenakan notentlakauil yejuan xiniya ipan nomesa. Pero aman Dios nechkuepiltia tlen onikinchiuilij on reyes.”
Kemaj okuikakej ipan on ueyikalpan Jerusalén niman ompa omik.
Itribu* Judá okitlankej on ueyikalpan Jerusalén niman on ueyikalpan Hebrón
8 Itribu* Judá otlauijsokitoj ipan on ueyikalpan Jerusalén niman okinoyaxkatijkej. Ijkuak yokinmiktijkej ikan espada nochimej on yejuan ompa chantiyaj, okitlatijkej on ueyikalpan. 9 Kemaj okinuijsokitoj on cananeos yejuan chantiyaj ipan on tepemej, ipan on región Néguev, niman ipan on ixtlauatl. 10 Niman no okinuijsokitoj on oksekimej cananeos yejuan chantiyaj ipan on ueyikalpan Hebrón, yejuan achtoj itoka katka Quiriat-arba. Ompa okintlankej iminuejkakoneuan Sesai, Ahimán niman Talmai.
Otoniel okitlan on ueyikalpan Debir
(Jos. 15.15-19)
11 Kemaj okuijsokitoj on ueyikalpan Debir yejuan achtoj kitokayotiayaj Quiriat-sefer. 12 Pero achtoj Caleb okiprometeroj ika san akinon yejuan kitlanis on ueyikalpan Debir, kimakas Acsa, on ichpoch para iuan nonamiktis. 13 Otoniel yejua okitlan on ueyikalpan Debir. Otoniel itelpoch katka Cenaz, niman Cenaz ikniu katka Caleb yejuan más konetl. Kemaj Caleb okimakak Otoniel, Acsa on ichpoch, para okinonamiktij. 14 Ipan on tonajli ijkuak Otoniel ononamiktij iuan Acsa, Otoniel okitlajtlanilij Acsa ma kitlajtlanili itataj sen tlajli. Acsa oyaj para okinotsato itataj, niman ijkuak otemok ipan ipoloko*, Caleb okitlajtoltij:
—¿Tlinon tikneki?
15 Kemaj Acsa okinankilij itataj:
—Nikneki itlaj nimitstlajtlanilis. Tejua yotinechmakak on tlaljli ipan on xalpatlajkan Néguev. Aman no xnechinmaka tlaltin kampa onkaj ameltin.
Kemaj Caleb okimakak on ameltin yejuan onkatkaj kampaka tlakpakopa niman yejuan onkatkaj tlatsintlankopa de on ueyikalpan Hebrón.
On uejueyitlalpanmej yejuan okitlankej itribu* Judá niman itribu* Benjamín
16 Iuejkakoneuan Hobab (on tlakatl quenita) yejuan imontaj katka Moisés, okiskej ipan on ueyikalpan yejuan kipiya palmeras itoka Jericó, iuan itribu* Judá, niman oyajkej ipan ixalpatlajkan Judá kampa itoka Néguev, kampaka sur de Arad. Ompa onochantijkej iminuan on tlakamej yejuan ompa chantiyaj ipan on región. 17 Kemaj itribu* Judá oyajkej iuan itribu* Simeón niman okinuijsokitoj on cananeos yejuan chantiyaj ipan on ueyikalpan Sefat. Niman nochi otlan kixoxotoniaj on ueyikalpan. Yejua ika on kalpan okitokayotijkej Hormaa. 18 Maski ijkon onochiu, itribu* Judá xouel okintlankej on ueyikalpanmej Gaza, Ascalón, Ecrón nochi inuan inueyitlalpanuanb. 19 Niman maski toTEKO iuan nemiya itribu* Judá, niman ouel okinoyaxkatijkej on tepemej, xouel okinkixtijkej on tlakamej yejuan chantiyaj ipan on ixtlauatl, pampa kipiyayaj on carretas de tepostli para guerra. 20 Caleb okimakakej on ueyikalpan Hebrón ijkon ken Moisés okiprometerouilijka, niman Caleb okinkixtij inuejkakoneuan on yeyimej itelpochuan Anac. 21 Pero itribu* Benjamín xouel okinkixtijkej on Jebuseos yejuan chantiyaj Jerusalén. Yejua ika, hasta aman on jebuseos niman itribu* Benjamín sanken* chantij san sekan ne Jerusalén.
Itribu* José kinoyaxkatiaj on ueyikalpan Betel
22-23 On yejuan itribu* José (Efraín niman Manasés) okuisokitoj on ueyikalpan Betel yejuan achtoj itoka katka Luz. ToTEKO kimpaleuiyaya. Niman okintitlankej tlakamej yejuan oichtakatlajtlachatoj ipan on ueyikalpan Betel. 24 On tlakamej yejuan oichtakatlajtlachatoj okitakej sen tlakatl yejuan okisako ipan on ueyikalpan, niman okijlijkej: “Tla titechititis kenijki tikalakiskej ipan on ueyikalpan, temechikneliskej niman xtemechmiktiskej tejua niman mofamilia." 25 On tlakatl okintitij kenijki kalakiskej ipan on ueyikalpan, niman yejuamej okinmiktijkej ikan espada nochimej on yejuan ompa chantiyaj. Pero on tlakatl yejuan okintitij kenijki kalakiskej ipan on ueyikalpan xokimiktijkej nion ifamilia. 26 Kemaj on tlakatl oyaj ipan imintlal on hititas, niman ompa okipeualtij sen yenkuik ueyikalpan yejuan okitokayotij Luz, niman hasta aman ijki itoka.
Itlalnamikiyan on tlaltin yejuan okinoyaxkatijkej itribu* Manasés niman itribu* Efraín
27 No ijki, itribu* Manasés xouel okinkixtijkej on cananeos yejuan chantiyaj ipan on uejueyikalpanmej Bet-seán, Taanac, Dor, Ibleam, Meguido niman on kalpanmej pipitikej yejuan onkatkaj iyeualkan on uejueyikalpanmej. Yejua ika on cananeos sanken* chantiyaj ipan on uejueyikalpanmej. 28 Sakin ijkuak on israelitas más omiyekiyakej, okinchiualtijkej on cananeos ma tekitikan ken esclavos, pero xouelkej okinkixtijkej.
29 No ijki, itribu* Efraín xouelkej okinkixtijkej on cananeos yejuan chantiyaj ipan on ueyikalpan Gezer. Yejua ika, on cananeos onokajkej ompa inmiuan.
30 Itribu* Zabulón no xouel okinkixtijkej on cananeos yejuan chantiyaj ipan on ueyikalpan Quitrón, niman ipan on ueyikalpan Naalal. Yejua ika, on cananeos ompa onokajkej inmiuan, pero on israelitas okinchiualtijkej on cananeos ma tekitikan ken esclavos.
31 No ijki itribu* Aser xouel okinkixtijkej on cananeos yejuan chantiyaj ipan on uejueyikalpanmej Aco, Sidón, Ahlab, Aczib, Helba, Afec niman Rehob. 32 Yejua ika, on cananeos sanken* ochantijkej iuan itribu* Aser.
33 Itribu* Neftalí no xouel okinkixtijkej on cananeos yejuan chantiyaj ipan on ueyikalpanmej Bet-semes niman Bet-anat. Yejua ika, on cananeos sanken* ochantikej iuan itribu* Neftalí, pero on israelitas okinchiualtijkej ma tekitikan ken esclavos.
34 On amorreos okintotokakej itribu* Dan ipan on tepeyoj niman xokinkauilijkej ma temokan ipan on ixtlauatl. 35 Niman ijki tej, on amorreos sanken* ochantikej ipan on tepemej Heres, on kalpan Ayalón niman on kalpan pitentsin Saalbim. Pero ijkuak iuejkakoneuan José opeu nokojtiliaj, okinchiualtijkej on amorreos ma tekitikan ken esclavos.
36 Inueyitlalpan on edomitas pejtoya kampaka itlaixko Acrabim niman ajsiya hasta on ueyikalpan Sela niman yaya tlakpakopa.