Josué
ToTEKO kinauatia Josué ma kitlani Caanán
1
Sakin, ijkuak Moisés itekitkau toTEKO yomik, toTEKO okinots Josué ikoneu Nun yejuan itekitkau katka Moisés, niman okijlij: 2 "Notekitkau Moisés yomik. Yejua ika, aman tejua tikinyekanas on israelitas para nenkipanoskej on ueyi río Jordán para nenkalakiskej ipan on tlajli yejuan nemechmakas. 3 Ijkon ken onikprometerouilij Moisés, nochi tlajli yejuan nenkicholoskej nejua nemechmakas. 4 Nemoueyitlalpan peuas desde on xalpatlajkan niman on tepetl Líbano hasta on ueyi río Éufrates ne kampaka ikisayan tonaltsintli. Niman panos imanian inueyitlalpan on hititas hasta on mar Meditarráneo kampaka ikalakiyan tonaltsintli. 5 Xkaman yakaj uelis mitstlanis ipan nochi monemilis. Nejua nochipa ninemis mouan ken ninemiya iuan Moisés. Xkaman nimitskauas, nion nimitstlalkauis. 6 Xmokojtili niman xmoyolchikaua, pampa tejua tikinyekanas in israelitas para kinoyaxkatiskej on tlajli yejuan onikintlajtolmakak ika notokatsin nikinmakas inachtojtajuan. 7 Xmokojtili, niman xmoyolchikaua. Xtlakamati nochi noley yejuan omitsmakak notekitkau Moisés. Maka tiktlalkauis on ley nion achijtsin. Tla tiktlakamati nochi notlanauatiluan, tla ijkon, nochi tlen tikchiuas kuajli kisas. 8 Nochipa xmomachti in amamoxtli* yejuan kipiya noleyes. Xkixtlalo ipan tonajli niman ipan yejuajli para uelis tikchiuas nochi tlen kijtoua. Ijki, nochi tlen tikchiuas kuajli kisas. 9 Nejua nimitsnauatia xmokojtili niman xmoyolchikaua. Maka xmomojti, nion maka xmoyolmajxalo, pampa nejua nimoTEKO Dios, ninemis mouan nochiuiyan kampaka tias."
Josué onotlatlajtlalilijkej para okinoyaxkatitoj on tlajli
10 Kemaj Josué ijkin okinnauatij nochimej on tlayekankej intech on israelitas: 11 "Xuiyan ipan nochi on campamento niman xkinnauatikan nochimej ma kitlalikan tlakuajli, pampa ipan yeyi tonajli tikpanoskej on río Jordán para tikontoyaxkatiskej on tlajli yejuan toTEKO Dios techmakas."
12 No ijki Josué okinots itribu* Rubén, itribu* Gad niman on itlajkotribu* Manasés, niman okinmijlij:
13 —Xkelnamikakan on tlen omechnauatij Moisés, itekitkau toTEKO ijkuak omechijlij ika nemoTEKO Dios mechmakas in tlajli ipan in lado de in río Jordán para nikan uelis nemoseuiskej. 14 Nikan nenkinkajteuaskej nemosiuauan, nemokoneuan niman nemoyolkauan, pero nochimej nemosoldados noneki panoskej in río Jordán ika intepos para tlauijsokiskej. Yejuamej tlayekanaskej niman kimpaleuiskej imikniuan para kinoyaxkatiskej on tlajli de Canaán, 15 hasta kaman nemoTEKO Dios kinmakas yejuamej on tlajli kampa ueliskej chantiskej. Kemaj nemejuamej uelis nenmokuepaskej ipan nemotlal ipan in lado de in río Jordán kampaka ikisayan tonaltsintli niman para nochipa nemoyaxka* yes in tlajli yejuan omechmakak Moisés, itekitkau Dios.
16 Niman yejuamej ijkin otlanankilijkej:
—Tikchiuaskej nochi tlen yotitechnauatij, niman tiaskej san kanon titechtitlanis. 17 Nochipa timitstlakamatiskej ken otiktlakamatkej Moisés. San tiknekij moTEKO Dios mouan ma nemi ken nemiya iuan Moisés. 18 San akinon yejuan xipan kitas motlajtol noso xkichiuas on tlen titlanauatia, ika onkaj mikis. Tejuamej san timitsijliaj xmokojtili niman xmoyolchikaua.