Deuteronomio
Moisés kinmelnamikiltia on israelitas itlajtolmakalis toTEKO
1
In yejua on tlajtoltin yejuan Moisés okinmijlij on israelitas ijkuak nemiyaj ipan on xalpatlajkan,
kampaka ikisayan tonaltsintli de on río Jordán.
Yejuamej chantiyaj ipan on ixtlauatl yejuan itoka Arabá,
nisiu ixpan on kalpan Suf.
Iyeualkan on kalpan onkatkaj on kalpanmej Parán,
Tofel,
Labán,
Hazerot niman Dizahab.
2 Tla yakaj komelauaskia ipan on ojtli yejuan yau on tepetl Seir,
san nonekiskia matlaktli uan se tonajli para nejnemiskia de Sinaí hasta Cades Barnea.
3 Ipan on achtoj tonajli de on majtlaktli uan se metstli ipan on xipan 40,
Moisés okinmijlij on israelitas nochi in tlajtlamach* yejuan toTEKO okinauatij para yejuamej ma kichiuakan.
4 In onochiu,
sakin* ijkuak Moisés yokitlan Sehón,
inrey on amorreos yejuan chantiyaj ipan on tlajli Hesbón,
niman Og,
irey Basán yejuan chantiya ipan on tlajli Astarot nisiu Edrei.
5 Ijkuak nemiyaj kampaka ikisayan tonaltsintli de on río Jordán ipan on país Moab,
Moisés opeu kinmaka on israelitas in tlanauatiltin:
6 “ToTEKO Dios ijkin otechijlij itech on tepetl Sinaí:
‘Nemejuamej sanoyej yonenuejkajkej nikan itech in tepetl.
7 Xkuiteuakan nochi tlen nenkipiyaj niman xuiyan impan intepeuan on amorreos,
niman impan nochimej on regiones yejuan onokej nisiu:
ipan on tlajli Arabá,
ipan on región kampa tepeyoj,
ipan on ixtlauatl,
ipan on tlajli Néguev itempan on mar,
ipan impaís on cananeos,
niman ipan on tlajli Líbano,
hasta itech on ueyi río Éufrates.
8 Xkitakan,
nejua yonemechmaktilij on tlajli.
Xuiyan niman xmoyaxkatikan nochi on tlajli yejuan nejua,
nemoTEKO,
oninotlajtolmakak ika nikinmakas nemoachtojtajuan Abraham,
Isaac niman Jacob niman inuejkakoneuan.’
Moisés okintlalij jueces
9 ’Ipan on tonajli nejua onemechijlij:
‘Noselti xuelis nemechyekanas nemochimej*.
10 ToTEKO Dios sanoyej yomechmiyekilij,
niman aman sanoyej nenmiyekej ken on sitlalimej yejuan onokej ipan cielo.’
11 No onemechijlij:
‘¡ToTEKO Dios yejuan nemouejkatajuan okixmatkej,
ma mechmiyekili okse se mil ichkich más xken aman nennemij,
niman ma mechtiochiua ken yomechprometerouilij!”
12 Nejua noselti xniuelis nemechpaleuis nochi ika on nemopajsolouilis,
niman nemotlauijsokilis.
13 Yejua ika,
xkintlapejpenikan on tlakamej de cada tribu* yejuan tlamatkej*,
tlakasikamatkej,
niman tlaixmatkej,
para nejua nikintlalis ken nemotlayekankauan.’
14 ’Niman nemejuamej onenkijtojkej:
‘Kuajli on tlen tikijtoua.’
15 ’Kemaj onikinkixtij ipan cada se nemotribu* on tlakamej yejuan más tlamatkej* niman ixtlamatkej*,
niman onikintlalij para mechyekanaskej.
Sekimej onikintlalij para ma kinyekanakan se mil tlakamej,
sekimej 100 tlakamej,
sekimej 50 tlakamej niman sekimej majtlaktli tlakamej.
Niman oksekimej onikintlalij tlayekankej ipan cada nemotribus.
16 No ijki,
ijkin onikinnauatij on jueces:
‘Xkakikan iminpajsolouilis on tlakamej,
niman xtetlatlakolmakakan melajki sanken* inuan nemochanejkauan niman inuan on yejuan xchanejkej.
17 Maka nenkinchikoitaskej on tlakamej ijkuak nenkichiuaskej tekiuajyotl.
Sa no ijki xkintakan on yejuan ricos niman on yejuan mayankej.
Maka xmakajsikan yakaj tlakatl,
pampa nemotlayekanalis ualeua itech toTEKO Dios.
Niman tla onkaj itlaj yejuan más ouijtikaj*,
on xnechkauilikan nejua nikchiuas.’
18 ’Ipan on tonajli onemechmakak tlajtlamach* tlanauatiltin de nochi yejuan nonekiya nenkichiuaskej.
On majtlaktli uan ome tlakamej oichtakatlajtlachatoj ipan on tlajli Cannán
19 ’Ijkuak otikiskej itech on tepetl Sinaía,
otiajkej ipan on tepemej iminyaxkauan on amorreos,
ijkon ken toTEKO Dios otechnauatij.
Otiknejnenkej nochi on xalpatlajkan yejuan sanoyej ueyi niman sanoyej temojtij yejuan nemejuamej onenkitakej,
hasta otajsikej ipan on tlajli Cades-barnea.
20 Ompa onemechijlij:
‘Yotejkokej ipan imintlal on amorreos yejuan toTEKO Dios techmaka.
21 Xkitakan,
nemoTEKO Dios mechmaktilia in tlajli.
Yejua ika,
xtlejkokan niman xmoyaxkatikan ken yokijtoj toTEKO,
iminDios nemoachtojtajuan.
Maka xmomojtikan,
nion maka xmoyolmajxalokan.’
22 ’Pero nemejuamej onennechijlijkej para achtoj ma tikintitlanikan sekimej tlakamej,
niman ma ichtakatlajtlachatij ipan on tlajli,
para ijkon techmachistiskej katlejua ojtli tikajsiskej,
niman katlejua kalpanmej iminpan tikalakiskej.
23 Nejua onikuelkak on tlen nemejuamej onenkijtojkej,
niman kemaj onikintlapejpenij majtlaktli uan ome tlakamej,
se tlakatl de cada tribu.
24 Yejuamej oyajkej niman otlejkokej ipan on tepemej.
Kemaj oajsikej ipan on ixtlauatl itoka Escol.
Niman oichtakatlajtlachatoj ipan nochi on región.
25 Sakin,
okuajkikej keski tlakyotl yejuan onkatka ipan on tlajli,
niman otechajkuilijkej.
Niman ijkin otechijlijkej:
‘On tlajli yejuan toTEKO Dios techmakas sanoyej kuajli.’
26 Pero nemejuamej xonenkinekej onenyajkej,
yej xonenkitlakamatkej on tlanauatijli yejuan toTEKO Dios omechmakak.
27 Niman ipan nemochan opeu tlamach nenkijtouaj niman ijkin onenkijtojkej:
‘ToTEKO techtlauelita.
Otechkixtij Egipto para techtemaktilis intech on amorreos para ma techmiktikan.
28 Niman aman ¿Kanon tiaskej?
On yejuan oichtakatlajtlachatoj kijtouaj ika ompa nemij tlakamej más kojtijkej xken tejuamej.
Yejuamej sanoyej uejueyitlakamej niman kipiyaj inkalpanuan sanoyej uejueyimej niman kuajli yeualtsakutokej ikan tepantli yejuan ajsitokej hasta ipan cielo.
Niman ompa okintakej iuejkakoneuan Anac,
on tlakamej yejuan sanoyej uejueyitlakamej.
Nochi ika yejua in xok titoyoleuaj tiaskej.’
29 Kemaj nejua onemechijlij:
‘Maka xmomojtikan niman maka xkinmakajsikan.
30 NemoTEKO Dios yas nemoyakapan,
niman yejua teuijsokis nemopampa,
niman kichiuas tlajtlamach* ken onenkitakej okichiu ipan on tlajli Egipto,
31 niman ipan on xalpatlajkan.
NemoTEKO Dios omechajuikak ipan imauan hasta nikan kampa yonemejkokej,
ken sen tajtli yejuan kinapalojtiu ikoneu.’
32 Pero maski ijkon onemechijlij,
xonenkineltokakej toTEKO Dios,
33 yejuan mechyekantiaya para kitlapejpenijtiaya kampa nonekiya nemochantiskej.
Ipan yeuajli mechyekanaya ikan sen tlimilinajli ipan ojtli yejuan nonekiya nenkitokaskej,
niman ipan tonajli mechyekanaya ika sen moxtli mimiltik.
ToTEKO okualan intechkopa on israelitas
34 ’Ijkuak toTEKO okak ken tlamach onenkijtojkej sanoyej okualan niman ijkin onotlajtolmakak ika itokatsin:
35 ’Nion se yejuan xkuakualtin tlakamej yejuan nemiyaj ipan on tonaltin,
xuelis kitas on kuajli tlajli yejuan onikimprometerouilij nikinmakas inuejkatajuan.
36 San uelis kitas Caleb,
ikoneu Jefone.
Yejua niman iuejkakoneuan nikinmakas on tlajli kampa okixmatitoj pampa onechtlakamat nejua iTEKO ika nochi iyojlo.’
37 ’Niman nemopampa,
toTEKO no okualan nouan,
niman onechijlij:
‘Tejua no xtikalakis ipan on tlajli.
38 Yej,
kalakis on motlapaleuijkau Josué,
itelpoch Nun.
Xyolchikau tej,
pampa yejua kinyekanas on israelitas para kalakiskej ipan on tlajli niman kinoyaxkatiskej.’
39 Niman maski nemejuamej nenkinemiliayaj ika nemotlauelikniuan mechkuiliskiaj nemokoneuan yejuan pipitikej,
yej yejuamej kalakiskej ipan on tlajli.
Nikinmakas yejuamej para iminyaxka yes.
40 Pero aman,
nemejuamej xmokuepakan ipan on xalpatlajkan.
Xuiyan oksejpa itech on Mar Rojo.
On israelitas okintlankej
41 ’Kemaj nemejuamej onennechnankilijkej:
‘Yotitlajtlakojkej ixpan toTEKO.
Pero aman tiaskej,
tontlauijsokiskej ken toTEKO Dios yotechnauatij.’
Niman nemejuamej onenkuikej nemotepos.
Nenkinemiliayaj xouij nentlejkoskiaj ipan on tepetl niman nenkalakiskiaj ipan imintlajli on amorreos.
42 Pero toTEKO onechijlij para ma nemechijli:
‘Maka xtlauijsokitij.
Maka xmoteyokolikan para ma mechtlanikan nemotlauelikniuan,
pampa nejua xnias nemouan niman nemotlauelikniuan mechtlaniskej.’
43 Nejua onemechijlij tlinon nemopan nochiuaskia,
pero nemejuamej xonenkinekkej onennechkakkej.
Xonenkitlakamatkej itlanauatil toTEKO,
niman ika nemoueyimatilis onentlejkokej ipan on tepemej.
44 Kemaj on amorreos,
yejuan chantiyaj ipan on tepemej,
omechixnamikikoj.
Yejuamej omechixnamikikoj ken chilpamej,
omechtlankej niman omechajtotokakej,
desde Seir hasta Horma.
45 Ijkuak nemejuamej onenuajmokuepatoj,
onenchokakej ixpan toTEKO,
pero yejua xokak nemochokilis niman xomechpaleuij.
46 Yejua ika,
nemejuamej sanoyej ouejkau onenchantikej ipan on región de Cades.