Iminherencia on siuamej
36
On tlayekankej ipan on familias yejuan kisaj itech iclanes Galaad yejuan itelpoch Maquir,
ixuiu Manasés niman ika okpa ixuiu José,
okitatoj Moisés iminuan on oksekimej intlayekankauan on israelitas.
Niman ijkin okinmijlijkej:
2 —ToTEKO otlanauatij ika tejua Moisés tikxelos on tlajli ikan suertes para tikinmakas on israelitas.
Niman no omitsnauatij ika on tlajli yejuan kitocarouaya tokniu Zelofehad ijkuak mikis xkinmaka ichpochuan.
3 Pero tla yejuamej nonamiktiskej iuan tlakamej de okse tribu* israelita,
on tlajli yejuan kiseliskej,
xok iyaxka* yes totribu,
yej panos intech on sekimej iuejkakoneuan yejuan inuan nonamiktiskej.
Tla ijkon nochiuas,
techkuilijtiaskej totlal yejuan techmakaskej.
4 Kemaj ijkuak yejkos on xipan de tlamakaualistli intech on israelitas,
on tlajli yejuan inyaxka on siuamej xok toyaxka yes,
niman itech nokauas on okse tribu* kampa kisaj on tlakamej yejuan inuan nonamiktiskej.
5 Kemaj Moisés okinmijlij on israelitas in tlanauatiltin yejuan toTEKO okinauatij:
—On tlakamej de itribu* José kuajli tlen kijtouaj.
6 ToTEKO kinkauilis ichpochuan Zelofehad ma nonamiktikan san akinon iuan kinekiskej,
tla iminueuentsitsiuan no kisaskej ipan on itribu* Manasés ken yejuamej.
7 On tlajli yejuan cada israelita yokitocaroj xuelis panos ipan okse tribu.
Ijkon nochiuas pampa nochimej on israelitas noneki nochipa kipiyaskej on tlajli yejuan itribu* okiselij.
8 Tla sen siuatl kiselia sen tlajli,
ika onkaj nonamiktis iuan sen tlakatl yejuan kisa sa no ipan itribu.
Niman ijkon cada israelita uelis ika nokauas on herencia yejuan okiselij de itajuan.
9 Nion se tlajli yejuan kiseliaj ken herencia xpanos ipan okse tribu.
Niman cada tribu* intech on israelitas nochipa kipiyas on tlajli yejuan okiselij ken herencia.
10 Yejua ika,
ichpochuan Zelofehad okichijkej nochi on tlen toTEKO okinauatij Moisés.
11 Maala,
Tirsa,
Hogla,
Milca niman Noa,
ichpochuan Zelofehad,
ononamiktijkej iuan imimprimos yejuan tekoneuan itech imintiojuan on yejuan ikniuan imintataj.
12 Ijkon tej,
iminueuentsitsiuan kisayaj ipan itribu* Manasés yejuan katka ikoneu José.
Yejua ika,
on tlajli yejuan okiselijkej onokau ipan itribu* Manasés ken kitocaroua.
13 In yejua tlanauatiltin niman tlamachtiltin yejuan toTEKO okinmakak on israelitas itechkopa Moisés ne ipan on ixtlauatl Moab,
nisiu itech on río Jordán,
ixpan on ueyikalpan Jericó.