Iminherencia on levitas
35
ToTEKO okinots Moisés ipan on ixtlauatl Moab itech on río Jordán yejuan onkaj ixpan on ueyikalpan Jericó,
niman okijlij:
2 “Xkinnauati on israelitas ika itech on inueyitlalpan yejuan kiseliskej,
ompa kixtiskej seki uejueyikalpanmej para kinmakaskej on levitas,
para ompa chantiskej.
Niman no kinkauiliskej tlajli kampa kiminyeualtsakuaskej iminyolkauan inyeualkan on uejueyikalpanmej para ompa tlatlakuajkualtiskej.
3 Ijkon on levitas kipiyaskej kampa chantiskej,
niman kipiyaskej kampa kiminyeualtsakuaskej iminuakaxuan niman okseki inyolkauan.
4 On kampa kiminyeualtsakuaskej iminyolkauan nenkinmakaskej 450 metros de itech on tepantli yejuan kiyeualojtok cada ueyikalpan.
5 Kampa kimintlakuajkualtiskej iminyolkauan cuadrado yes,
niman kipiyas 900 metros ipan cada lado.
In kijtosneki,
sano ichkich yes kampaka ikisayan tonaltsintli,
niman kampaka ikalakiyan tonaltsintli,
kampaka norte,
niman kampaka sur.
Ijkon on kampa kimintlakuajkualtiskej iminyolkauan kiyeualojtos on ueyikalpan.
6 ’De on uejueyikalpanmej yejuan nenkinmakaskej on levitas,
chikuasen yeskej kampa nomanauilos.
Ompa uelis niyanas yakaj yejuan temiktia.
Aparte de in chikuasen uejueyikalpanmej,
nenkinmakaskej okse 42 uejueyikalpanmej.
7 Nochi kech nenkinmakaskej on levitas 48 uejueyikalpanmej,
cada se kipiyas on kampa kiminyeualtsakuaskej iminyolkauan.
8 Sen tribu* yejuan ueyi,
kimakaskej más miyek uejueyikalpanmej para on levitas,
niman sen tribu* yejuan xueyi,
kimakaskej xmiyek uejueyikalpanmej para on levitas.”
On uejueyikalpanmej kampa nomaniuilos
9 Niman toTEKO okijlij Moisés:
10 “Ijkin xkinmijli on israelitas:
‘Ijkuak kipanoskej on río Jordán para kalakiskej ipan on tlajli Canaán,
11 noneki kitlapejpeniskej keski uejueyikalpanmej yejuan imintoka yes ‘Nomanauiloyan’,
kampa sen tlakatl uelis nomanauis yejuan xsan teyokolis temiktis.
12 Niman ompa xuelis itlaj kichiuilis on yejuan ken kita on mikatsintli tla yejua kinekis kuepiltis tlen okichiu.
Ijkon on temiktijketl xuelis kimiktiskej ijkuak xe kiyolkuitiaj on jueces imixpan on israelitas.
13 De on uejueyikalpanmej yejuan notemakaskej,
chikuasen yes para kampa uelis nomanauilos.
14 Yeyi ueyikalpan onyas ipan on lado de on río Jordán kampaka ikisayan tonaltsintli,
niman on okse yeyi onyas ne Canaán.
15 In chikuasen uejueyikalpanmej yeskej para kampa uelis niyanaskej para nomanauiskej nochimej yejuan israelitas,
niman para on yejuan xchanejkej yejuan chantij nemouan noso yejuan nemiskej san keski tonajli nemouan.
Ompa uelis niyanaskej nochimej yejuan xsan teyokoliaj temiktiaj.
16-19 ’Tla yakaj kimailia sen tlakatl ikan itlaj tepostli,
noso tetl,
noso kojtli,
niman on yejuan okimailijkej omik,
tla ijkon,
on tlakatl yejuan otemailij nochiuas sen temiktijketl,
niman ika onkaj nenkimiktiskej.
20 ’Tla yakaj kimapeua sen tlakatl pampa sanoyej kitlauelita,
noso kimotla itlaj ika para ma nokoko,
21 noso kimajmailia ika matli niman on yejuan okimajmailijkej miki,
tla ijkon,
on yejuan otekokoj ika onkaj kimikiskej pampa onochiu sen temiktijketl.
On yejuan más nisiu ken kita on mikatsintli noneki kimiktis on temiktijketl ijkuak kinextis.
22 ’Pero san ma tikonijtokan ika yakaj kimapeua sen tlakatl niman xsan kineki,
noso tla kuatemotla itlaj ika,
maski xkinekiya ijkon kichiuiulis.
23 Noso san ma tikonijtokan ika xokitak ijkuak okontlajkal sen tetl yejuan uelis temiktis,
niman on tetl ouets ipan on tlakatl niman kimiktia,
maski on tlakatl xkitlauelitaya niman xkinekiya kimiktis.
24 Tla ijkon,
on israelitas yejuan kiyolkuitiskej on yejuan otemiktij,
kisepanitaskej on tlen kijtoua on tlanauatijli,
niman kenijki uelis kimanauiskej on temiktijketl itech on yejuan ken kita on mikatsintli yejuan kimiktisnekis.
25 On israelitas noneki kimanauiskej on temiktijketl itech on yejuan ken kita on mikatsintli yejuan kineki kimiktis.
Noneki oksejpa kititlaniskej ipan on ueyikalpan nomanauiloyan kampa onomanauitoya.
On yejuan otemiktij noneki nokauas ipan on ueyikalpan nomanauiloyan hasta mikis on ueyi tlayekanki tiopixki.
26 Pero tla on tlakatl yejuan temiktia kisa ipan on ueyikalpan kampa nomanauiloyan,
27 on yejuan ken kita on mikatsintli xkipiyas tlajtlakojli tla kinextia niman kimiktia.
28 On yejuan otemiktij noneki nemis ipan on ueyikalpan nomanauiloyan hasta mikis on ueyi tlayekanki tiopixki.
Sakin,
uelis nokuepas ipan itlal.
29 ’In tlanauatiltin yeskej para nemejuamej sen ley yejuan nochipa onyas para nochimej on tatajtin niman para iminuejkakoneuan yejuan tlakatitiaskej,
san kanon kampa nemejuamej nenchantiskej.
Leyes para kenijki yakaj kimanauiskej noso kimiktiskej
30 ’Tla sen tlakatl otemiktij,
san uelis kimiktiskej tla nemij omemej noso más testigos,
yejuan kijtoskej ika okitakej ken onochiu.
Pero tla san se testigo nemi yejuan okitak ken onochiu,
xuelis nenkimiktiskej on temiktijketl.
31 ’Xuelis nenkiseliskej itomin sen tlakatl yejuan otemiktij para nomanauis.
On tlakatl,
ika onkaj mikis.
32 ’No ijki,
xuelis nenkiseliskej itomin on temiktijketl yejuan nemi ipan on ueyikalpan kampa nomanauiloyan para nenkauiliskej ma nokuepa ichan ijkuak xe miki on ueyi tlayekanki tiopixki.
33 ’Maka nenkijtlakoskej ikan temiktilistli on tlajli kampa nenchantiskej,
pampa on temiktilistli kijtlakoua on tlajli.
Niman xonkaj chipaualistli ipan on tlajli tla xkimiktiaj on temiktijketl’
34 ’Maka nenkijtlakoskej on tlajli kampa nenchantiskej niman kampa nejua no nichantis,
pampa nejua nemoTEKO ninemi nemouan.”