Kalpanmej yejuan intoka Nomanauiloyan
20
ToTEKO okinots Josué, niman okijlij: 2 "Xkinmijli on israelitas ma kitlapejpenikan uejueyikalpanmej kampa yakaj uelis nomanauis, ijkon ken oniknauatijka Moisés. 3 Tla yakaj kimiktia sen tlakatl yejuan xsan kiyokolia, uelis yas ipan semej on uejueyikalpanmej para nomanauis tla kimiktisneki on yejuan más nisiu ken kita on mikatsintli. 4 On yejuan kitejtemos kampa nomanauis, yas ne ikalakiyan on ueyikalpan kampa nemiskej on uejueyitlayekankej de on ueyikalpan, niman kinmijlis tlinon onochiu. Kemaj yejuamej kauiliskej ma kalaki, niman kimakaskej kampa chantis. 5 Tla on yejuan más nisiu ken kita on mikatsintli kitojtoka on tlakatl yejuan otemiktij, on uejueyitlayekankej xkitemakaskej on yejuan nomanauiya, pampa xsan okinek okimiktij, niman xpampa itlaj ika kitlauelitaya. 6 Pero on tlakatl yejuan otemiktij ika onkaj nokauas ipan on ueyikalpan hasta ijkuak noteititis imixpan nochimej on israelitas para yejuamej kijtoskej ika xikan itlajtlakol on tlen onochiu. Niman ika onkaj nokauas ompa hasta ijkuak mikis on ueyixtikaj tiopixki yejuan tekiti ipan on tonaltin. Ijkuakon, on temiktijketl uelis nokuepas ichan, ipan iueyikalpan, kampa ouajkistejka."7 Kemaj on israelitas okitlapejpenijkej on uejueyikalpanmej kampa nomanauilos. Okitlapejpenijkej on ueyikalpan Cedes ne Galilea, yejuan onkaj ipan on itepeyoj Neftalí. No okitlapejpanijkej on ueyikalpan Siquem yejuan onkaj ipan on itepeyoj Efraín, niman on ueyikalpan Quiriat-arba yejuan no itoka Hebrón yejuan onkaj ipan on itepeyoj Judá. 8 On okse inakastlan on río Jordán kampaka ikisayan tonaltsintli, ixpan Jericó, okitlapejpenijkej on ueyikalpan Beser yejuan onkaj ipan on xalpatlajkan kampa iyaxka* itribu* Rubén. Ipan iueyitlalpan Galaad, okitlapejpenijkej on ueyikalpan Ramot yejuan iyaxka* itribu* Gad. Niman ipan iueyitlalpan Basán, okitlapejpenijkej on ueyikalpan Golán yejuan iyaxka* itribu* Manasés. 9 In ueyikalpanmej okintokayotijkej "Ueyikalpanmej Kampa Uelis Nomanauilos". Okitlalijkej para nochimej israelitas niman para on yejuan xchanejkej, yejuan chantij intsajlan. Ompa uelis nomanauis yakaj tla xsan okinek otemiktij. Ijki sen temiktijketl uelis yas ompa, para tla yakaj ichanejkau on mikatsintli kinekis kitlakuepiltis on temiktijkejtl, xuelis kimiktis tla on tlakamej de on kalpan xachtoj kixtlalouaj tla kipiya tlajtlakojli noso ka.