On ueyitlalpan inuan on uejueyikalpanmej yejuan okimakakej itribu Simeón
19
On ika ome ueyitlalpan yejuan ipan okichijkej suerte okinmakakej on clanes de itribu* Simeón. In ueyitlalpan nokauaya itlajkotian iueyitlalpan itribu* Judá, 2 niman on uejueyikalpanmej yejuamej in katka: Beerseba, Seba, Molada,
3 Hazar-sual, Bala, Ezem,
4 Eltolad, Betul, Horma,
5 Siclag, Bet-marcabot, Hazar-susa,
6 Bet-lebaot niman Saruhén.
De nochi katkaj 13 uejueyikalpanmej iuan inkalpanuan pipitikej.
7 Niman no okiselijkej:
Aín, Rimón, Eter niman Asán.
Katkaj naui uejueyikalpanmej iuan inkalpanuan pipitikej.
On ueyitlalpan niman uejueyikalpanmej yejuan okimakakej itribu* Zabulón
10 On ika yeyi ueyitlalpan yejuan ipan okichijkej suerte okinmakakej on clanes de itribu Zabulón. Itlalnamikiyan on tlajli ajsiya hasta on kalpan Sarid. 11 Kemaj konmelauaya kampaka ikalakiyan tonaltsintli, niman ajsiya hasta Marala, kemaj ajsiya hasta Dabeset niman kemaj ajsiya itech on ayajtok yejuan onkaj ixpan Jocneam. 12 Niman de Sarid, itlalnamikiyan in tlajli yaya kampaka ikisayan tonaltsintli, niman ajsiya hasta Quislot-tabor. De ompa yaya itech on kalpan Daberat, niman tlejkouaya hasta on ueyikalpan Jafía. 13 De ompa, itlalnamikiyan on ueyitlalpan yaya kampaka ikisayan tonaltsintli, niman yaya para Gat-hefer, panouaya itech Ita-cazín, niman ajsiya hasta Rimón. Kemaj ontlamalakachouaya kampaka itech Nea. 14 Kampaka norte, itlalnamikiyan on tlajli tlamalakachouaya para yaya Hanatón, niman onkisaya ipan on ixtlauatl Jefte-el. 15 Ipan in ueyitlalpan onkatkaj matlaktli uan ome uejueyikalpanmej iuan inkalpanuan pipitikej yejuan onkatkaj nijnisiu. In yeuajmej katkaj: Catat, Naalal, Simrón, Idala, niman Belén. 16 In yejua on ueyitlalpan yejuan okiselijkej on clanes de itribu* Zabulón, iuan on uejueyikalpanmej iuan inkalpanuan pipitikej.
On ueyitlalpan niman uejueyikalpanmej yejuan okimakakej itribu* Isacar
17 On ika naui ueyitlalpan yejuan ipan okichijkej suerte, okinmakakej on clanes de itribu* Isacar. 18 On uejueyikalpanmej yejuan onkatkaj ipan on ueyitlalpan katkaj: Jezreel, Quesulot, Sunem, 19 Hafaraim, Sihón, Anaharat, 20 Rabit, Quisión, Abez, 21 Remet, En-ganim, En-hada niman Betpases. 22 Niman itlalnamikiyan ajsiya hasta kampa itoka Tabor, Sahazima niman Bet-semes, niman ontlamiya ipan on río Jordán; nochi on uejueyikalpanmej katkaj 16 niman inkalpanuan pipitikej. 23 In yejua on ueyitlalpan yejuan okiselijkej on clanes de itribu* Isacar, iuan on uejueyikalpanmej iuan inkalpanuan pipitikej.
On ueyitlalpan niman uejueyikalpanmej yejuan okimakakej itribu* Aser
24 On ika makuijli ueyitlalpan yejuan ipan okichijkej suerte okinmakakej on clanes de itribu* Aser. 25 On uejueyikalpanmej yejuan onkatkaj ipan on ueyitlalpan katkaj: Helcat, Halí, Betén, Acsaf, 26 Alamelec, Amad niman Miseal. Niman itlalnamikiyan yaya kampaka ikalakiyan tonaltsintli, hasta ajsiya ipan on tepetl Carmelo niman Sihor-libnat. 27 Kemaj on itlalnamikiyan onokuep kampaka ikisayan tonaltsintli, niman yaya hasta Bet-dagón, niman kemaj norte hasta Zabulón, on ixtlauatl Jefte-el, niman kemaj hasta Bet-ec niman Neiel. Kemaj yaya norte hasta Cabul. 28 Kemaj yaya para Abdón, Rehob, Hamón, Caná niman hasta on ueyikalpan Sidón. 29 De ompa itlalnamikiyan on ueyitlalpan nokuepaya hasta Ramá, niman hasta on yeualtsakutikaj ueyikalpan Tiro. Kemaj panouaya kampaka Hosa, niman onkisaya hasta ipan on Mar Mediterráneo ipan iueyitlalpan Aczib, 30 Uma, Afec niman Rehob. Nochi katkaj 22 uejueyikalpanmej iuan inkalpanuan pipitikej. 31 In yejua on ueyitlalpan yejuan okiselijkej on clanes de itribu* Aser, iuan on uejueyikalpanmej iuan inkalpanuan pipitikej.
On ueyitlalpan niman uejueyikalpanmej yejuan okimakakej itribu* Neftalí
32 On ika chikuasen ueyitlalpan yejuan ipan okichijkej suerte, okinmakakej on clanes de itribu* Neftalí. 33 Iueyitlalpan peuaya desde Helef, niman yaya hasta Alón-saananim, Adami-neceb, Jabneel, Lacum, niman onkisaya ipan río Jordán. 34 Kampaka ikalakiyan tonaltsintli, itlalnamikiyan on ueyitlalpan yaya Aznot-tabor, kemaj ajsiya Hucoc. Ijki tej; kampaka sur nonamikiya iuan iueyitlalpan itribu* Zabulón. Niman kampaka ikalakiyan tonaltsintli, nonamikiya iuan iueyitlalpan itribu Aser. Kampaka ikisayan tonaltsintli de on ueyitlalpan de itribu Neftalí, ontlantoya hasta itech on río Jordán. 35 On uejueyikalpanmej yejuan kuajli yeualtsakutikatkaj yejuan okinmimakakej katkaj:
Sidim, Zer, Hamat, Racat, Cineret,
36 Adama, Ramá, Hazor,
37 Cedes, Edrei, En-hazor,
38 Irón, Migdal-el, Horem, Bet-anat niman Bet-semes.
Katkaj 19 uejueyikalpanmej iuan on kalpanmej pipitikej yejuan onkatkaj nijnisiu.
39 In yejua on ueyitlalpan iuan on uejueyikalpanmej iuan inkalpanuan pipitikej yejuan okinmakakej on clanes de itribu Neftalí.
On ueyitlalpan niman uejueyikalpanmej yejuan okimakakej itribu* Dan
40 On ika chikomej ueyitlalpan yejuan ipan okichijkej suerte okinmakakej on clanes de itribu* Dan. 41 On uejueyikalpanmej yejuan onkatkaj ipan on ueyitlalpan katkaj:
Zora, Estaol, Ir- semes,
42 Saalabín, Ayalón, Jetla,
43 Elón, Timnat, Ecrón,
44 Elteque, Gibetón, Baalat,
45 Jehud, Bene-berac, Gat-rimón,
46 Mejarcón, Racón iuan on ueyitlalpan yejuan onkaj ixpan on ueyikalpan Jope.
47 Pero pampa on itribu Dan xkinmajxiliaya on ueyitlalpan, yejuamej oyajkej okinuijsokitoj yejuan chantiyaj ipan on ueyikalpan Lesem. Niman ijkuak yokinmiktijkej nochimej on yejuan ompa chantiyaj, okinoyaxkatijkej on ueyikalpan. Kemaj ompa onochantijkej niman okipatilijkej itoka. Okitokayotijkej Dan. Ijki okuitijkej ken itoka katka inuejkataj. 48 In yejua on ueyitlalpan iuan on ueyikalpanmej niman on kalpanmej pipitikej yejuan okinmakakej on clanes de itribu Dan.
On ueyikalpan yejuan okimakakej Josué
49 Más sakin* ijkuak on israelitas otlan kixexelouaj on uejueyitlalpanmej yejuan cada tribu nonekiya kiselis, Josué itelpoch Nun, okimakakej itlal intsajlan iminueyitlalpanuan on oksekimej tribus. 50 Ijkin ken toTEKO otlanauatijka, okimakakej Josué on ueyikalpan Timnat-sera ken otlajtlanka. Timnat-sera onkatka ipan on región kampa tepeyoj de on itlal Efraín. Niman Josué okuektlalij on ueyikalpan niman ompa onochantij.
51 In yejuamej nochimej on uejueyitlalpanmej yejuan on tiopixki Eleazar, Josué yejuan itelpoch Nun, niman intlayekankauan on clanes okichijkej suertes para okintlalmakakej on israelitas. Ijkon okichijkej ipan on ueyikalpan Silo ixpan toTEKO ne ikalakiyan on tiopan. Niman ijkon otlan kinxelouaj on tlaltin.