18
Nochimej on israelitas onosentlalijkej ipan on ueyikalpan Silo para ompa okitelketskej on tabernáculo* kampa nemi Dios. Ijkuakon, on tlajli yokinoyaxkatijkaj*, 2 maski sanken* poliuiya chikome tribus israelitas yejuan xe kiseliayaj imintlal.3 Kemaj Josué okinmijlij on israelitas: "¿Tlinon nenkichaj para nenmoyaxkatiskej* on tlajli yejuan yomechmakak inTEKO Dios, nemoachtojtajuan? 4 Xkintlapejpenikan yeyimej tlakamej ipan cada tribu* yejuan nikintitlanis para ma kixtlalotij niman ma kijkuilojkan nochi on región niman nechmachistiskej kenijki uelis tikxeloskej. 5 In tlakamej nonekis kixexeloskej on región chikomekan. Judá kauiliskej iueyitlalpan kampaka sur, niman iuejkakoneuan José kinkauiliskej inueyitlalpan kampaka norte. 6 Sakin ijkuak yokixexelojkej chikomekan on región, nennechixtlaloltiskej on tlen onenkijkuilojkej, niman nejua nikchiuas sorteo ixpan toTEKO Dios para nesis kenijki kiselis itlal cada se. 7 On levitas xitlaj* kiminmakaskej tlaltin, pampa yejuamej kiseliskej ken herencia on tekitl de tiopixkayotl itech toTEKO. On itribu* Gad, Rubén niman on itlajko tribu* Manasés ye kipiyaj imintlal ipan on región kampaka ikisayan tonatsintli de on río Jordán, yejuan okinmakak Moisés, itekitkau toTEKO."
8 On yejuan yayaj para konixtlaloskej niman kijkuiloskej ken ijki onkaj on región, Josué okinmijlij: "Xuiyan ipan nochi on región niman xxejxelokan, niman ijkuak yonentlankej xuajlakan para nejua nikchiuas sorteo nikan ipan in ueyikalpan Silo ixpan toTEKO.”
9 On tlakamej oyajkej niman okinejnenkej nochi on región. Okinxexelojkej on uejueyikalpanmej chikomekan, niman nochi okijkuilojkej. Sakin onokuepkej ipan on campamento ipan on ueyikalpan Silo kampa nemiya Josué. 10 Kemaj Josué okichiu on sorteo ixpan toTEKO, niman okixexeloj on ueyitlalpan intech on israelitas ompa ipan on ueyikalpan Silo.
On ueyitlalpan yejuan okimakakej itribu* Benjamín
11 Ijkuak yokinchiuilijkej sorteo, on clanes de itribu* Benjamín achtoj okinmakakej on tlaltin yejuan onkatkaj itsajlan iminueyitlalpan Judá niman José. 12 Itlalnamikiyan in ueyitlalpan peuaya kampaka norte itech on río Jordán, niman yaya norte ika de on ueyikalpan Jericó. De ompa yaya ipan on región tepeyoj kampaka ikalakiyan tonaltsintli, niman ajsiya ipan on xalpatlajkan Bet-avén. 13 De ompa yaya itech on ueyikalpan Luz kampaka sur yejuan no itoka Betel, niman temouaya hasta on ueyikalpan Atarot-adar ipan on tepetl yejuan nokaua kampaka sur de on ueyikalpan Bet-horón yejuan onkaj tlatsintlan. 14 Kemaj itlalnamikiyan on ueyitlalpan yaya itech on Mar Mediterráneo kampaka sur on tepetl yejuan onkaj ixpan Bet-horón hasta ajsi ipan on ueyikalpan Quiriat-baal yejuan no itoka Quiriat-jearim yejuan iminyaxka itribu* Judá. In yejua katka itlalnamikiyan on tlajli kampaka ikalakiyan tonaltsintli.
15 Itlalnamikiyan on ueyitlalpan kampaka sur peuaya itech Quiriat-jearim, niman yaya para kampaka ikalakiyan tonaltsintli hasta itech on amejli itoka Neftoa. 16 De ompa temouaya hasta tlatsintlan de on tepetl yejuan onkaj ixpan on ixtlauatl Ben-hinom kampaka norte de on ixtlauatl Refaim. Kemaj de ompa temouaya ipan on ixtlauatl Hinom, kemaj panouaya kampaka sur ipan on tlajtlapilkayan de on ueyikalpan Jebús, niman yaya hasta itech on amejli En-roguel. 17 Kemaj yaya kampaka norte niman onkisaya hasta En-semes. De ompa yaya hasta Guelilot yejuan nokaua ixpan on itlaixko Adumín. Niman temouaya hasta itech on ueyi tetl iyaxka* Bohán, yejuan itelpoch katka Rubén. 18 Kemaj panouaya kampaka norte ipan on tlaixtli, ixpan on ixtlauatl Jordán, niman kemaj temouaya hasta on río Jordán, 19 Kemaj yaya kampaka inorte ika Bet-hogla, niman ontlamiya inorte ika on Mar Muerto kampaka on río Jordán onkalakiya. In yejua itlamiyan katka on ueyitlalpan kampaka sur.
20 On río Jordán yejua katka itlalnamikiyan on ueyitlalpan kampaka ikisayan tonaltsintli. In yejua itlalnamikiyan on ueyitlalpan yejuan on clanes de itribu* Benjamín okiselijkej.
On uejueyikalpanmej yejuan okimakakej itribu* Benjamín
21 On uejueyikalpanmej yejuan okiselijkej on clanes de itribu* Benjamín katkaj:
Jericó, Bet-hogla, Emec-quesís,
22 Bet-arabá, Zemaraim, Betel,
23 Avim, Pará, Ofra,
24 Quefar-haamoni, Ofni, niman Gueba.
Katkaj matlaktli uan ome uejueyikalpanmej niman ikalpanuan pipitikej.
25 No ijki okiselijkej:
Gabaón, Ramá, Beerot,
26 Mizpa, Cafira, Mozah,
27 Requem, Irpeel, Tarala,
28 Zela, Elef, Jebús yejuan no itoka Jerusalén,
Gabaa niman Quiriat.
Katkaj 14 uejueyikalpanmej niman inkalpanuan pipitikej.
In yejua on ueyitlalpan yejuan okinmakakej on clanes* de itribu* Benjamín.