On ueyitlalpan yejuan okimakakej on itlajko tribu* Manasés
17
In yejua on ueyitlalpan yejuan okiselijkej itlajko tribu* Manasés. Manasés iyenkuiyou katka José. Maquir, itataj Galaad, iyenkuiyou katka Manasés, niman yejua sen tlakatl katka yejuan sanoyej ueliya tlauijsokiya. Yejua ika okimakakej on ueyitlalpan de Galaad niman de Basán, kampaka ikisayan tonaltsintli de on río Jordan. 2 No ijki okichijkej suertes para on tlaltin yejuan okinmakakej on oksekimej ikoneuan Manasés yejuan chantiskej kampaka ikalakiyan tonaltsintli de on río Jordan. Okinmakakej san kech ika miyekej on clanes. Yejuamej katkaj: Abiezer, Helec, Asriel, Siquem, Héfer niman Semidá. Yejuamej katkaj itelpochuan Manasés niman ixuiuan José.3 Pero Zelofehad yejuan katka ikoneu Hefer niman ixuiu Galaad, on yejuan ikoneu Maquir niman ixuiu Manasés, xokipix nion se ikoneu yejuan tlakatl. Yej okipix makuijli ichpoch yejuan imintoka katka Maala, Noa, Hogla, Milca niman Tirsa. 4 On ichpokamej oyajkej itech on tiopixki Eleazar, Josué itelpoch Nun niman intech on tlayekankej de on israelitas, niman okinmijlijkej: "ToTEKO okinauatij Moisés ma techmaka on tlajli no ijki ken kiseliskej totiojuan.”
Yejua ika Josué okiminmakak tlaltin on ichpokamej ken okinmakakej imintiojuan, niman ijkon ken toTEKO yotlanauatijka.
5 Ijkin itribu* Manasés okiselijkej majtlaktli uejueyi tlaltin, niman no on ueyitlalpan de Galaad niman de Basán yejuan nokaua kampaka ikisayan tonaltsintli de on río Jordán, 6 pampa ichpochuan Zelofead okinmakakej on tlaltin ken okinmakakej on tekoneuan yejuan tlakamej. On región Galaad katka para on oksekimej iuejkakoneuan Manasés.
7 On ueyitlalpan de itribu* Manasés, peuaya desde Aser niman ontlamiya hasta Micmetat, yejuan onkaj kampaka ikisayan tonaltsintli de Siquem. Niman de ompa yaya kampaka sur, niman ajsiya hasta itech intlal on yejuan chantij Tapúa. 8 Maski on región de Tapúa iyaxka* katka itribu Manasés, on ueyikalpan Tapúa yejuan onkatka kampa itlalnamikiyan on tlajli de Manasés inyaxka katka itribu Efraín. 9 De ompa itlalnamikiyan on tlajli temouaya kampa sur hasta itech on ayajtok de Caná. Ijkon tej, iueyikalpanuan Efraín onkatkaj intsajlan iueyikalpanuan Manasés, maski tla itlalnamikiyan on tlajli kampaka norte de on ayajtok iyaxka* Manasés. De ompa itlalnamikiyan on tlajli yaya hasta itech Mar Mediterráneo. 10 Itlal Efraín nokauaya kampaka sur de on ayajtok, niman itlal Manasés nokauaya kampaka norte de on ayajtok. Itlalnamikiyan iueyitlalpan Manasés ontlamiya kampaka ikalakiyan tonaltsintli itech on Mar Mediterráneo, iuan itlal Aser kampaka norte, niman kampaka ikisayan tonaltsintli notlalnamikiya iuan itlal Isacar. 11 No ijki Manasés okinselij in uejueyikalpanmej yejuan onkatkaj ipan inueyitlalpanuan Isacar niman Aser, cada se iuan ikalpanuan pipitikej yejuan onkatkaj nisiu, niman on uejueyikalpanmej imintoka katka: Bet-seán, Ibleam, Dor, Endor, Taanac niman Meguido. Niman teuan okimakakej on yeyi tepemej. 12 Pero itribu* Manasés xouelkej okinoyaxkatijkej in uejueyikalpanmej pampa on cananeos yejuan ompa chantiyaj okinmixnamikkej niman ompa onokajkej. 13 Más sakin* ijkuak on israelitas más omiyekiyakej okinchiualtijkej on cananeos ma tekitikan ken esclavos. Pero xokinkixtijkej.
Iuejkakoneuan José kinoyaxkatiaj on kojyo
14 Iuejkakoneuan José okilijkej Josué:
—Tejuamej sanoyej timiyekej pampa toTEKO sanoyej yotechtiochiu. Yejua ika, ¿Tline otitechmakak ikan sorteo san se tlajli?
15 Niman Josué okinnankijli:
—Pampa nemejuamej sanoyej yonenmiyekiyakej niman xmechajxilia on tepeyoj yejuan iyaxka* Efraín, xuiyan ne kampaka kojyoj, niman xkintsontekikan on kojtin* ipan on tlaltin de iueyitlalpan on ferezeos niman de on refaitas.
16 Niman yejuamej okijtojkej:
— Nion on ueyi tepeyoj xtechajxilis. Niman nochimej on cananeos yejuan chantij ipan on ixtlauatl kipiyaj teposcarretas de guerra, no ijki ken on yejuan chantij Bet-seán, niman on yejuan chantij ipan on kalpanmej pipitikej ne ipan on ixtlauatl Jezreel.
17 Kemaj Josué ijkin okinnankilij iuejkakoneuan José on yejuan itribu* Efraín niman itribu* Manasés:
—Nemejuamej sanoyej nemiyekej niman nenkojtikej. Xnenkiseliskej san se parte de on ueyitlalpan, 18 yej no nenmoyaxkatiskej* on tepeyoj yejuan kojyoj, niman on kojtin* uelis nenkitekitiltiskej. Maski on cananeos sanoyej kipiyaj poder niman kipiyaj teposcarretas de guerra, nemejuamej nenueliskej nenkinkixtiskej.
On uejueyitlalpanmej yejuan okinmakakej on oksekimej tribus*