Josué 21

On uejueyikalpanmej yejuan okinmakakej on levitas

1-2 Intlayekankauan de iminfamilias on levitas oyajkej ipan on ueyikalpan Silo ipan iueyitlalpan Canaán, para otlajtlajtotoj iuan on tiopixki Eleazar, niman Josué yejuan itelpoch Nun, niman iminuan on oksekimej tlayekankej ipan intribus on israelitas. Niman okinmijlijkej: "ToTEKO otlanauatij itechkopa Moisés ma techmakakan uejueyikalpanmej kampa tichantiskej niman tlaltin kampa tiueliskej tikintlakuajkualtiskej toyolkauan." 3 Kemaj on israelitas okiminmakakej on levitas keski uejueyikalpanmej niman tlaltin kampa kintlakuajkualtiskej iminyolkauan ijkon ken yokinmijlijka toTEKO.

4 Okichijkej suertes para cada clan* ma kiselikan iminuejueyikalpanuan. On coatitas yejuan iuejkakoneuan on tiopixki Aarón, yejuamej achtoj okiselikej iminuejueyikalpanuan. Yejuamej okiselijkej majtlaktli uan yeyi uejueyikalpanmej yejuan iminyaxka katka itribu Judá, itribu Simeón, niman itribu Benjamín.

5 Kemaj on oksekimej coatitas okiselijkej majtlaktli uejueyikalpanmej yejuan iminyaxka katka itribu Efraín, itribu Dan niman itlajko tribu Manasés.

6 Kemaj on inclanes on levitas yejuan iuejkakoneuan Gersón, okiselijkej majtlaktli uan yeyi uejueyikalpanmej yejuan iminyaxka katka itribu Isacar, itribu* Aser, itribu Neftalí niman itlajko tribu Manasés, yejuan onkaj ipan on tlajli Basán.

7 Niman iclanes on levitas yejuan iuejkakoneuan Merari okiselijkej matlaktli uan ome uejueyikalpanmej, yejuan iminyaxka katka itribu Rubén, itribu* Gad niman itribu Zabulón.

8 Ijkon on israelitas okinmakakej on levitas ikan suartes uejueyikalpanmej niman tlaltin kampa kintlakuajkualtiskej inminyolkauan, ijkon ken toTEKO otlanauatijka itechkopa Moisés.

9 In yejua imintoka on uejueyikalpanmej yejuan okinmakakej on levitas yejuan iminyaxka katka itribu Judá niman itribu Simeón. 10 (On levitas yejuan kisaj itech iclanes Coat yejuan iuejkakoneuan Aarón, okinmakakej in uejueyikalpanmej pampa yejuamej achtoj imintech ouets on suertes.) 11 Ipan iueyitlalpan Judá kampa tepeyo, okinmakakej on ueyikalpan Quiriat-arba yejuan aman itoka Hebrón iuan tlaltin kampa kintlakuajkualtiskej iminyolkauan. On ueyikalpan ueyixtikatka pampa iminyaxka katka iuejkakoneuan on ueyitlakatl Anac. 12 Pero on tlaltin niman on kalpanmej pipitikej de on ueyikalpan, okimakakej Caleb, ikoneu Jefone.

13 Aparte de on ueyikalpan Hebrón, yejuan katka sen ueyikalpan kampa ueliyaj nomanauiyaj on yejuan temiktiaj, on iuejkakoneuan on tiopixki Aarón no okimakakej in uejueyikalpanmej kampa kintlakuajkualtiskej iminyolkauan: Libná, 14 Jatir, Estemoa, 15 Holón, Debir, 16 Aín, Juta, niman Bet-semes. In chiknaui uejueyikalpanmej kipiyayaj on tlaltin kampa kintlakuajkualtiskej iminyolkauan.

17 Niman yejuan itribu Benjamín okimakakej: Gabaón, Geba, 18 Anatot niman Almón.

Okinmakakej in naui uejueyikalpanmej iuan on tlajli kampa kinyeualtsakuaskej iminyolkauan. 19 Ijkon tej, on uejueyikalpanmej de on tiopixkej yejuan iuejkakoneuan Aarón katkaj majtlaktli uan yeyi, cada se iuan on kampa kintlakuajkualtiskej iminyolkauan.

20 Niman on oksekimej iclanes on levitas yejuan iuejkakoneuan Coat, okinmimakakej on uejueyikalpanmej yejuan iminyaxaka katka itribu Efraín. 21 Ipan on tepeyoj de Efraín, okinmakakej on ueyikalpan Siquem, kampa tla yakaj temiktia ompa nomanauis. Niman no okinmakakej on uejueyikalpanmej Gezer, 22 Quibsaim niman Bet-horón. Katkaj naui uejueyikalpanmej iuan on tlaltin kampa kintlakuajkualtiskej iminyolkauan. 23 Itech itribu* Dan okiselijkej naui uejueyikalpanmej iuan on tlaltin kampa kintlakuajkualtiskej iminyolkauan. On uejueyikalpanmej imintoka: Elteque, Gibetón, 24 Ayalón niman Gat-rimón. 25 Niman itech on itlajko tribu Manasés okiselijkej ome uejueyikalpanmej iuan on tlaltin kampa kintlakuajkualtiskej iminyolkauan. On uejueyikalpanmej katkaj: Taanac niman Gat-rimón. 26 Ijkon tej, on coatitas okiselijkej majtlaktli uejueyikalpanmej iuan on tlaltin kampa kintlakuajkualtiskej iminyolkauan.

27 On levitas yejuan iuejkakoneuan Gersón, okiselijkej uejueyikalpanmej iuan on tlaltin kampa kintlakuajkualtiskej iminyolkauan. On uejueyikalpanmej iminyaxka katka itlajko tribu manasés, niman ijkin imintoka katkaj: Golán niman Beestera. On ueyikalpan Golán onkatka ipan on tlajli Basán. Yejua sen ueyikalpan katka kampa yakaj ueliya nomanauis tla temiktia. 28-29 Itech itribu Isacar okiselijkej naui uejueyikalpanmej iuan on tlaltin kampa kintlakuajkualtiskej iminyolkauan. On uejueyikalpanmej imintoka katka: Cisón, Daberat, Jarmut niman En-ganim. 30-31 Itech itribu Aser okiselijkej naui uejueyikalpanmej iuan on tlaltin kampa kintlakuajkualtiskej iminyolkauan. On uejueyikalpanmej imintoka katkaj: Misael, Abdón, Helcat niman Rehob. 32 Itech itribu* Neftalí okiselijkej yeyi uejueyikalpanmej iuan on tlaltin kampa kintlakuajkualtiskej iminyolkauan. On uejueyikalpanmej imintoka katkaj: Cedes, Hamot-dor niman Cartán. Cedes, onkatka ipan on tlajli Galilea, niman onkatka kampa yakaj ueliya nomanauis tla temiktia. 33 Ijkon tej, on clanes gersonitas okiselijkej majtlaktli uan yeyi uejueyikalpanmej. Cada ueyikalpan okiselijkej iuan on tlaltin kampa kintlakuajkualtiskej iminyolkauan.

34-35 On clanes levitas yejuan iuejkakoneuan Merari sanken* poliuiya para kiseliskej iminuejueyikalpanuan. Itech itribu Zabulón okiselijkej naui uejueyikalpanmej iuan on tlaltin kampa kintlakuajkualtiskej iminyolkauan. On uejueyikalpanmej imintoka katkaj: Jocneam, Cartá, Dimná niman Naalal. 36-37 Itech itribu* Rubén okiselijkej naui uejueyikalpanmej iuan on tlaltin kampa kintlakuajkualtiskej iminyolkauan. On uejueyikalpanmej katkaj: Beser, Jahaza, Cademot niman Mefaat.

38-39 Itech itribu* Gad okiselijkej naui uejueyikalpanmej iuan on tlaltin kampa kintlakuajkualtiskej iminyolkauan. On uejueyikalpanmej imintoka katkaj: Ramot, Mahanaim, Hesbon niman Jazer. Ramot onkatka ipan on tlajli Galaad, niman onkatka kampa yakaj ueliya momanauiyaya tla temiktia. 40 Ijkon tej, on clanes levitas yejuan iuejkakoneuan Merari yejuan kimpolouaya kiseliskej on uejueyikalpanmej okiselijkej matlaktli uan ome uejueyikalpanmej.

41 Iminuejueyikalpanuan on levitas ipan nochi inueyitlalpan on israelitas katkaj 48 uejueyikalpanmej iuan on tlaltin kampa kintlakuajkualtiskej iminyolkauan. 42 Cada ueyikalpan kiyeualojtikatka on tlaltin kampa kintlakuajkualtiskej iminyolkauan.

ToTEKO okichiu nochi tlen okijtoj

43 Ijkon tej, toTEKO okinmakak on israelitas nochi on uejueyitlalpanmej yejuan okimprometerouilijka iminachtojtajuan ikan tlajtolmakalistli ika kinmakaskia, niman on israelitas okinoyaxkatijkej, niman ompa onochantijkej. 44 ToTEKO okichiu tlen okiprometeroj niman okiminmakak neseuilistli ipan nochi on ueyitlalpan. Imintlauelikniuan xouelkej okinmixnamikkej pampa toTEKO okichiu para ma kintlanikan. 45 Nion se promesa xonokau, yej nochi on tlajtlamach* tlen kuajli yejuan toTEKO okimprometerouilij, melauak okichiu.