On israelitas okinoyaxkatijkej on ueyikalpan Jericó
6
Xakaj ueliya kalakiya nion kisaya ipan on ueyikalpan Jericó, pampa kuajli yokintsakukaj itsakuijlouan niman ika sanoyej kinmakajsiyaj on israelitas. 2 Pero toTEKO okijlij Josué:“Xkita, nejua nimitsmaktilia on ueyikalpan Jericó, iuan irey niman isoldados. 3 Tejua niman mosoldados, xyeualokan on ueyikalpan mojmostla. Ijkon nenkichiuaskej chikuasen tonajli san sejpa ipan se tonajli. 4 Chikomemej tiopixkej yaskej iyakapan on yekcaja kampa onkaj on pacto*. Cada tiopixki kiktis sen tlapitsajli de ikuakuau borrego. Niman kampa ika chikome tonajli, nenkiyeualoskej on ueyikalpan chikomepa, chika on tiopixkej kipitsaskej on kuakuautlapitsaltin. 5 Ijkuak nemejuamej nenkakiskej ika youejkau kakistij on kuakuautlapitsaltin, xtsajtsikan sanoyej chikauak san kech ika nenkojtikej, niman on tepanchinantli yejuan kiyeualojtok on ueyikalpan, uetsis. Kemaj nimantsin nemochimej* xkalakikan melajki ipan on ueyikalpan niman xkinuijsokikan on yejuan ompa nemij."
6 Josué, ikoneu Nun, okinnots on tiopixkej niman okinmijlij: "Xkiktikan on yekcaja yejuan kipiya on ipacto* toTEKO. Niman chikomemej de nemejuamej xuiyan iyakapan on yekcaja niman xkiktikan on tlapitsaltin yejuan tlachijchijtin ikan ikuakuauan borregos." 7 Niman ijkin okinnauatij on israelitas: “Xyeualokan on ueyikalpan. On soldados yaskej iyakapan iyekcaja toTEKO.”
8 Nochimej okichijkej on tlen Josué okinnauatij. On chikomemej tiopixkej tlapitstiayaj iyakapan iyekcaja toTEKO kampa onkaj on pacto* niman on yekcaja kintokaya. 9 On soldados yejuan tlacuidarojtiayaj yayaj inyakapan on tiopixkej, niman on oksekimej soldados yayaj ikuitlapan on yekcaja, chika ijkuakon, on tiopixkej xnoteltiayaj ika kimpitsayaj on kuakuautlapitsaltin. 10 Pero Josué okinnauatij on israelitas: "Maka nentsajtsiskej, nion maka nentlajtlajtoskej, hasta ijkuak nejua nemechnauatis xtsajtsikan. Kemaj xtsajtsikan sanoyej chikauak san kech ika nenkojtikej.”
11 Kemaj Josué otlanauatij ma kiktikan iyekcaja toTEKO niman ma kiyeualokan on ueyikalpan san sejpa. Kemaj oyajkej ipan on campamento niman ompa onokajkej on yeuajli. 12 Uajmostla sanimantsin Josué onokuiteu niman on tiopixkej okinomamaltijkej iyekcaja toTEKO. 13 On soldados yakatstiayaj, kemaj yayaj chikomemej tiopixkej yejuan tlapitstiayaj. Kemaj tlatokatiayaj on tiopixkej yejuan kiktiyaj iyekcaja toTEKO. Niman kemaj oksekimej soldados yejuan tlacuidarojtiayaj tlakuitlapan kitokatiayaj on iyekcaja toTEKO. Niman on kuakuautlapitsaltin xkinteltiayaj ika kimpitsayaj. 14 Kampa ika ome tonajli oksejpa okiyeualojkej san sejpa on ueyikalpan, niman kemaj onokuepkej ipan on campamento. Niman mojmostla ijki okichijkej hasta oajsik chikuasen tonajli.
15 Ijkuak ika chikome tonajli, onokuitejkej sanimantsin niman opeu kiyeualouaj on ueyikalpan ken achtopa yokichijkaj, pero on tonajli okiyeualojkej chikomepa.
16 Ijkuak on tiopixkej yokiyeualojkej on ueyikalpan chikomepa, okimpitskej on kuakuautlapitsaltin. Kemaj Josué okinmijlij on tlakamej: "¡Xtsajtsikan, pampa toTEKO yomechmaktilij in ueyikalpan! 17 Xkinmiktikan nochimej yejuan nemij ipan in ueyikalpan niman xxoxotonikan nochi tlen onkaj ompa ken sen uentli para toTEKO. San maka nenkimiktiskej Rahab on auilsiuatl iminuan nochimej ichanchanejkauan, pampa yejua okinmiyan on tlakamej yejuan oichtakatlajtlachakoj ipan in tlajli. 18 Pero kuajli xkakikan. Maka nenkuiskej itlaj yejuan onkaj ipan on ueyikalpan para nemoyaxka*tiskej, pampa toTEKO yotechijlij ma tikxoxotonikan. Niman tla yakaj kitilana itlaj, itlauel toTEKO techajsis tinochimej yejuan tiisraelitas. 19 Pero on oro, on plata, niman nochi on tlajtlamach* de bronce niman de hierro, kimaktiliskej toTEKO niman kitlaliskej kampa kejeuiliaj on tlen pajtio."
20 Ijkuak on kuakuautlapitsaltin okakistikej, on tlakamej otsajtsikej sanoyej chikauak san kech ika ijyokojtikej, niman on tepanchinantli yejuan kiyeualtsakutikatka on ueyikalpan ouets. Kemaj on israelitas okalakkej melajki ipan on ueyikalpan, niman okinoyaxkatijkej. 21 Okinmiktijkej ikan espada nochimej on tlakamej, siuamej, telpokamej, ichpokamej, niman ueuentsitsimej. No ijki okinmiktijkej nochi uakaxtin, borregos niman polokomej*. Nochi kuajli otlaxoxotonijkej.
22 Josué okinmijlij on omemej tlakamej yejuan oichtatlajtlachatoyaj ipan on tlajli: "Xuiyan ichan on auilsiuatl, niman xkixtikan ompa iuan nochi ifamilia ijkon ken onenkitlajtolmakakej ika itokatsin Dios. " 23 Yejuamej okalakej niman okixtijkej Rahab iuan itataj, inanaj, ikniuan niman nochimej on yejuan ken kintaya. Kemaj okinuikakej niman okinkajkej ikiauak incampamento on israelitas. 24 Kemaj on israelitas okitlatijkej on ueyikalpan niman nochi tlen onkatka ompa. San okixtijkej on plata, oro iuan nochi tlajtlamach* tlachijchijtli ika bronce niman hierro yejuan okitlalijkej kampa kejeuiliaj toTEKO on tlen pajtioj. 25 Pero Josué okimanauij inemilis Rahab niman ifamilia pampa yejua okinmiyanka on tlakamej yejuan Josué okintitlanka ma ichtakatlajtlachatij ipan on ueyikalpan Jericó. Niman desde ijkuakon iuejkakoneuan Rahab chantij intsajlan on israelitas hasta aman.
26 Kemaj Josué okijtoj in chikauak tlajtolmakalistli ixpan toTEKO:
"Ma kajsi tlauelijli on tlakatl
yejuan oksejpa peuas kichijchiuas in ueyikalpan Jericó.
Ma miki iyenkuiyokoneu ikuak kichijchiuas on cimiento,
niman ma miki ixokoyokoneu ijkuak kitlalis itsakuijlouan."
27 ToTEKO tej, okipaleuij Josué, niman on tlen okichiu Josué nochiuiyan omachiyak imanian on región.