5
Nochimej on reyes amorreos yejuan nemiyaj ipan ilado Jordán kampaka ikalakiyan tonaltsintli, niman nochimej on reyes cananeos yejuan nemiyaj itechika on mar Mediterráneo, okimatkej ika toTEKO okuats on río Jordán chika on israelitas panouayaj. Ijkuakon, nochimej sanoyej onomojtijkej niman xakaj kinekiya kinmixnamikis on israelitas.Ne Gilgal okitetlalilijkej on neskayotl itoka circuncisión*
2 Kemaj ijkuakon, toTEKO okijlij Josué: "Xkinchijchiua cuchillos de tetl, niman xkintlalili on israelitas on neskayotl itoka circuncisión*.”
3 Yejua ika, Josué okinchijchiu cuchillos niman okinchiuilij circuncisión on tlakamej israelitas ipan on tepetl Aralota. 4 Okiminchiuilij circuncisión, pampa nochimej on tlakamej yejuan ijkuak okiskej Egipto uejueyimej katkaj, yomijmikaj ipan ojtli ne xalpatlajkan. 5 Nochimej yejuan okiskej Egipto yokinchiuilijkaj on circuncisión, pero on yejuan otlakatkej ipan on xalpatlajkan xe kinchiuiliayaj. 6 Pampa on israelitas okistinenkej 40 xipan ipan on xalpatlajkan, yomikkaj nochimej on tlakamej yejuan ijkuak okiskej Egipto tlakamej katkaj. On tlakamej xokitlakamatkej toTEKO. Yejua ika toTEKO onotlajtolmakak ika itokatsin ika xkinkauilis ma kitakan on tlajli yejuan okinprometerouilijka inuejkatajuan ika kinminmakaskia, on tlajli kampa sanoyej tlatlaki niman xitlaj* poliui. 7 ToTEKO okichiu para inkoneuan on tlakamej yejuan omikkej, yejuamej onokajkej impampa imintajuan. Yejua ika Josué okinchiuilij circuncisión inkoneuan on tlakamej pampa xokinchiuilij ijkuak kistinemiyaj ipan on xalpatlajkan. 8 Ijkuak nochimej otlan kintlaliliaj on neskayotl, onokajkej ipan on campamento hasta kaman opajtikej niman xok nokokouayaj. 9 Kemaj toTEKO okijlij Josué: "Aman, ika in circuncisión yonemechkixtilij on tlen tepinajtij ika nenesclavos katkaj Egipto, kampa nenesclavos katkaj." Yejua ika ompa itoka Gilgalb, niman sanken* ijki itoka hasta aman.
10 Chika on israelitas chantiyaj Gilgal ipan on iixtlauayo Jericó, ompa okichijkej on iluitl Pascua ijkuak tlapoyajkan ipan on tonajli majtlaktli uan naui de on metstli. 11 Ijkuak yopanok on tonajli de on iluitl Pascua, opejkej kikuaj on tlen tlaki ipan on tlajli Canaán. Okikuajkej pan yejuan xkipiya tlaxokolilistli*, niman trigo tliuaki. 12 Ijkuakon, xokaman oonyak maná. Ijkon tej, desde ijkuakon on israelitas okikuajkej tlen tlakiya ipan on tlajli de Canaán.
Josué niman iángel toTEKO
13 Se tonajli ijkuak Josué nemiya nisiu on ueyikalpan Jericó, okitak ixpan sen tlakatl ikan sen espada ipan ima. Kemaj Josué okinisiuij niman okitlajtoltij:
—¿Akin tejua? ¿Tinemi touan noso titotlauelikniu?
14 On tlakatl okinankilij:
—Nion xnimotlauelikniu nion ninemi nemouan. Nejua niuajlau ken ueyitlayekanketl de itech iángeles toTEKO.
Kemaj Josué onotlankuatelkets niman onopachoj hasta ipan tlajli. Kemaj okimauistilij niman okitlajtoltij:
—NoTEKO, ¿Tlinon tikneki ma kichiua in motekitkau?
15 Niman on iueyitlayekankau toTEKO okinankilij:
—Xmokakkixti. Pampa kampa tijkatikaj sanoyej tlayekkan.
Niman Josué okichiu ken okijlij.