On majtlaktli uan ome temej yejuan okinkuikej ijtik on río Jordán
4
Ijkuak nochimej on israelitas otlankej panouaj ipan on río Jordán, toTEKO okijlij Josué: 2 "Xkintlapejpeni majtlaktli uan ome tlakamej intech on israelitas, se de cada tribu. 3 Niman xkinmijli cada se ma kikui se tetl yejuan onkaj ijtik on río Jordán kampa ijkatokej on tiopixkej, niman ma kinmiktikan para kintlaliskej kampa noseuiskej ipan in yeuajli."4 Kemaj Josué okinnots on majtlaktli uan ome tlakamej yejuan okintlapejpenij intech on israelitas, sentetl itech cada tribu. 5 Ijkin okinmijlij: "Xkalakikan itlajkotian on ueyi río Jordán iyakapan on iyekcaja toTEKO Dios. Niman cada se de nemejuamej xkuikan sen tetl niman xtlalikan nemokechpan niman xkuajkikan nikan. Nenkuiskej sen tetl para cada tribu* de on israelitas. 6 Niman in temej nochiuaskej ken sen señal para nemejuamej. Niman sakin* ijkuak nemokoneuan mechtlajtoltiskej: '¿Tlinon kijtosneki in temej?', 7 Ijkin nenkintlajtlajtouiliskej : 'Ijkuak on yekcaja yejuan kipiya ipacto* toTEKO okipanok on río Jordán, on atl onoteltij. Aman tej, in temej nochipa onyaskej ken sen señal para nochimej on israelitas xkelkauaskej on tlen onochiu ipan on tonajli.' "
8 Yejuamej okichijkej on tlen Josué okinnauatij. Okitilankej sen tetl ipan on ueyi río Jordán para cada tribu* ijki ken toTEKO okinauatij Josué. Okinmiktikej ipan on campamento, niman ompa okintlalijkej, 9 Josué no ijki okintelkets okse majtlaktli uan ome tetl ijtik on río kampa ijkayaj on tiopixkej yejuan kiktiyaj iyekcaja ToTEKO. Niman on temej sanken* ompa onokej hasta aman.
10 Niman on tiopixkej yejuan kiktiyaj on yekcaja yejuan kipiya on pacto* onokajkej ijtik on río Jordán hasta ijkuak on israelitas otlan kichiuaj nochi on tlen toTEKO okinauatij Josué. Nochi okichijkej ken Moisés okinauatij Josué. On israelitas oisijkapanokej ipan on río. 11 Niman ijkuak nochimej on israelitas yopanokej nepa iokse lado on río Jordán, kej on tiopixkej opanokej ikan iyekcaja toTEKO niman onotelketsatoj hasta inyakapan on israelitas. 12 Kemaj opanokej isoldados itribu* Rubén, itribu* Gad niman itlajko tribu* Manasés ikan imintepos. Yejuamej yayaj inyakapan on oksekimej israelitas, ijkon ken Moisés otlanauatij. 13 De on ome uan tlajko tribus, katkaj kanaj 40 mil tlakamej yejuan ika intepos opanokej ixpan toTEKO yejuan yayaj listos para ontlauijsokiskej niman oyajkej ipan iixtlauayo Jericó. 14 Ipan on tonajli toTEKO okiueyitlalij Josué imixpan on israelitas, niman okitlakaitakej ipan nochi inemilis ijkon ken okitlakaitakej Moisés.
15 Kemaj toTEKO okijlij Josué: 16 "Xkinnauati on tiopixkej yejuan kiktij on yekcaja yejuan kipiya on pacto*, para ma kisakan ijtik on río Jordán."
17 Kemaj Josué okinnauatij ma kisakan ijtik on río. 18 Niman kemaj ijkuak on tiopixkej yejuan kiktij iyekcaja toTEKO okiskej ijtik on río niman ocholojkej ipan tlajli uaki, iau on río nimantsin oksejpa okitemitij on atlautli niman onotlaloj ken achtoj notlalojtikatka.
On temej teelnamiktiskej tlen onochiu Gilgal
19 On israelitas okiskej itech on río Jordán ipan on majtlaktli tonajli de on achtoj metstli, niman onochantijkej ne Gilgal ixpan Jericó kampaka ikisayan tonaltsintli. 20 Ompa Josué okinnenepanoj on majtlaktli uan ome temej yejuan okinualeuitijkej ijtik on río Jordán. 21 Niman kemaj okinmijlij on israelitas: "Yejkos tonajli ijkuak nemouejkakoneuan mechtlajtoltiskej: '¿Tlinon kijtosnekij in temej, para tejuamej?' 22 Nemejuamej, xkintlajtlajtouilikan ika in temej techelnamiktia ika on israelitas opanokej in río Jordán ipan tlajli uaki, 23 pampa toTEKO Dios okuats on atl hasta kaman nochimej otikpanokej sa no ijki ken okuats on Mar Rojo chika kipanouayaj toachtojtajuan. 24 Ijkon onochiu, para nochi tlakatl ipan in tlaltikpaktli ma kimatikan ika toTEKO Dios kipiya ueyi poder, niman para nemejuamej nochipa xtlakaitakan."