On israelitas okipanokej on río Jordán
3
Uajmostla uejkakualkan Josué niman nochimej on israelitas okiskej Sitim, niman oajsikej itech on río Jordán. Pero xopanokej, yej ompa onoseuijkej itenko on río Jordán hasta kaman okalakkej ne Canaán. 2 Ijkuak yopanok yeyi tonajli, on tlayekankej opanokej nochiuiyan ipan on incampamento, 3 niman ijkin okiminnauatijkej on israelitas: "Ijkuak nenkintaskej on tiopixkej levitas yejuan kiktij iyekcaja toTEKO yopeu nejnemij, nemejuamej no xkisakan niman xkintokakan. 4 Ijkon nenkimatiskej kanika nenyaskej, pampa xekaman nempanouayaj ipan on ojtli. Pero maka nenkinisiuiskej iyekcaja toTEKO. Yej san uejkatsin xkitstiakan ken kanaj se kilómetro ika uejka."5 Josué okinmijlij on israelitas: "Xmochipauakan ixpan Dios, pampa mostla nenkitaskej ika toTEKO kichiuas uejueyi milagros* nemixpan.”
6 Niman kemaj okinmijlij on tiopixkej: "Xkiktikan iyekcaja toTEKO yejuan kipiya ipacto*, niman xpanokan on río iminyakapan on israelitas.”
On tiopixkej okiktikej on yekcaja yejuan kipiya on pacto* niman yejuamej oyajkej iminyakapan on israelitas. 7 Kemaj toTEKO okijlij Josué: "In tonajli nipeuas nimitsueyitlalis imixpan nochimej in israelitas. Ijkon yejuamej kitaskej ika melauak ninemi mouan ken ninemiya iuan Moisés. 8 Xkinnauati on tiopixkej yejuan kiktij on yekcaja yejuan kipiya on pacto*, ijkuak ajsiskej itech on río Jordán, ma noteltikan atlajkotian."
9 Kemaj Josué okinmijlij on israelitas: "Xuajlakan niman xkakikan on tlen kijtoua nemoTEKO Dios. 10 Aman nenkimatiskej ika on Dios yejuan nemi, melauak nemi nemouan, niman ika yejua kinkixtis nemixpan nochimej on cananeos, hititas, heveos, ferezeos, gergeseos, amorreos niman jebuseos. 11 Xkitakan, on yekcaja yejuan kipiya ipacto* toTEKO, yejuan ueyixtikaj ipan nochi tlaltikpaktli, aman kipanos on río Jordán nemixpan. 12 Aman tej, xtlapejpenikan majtlaktli uan ome tlakamej, se de cada tribu* yejuan kisa intech iuejkakoneuan Israel. 13 Ijkuak on tiopixkej yejuan kiktij iyekcaja toTEKO yejuan ueyixtikaj ipan nochi tlaltikpaktli, kontlaliskej imikxi ijtik on río Jordán, on atl nimantsin noteltis niman noxelos. On atl yejuan uajlau tlakpakopa xok notlalos, yej nochiuas ken sen tepanchinantli."
14 On israelitas okiskej ipan on campamento para okipanokej on río Jordán, niman on tiopixkej yejuan kiktiyaj on yekcaja yejuan kipiya on pacto*, yejuamej yakatstiayaj. 15 Ipan on tonaltin ijkuak pixkalo, on río Jordán sanoyej temiya niman on atl kisaya. Ijkuak on tiopixkej yejuan kiktiyaj on iyekcaja toTEKO okontlalijkej imikxiuan ijtik on atl, 16 on atl yejuan uajlaya tlakpakopa onoteltij. San sekan onoolochoj para tlakpak hasta nesiya ken sen ueyi tepanchinantli. On atl onoolochoto nisiu on ueyikalpan itoka Adám ne itech on ueyikalpan Saretán. Niman on atl yejuan temouaya, yejuan ajsiya ipan on Mar Muerto, xonoteltij hasta kaman otlan yau. Ijki tej, on israelitas okipanokej on ueyi río Jordán ixpan on ueyikalpan Jericó. 17 On tiopixkej yejuan kiktiyaj on yekcaja yejuan kipiya ipacto* toTEKO, ijkatikatkaj itlajkotian on río Jordán ipan tlajli uaki hasta kaman nochimej on israelitas okipanokej on río Jordán.