Josué okintitlan omemej tlakamej para ma ichtakatlajtlachatij Jericó
2
Kemaj Josué, ikoneu Nun, okintitlan san ichtaka omemej tlakamej desde Sitim para oichtakatlajtlachatoj ipan on región niman ipan on ueyikalpan Jericó. Okinmijlij: "Xuiyan, xichtakatlajtlachatij ipan on región niman xkitakan on ueyikalpan Jericó." Niman yejuamej oyajkej niman oajsikej ichan sen siuaauilnenki de Jericó yejuan itoka katka Rahab, niman ompa onokajkej. 2 Pero yakaj okimachistito on rey de Jericó ika oajsikej keskimej tlakamej israelitas ipan on yeuajli para oichtakatlajtlachatoj ipan in región, niman okijlijkej ika nemiyaj ichan Rahab.
3 Kemaj on rey otlanauatij, para ijkin ma kijlitij Rahab:
—Xkinkixti on tlakamej yejuan oualajkej omitsitakoj niman nemij mochan, pampa oualajkej san oichtakatlajtlachakoj.
4 Pero on siuatl okimiyan on tlakamej. Niman ijkin okiminnankilij itekitkauan on rey:
—Melauak keskimej tlakamej oyejkokej nikan nochan, pero xnikmati kanon ualeuaj. 5 Yejuamej oyajkej ijkuak ye tlapoyajtikaj niman ijkuak ye notsakuaskia itsakuijlou on ueyikalpan. Xnikmati kanika oyajkej, pero tla nemejuamej nimantsin nenkintokaskej, manin uelis nenkominajsiskej.
6 (Pero on siuatl yej yokintlejkoltijka tlapani ipan ikal, niman okimiyan itsajlan on lino sasalijtikaj ikan manojos yejuan kuatsaya.)
7 Itekitkauan on rey okiskej ipan on ueyikalpan niman oyajkej okintejtemotoj on tlakamej ipan on ojtli yejuan ajsi ipan on ueyi río Jordán kampa ueli panolo. Ijkuak okiskej itekitkauan on rey, nimantsin okitsakukej itsakuijlou on ueyikalpan. 8 Kemaj Rahab nimantsin otlejkoto tlapani ipan ikal chika xe kochiyaj on omemej israelitas, niman okinmijlij:
9 —Nejua nikmati ika nemoTEKO yomechmakak in tlajli pampa yejua kichiua para tinochimej tejuamej sanoyej ma temechmakajsikan. Nochimej yejuan nikan chantij ipan in país sanoyej mojkamikij san nemopampa. 10 Tikmatstokej ika ijkuak nemejuamej onenkiskej Egipto, Dios okuats on Mar Rojo para ijki nemejuamej ouel onenkipanokej. No ijki tikmatstokej ika nemejuamej onenkinmiktijkej Sehón niman Og, on omemej reyes amorreos yejuan nemiyaj ipan on okse lado de on río Jordán. 11 Niman sanoyej titomojtiaj hasta tiyolmimikij. Yejua ika, xakaj kineki mechixnamikis, pampa tikmatij ika nemoTEKO, yejua ueyixtikaj Dios niman tlamandaroua ne tlakpak ipan iluikak niman nikan ipan in tlaltikpaktli. 12 Yejua ika, aman nemechyemankatlajtlanilia, xnechtlajtolmakakan ikan itokatsin nemoTEKO, ika nenkinchiuaskej tlen kuajli para nofamilia ijkon ken nejua onikchiu tlen kuajli para nemejuamej. Xnechmakakan itlaj para nesis ika melauak nenkichiuaskej, 13 niman ika nenkimanauiskej inemilis notataj, nonanaj, nokniuan niman nochi on tlen inyaxka. ¡Xtechmanauikan! ¡Maka nentechmiktiskej!
14 Kemaj yejuamej okinankilijkej:
—Tla xtitechtemaktilia, timitstlajtolmakaj ika itokatsin Dios ika temechmanauiskej. Ma Dios techmikti tla xtikchiuaj ken yotimitsijlijkej. Niman ijkuak Dios techmakas in tlajli, tejuamej titkchiuaskej tlen kuajli nemopampa.
15 Niman pampa Rahab chantiya tlakpak ipan on patlauak tepantli yejuan ika yeualtsakutikaj on ueyikalpan, okinuajtemoltij on tlakamej ipan iventana ika sen mekatl. 16 Niman Rahab okinmijlij:
—Xuiyan ipan tepemej para maka mechnextiskej itekitkauan on rey yejuan mechtejtemouaj. Ompa xmiyanakan yeyi tonajli hasta ijkuak yejuamej yonokuepkej ipan in ueyikalpan. Sakin uelis nenyaskej ipan nemojui.
17 Ijkuak yejuamej xe onkisayaj, okijlijkej:
—Tejuamej tikchiuaskej ijkon ken yotimitstlajtolmakakej ika itokatsin Dios ken yotitechtlajtlanilij. 18 Pero ijkuak tikalakiskej ipan in tlajli, tejua noneki tikpilos sen mekatsintli chichiltik ipan on moventana kampa titechtemoltis. Niman no xkinsentlali nikan mochan motataj, monanaj, mokniuan niman nochi ifamilia motataj. 19 Tla se de yejuamej kisa ipan mochan, tejuamej xtotlajtlakol yes tla omik, yej yejua itlajtlakol yes. Pero tla yakaj de tejuamej kimayaui yejuan nemi mochan, tla ijkon, tejuamej totlajtlakol yes. 20 Niman tla tejua titechtemaktilia, tejuamej xok tikchiuaskej on tlen otitechchiualtij ma timitstlajtolmakakan ika itokatsin Dios.
21 Rahab okiminnankilij:
—Kuajli yes ijkon ken nenkitouaj.
Kemaj ononauatijkej niman yejuamej oyajkej. Sakin on siuatl okipiloj on mekatsintli chichiltik ipan iventana.
22 Niman on omemej tlakamej yejuan oichtakatlajtlachatoj oyajkej ipan on tepemej niman ompa oniyankej yeyi tonajli chika itekitkauan on rey kintejtemouayaj nochiuiyan, pero xokinminextijkej. Kemaj onokuepkej Jericó. 23 Ijkuakon on omemej tlakamej yejuan oichtakatlajtlachatoj ouajtemokej de on tepemej niman okipanokej on río Jordán. Ijkuak oajsikej kampa nemiya Josué, itelpoch Nun, okitlajtlajtouilijkej nochi on tlen impan onochiu. 24 Niman okijlijkej Josué: "Melauak, toTEKO yotechmaktilij nochi on región pampa nochimej yejuan ompa chantij techmakajsij."