Itlajtlakol Acán
7
Pero on israelitas xnochimej okitlakamatkej on tlen Josué okinmijlij. Nemiya sen tlakatl ipan itribu* Judá yejuan otlajtlakoj. Yejua itoka katka Acán, yejuan katka ikoneu Carmi, yejuan katka ixuiu Zabdi niman katka ika okpa ixuiu Zara. Acán okichtek seki tlajtlamach* ipan on ueyikalpan Jericó yejuan ye onkatka para kixoxotoniskej ken uentli para toTEKO. Yejua ika, toTEKO sanoyej okualan intechkopa nochimej on israelitas ipampa on tlajtlakojli.Okintlankej on israelitas
2 Josué okintitlan sekimej tlakamej desde Jericó para ma uiyan ipan on ueyikalpan Hai yejuan nokaua inakastlan Betel kampaka ikisayan tonaltsintli, nisiu Bet-avén. Yejuamej oyajkej niman oichtakatlajtlachatoj ipan on ueyikalpan Hai.
3 Niman ijkuak youajnokuepatoj, okijlijkej Josué: “Xnoneki yaskej nochimej tosoldados ipan on ueyikalpan Hai. Uelis tikintitlaniskej san kanaj 2 mil noso 3 mil tlakamej, pampa xmiyekej tlakamej cuidarouaj on ueyikalpan."
4 Ijkon tej, san 3 mil tlakamej otlejkokej para oteuijsokitoj ne Hai. Pero on tlakamej chanejkej Hai otetlankej, niman okintotokakej on israelitas. 5 Okimiktijkej kanaj 36 israelitas, niman on oksekimej okintojtokakej desde itech itsakuijlou on ueyikalpan hasta ne Sebarim. Kampa uajtemouayaj, ompa okinmiktijkej. Yejua ika, nochimej on israelitas okipolojkej iminyolchikaualis, niman sanoyej onomojtikej.
6 Josué niman on uejueyitlayekankej onotlakentetsayankej ikan miyek ajmantli. Onotlankuatelketskej, niman onopachojkej hasta ipan tlajli ixpan iyekcaja toTEKO, niman okinotemilijkej tlajli ipan intsontekon. Ijki onokajkej hasta otlayouak. 7 Niman Josué okijtoj:
—¡NoTEKO Dios! ¿Tline* otikinkauilij in mokoneuan ma kipanokan on río Jordán? ¿Tlen otitechajuikak san para ma techmiktikan on amorreos? ¡Más kuajli tla titokauaskiaj okse ilado on río Jordán! 8 ¡NoTEKO! ¿Tlinon uelis nikijtos aman ika on israelitas youajcholojtejkej inmixpan imintlauelikniuan? 9 On cananeos niman nochimej oksekimej yejuan chantij ipan in región kimatiskej on tlen yonochiu. Yejuamej uajlaskej techajuijsokiskej san sekan para techajpopoloskej, hasta xok yakaj techelnamikis ipan in tlaltikpaktli. Tla ijkon, ¿Akinon kitlakaitas moueyilis?
10 Niman toTEKO okinankilij:
— Xmotelketsa. ¿Tline ompa on tixakamani ipan tlajli? 11 On israelitas yotlajtlakojkej pampa okichijkej on tlen onikinnauatij maka kichiuaskej. Okuikej itlaj yejuan nonekiya kitlatiskej. Otlachtekkej, otlakajkayakej niman yokiyankej kampa kejeuaj on tlatlamach yejuan inyaxka. 12 Yejua ika, on israelitas xueliskej kinmixnamikiskej imintlauelikniuan, yej ontlatlaksaskej. Aman tej, on israelitas noneki tlapojpoluiloskej. Niman tla nemejuamej xnenkitlatiaj nimantsin on tlen onitlanauatij ma tlatla, nejua xok ninemis nemouan. 13 Aman tej, xmotelketsa niman xkinsentlali nochimej on israelitas. Xkinmijli ma nochipauakan pampa mostla uajlaskej nixpan, niman nejua nemoTEKO Dios ijkin nikijtos: “Nemejuamej israelitas onenkichtekkej on tlen nonekiya nochi nenkimpopoloskej. Niman tla xnimantsin nenkimpopoloskej niman xnenkinkixtiaj nemotech, xuelis nenkintlaniskej nemotlauelikniuan.” 14 Mostla kualkan ma uajla cada tribu*, niman on tribu yejuan nimitsititis kinuajuikas iclanes*. Niman on clan yejuan nimitstitis kinuajuikas ifamilias. Niman on familia yejuan nimitstitis kuajuikas cada tlakatl yejuan nemi ipan on familia. 15 Niman on tlakatl yejuan itech onesis on tlajtlamach* yejuan onemechijlij xpopolokan, xtlatikan iuan nochi ifamilia niman nochi tlen kipiya, pampa yejua xokitlakamat nopacto*, niman pampa ijkon okimpinajtij on israelitas.
ToTEKO okitlajtlakolmakak Acán
16 Uajmostla Josué onokuiteu saniman, niman otlanauatij para cada tribu* ma pano ixpan toTEKO. Niman toTEKO okiteneu itribu Judá.
17 Kemaj Josué okimpanoltijtiaj tlayakapan iclanes Judá cada se, niman toTEKO okiteneu iclan* Zara. Kemaj Josué okimpanoltijtiaj tlayakapan ifamilias Zara, niman toTEKO okiteneu ifamilia Zabdi. 18 Ijkuak on tlakamej, yejuan ifamilia Zabdi opanotiajkej, toTEKO okiteneu Acán. Acán katka itelpoch Carmi, ixuiu Zabdi niman yejua kisaya itech itribu* Judá.
19 Kemaj Josué okijlij Acán:
—Nokoneu, xmoyolkuiti tlinon otikchiu niman xnechijli on tlen melauak ixpan Dios; niman maka itlaj xnechiyanili.
20 Niman Acán okinankilij:
—Melauak, yonitlajtlakoj ixpan toTEKO Dios, iminDios on israelitas. Aman nimitsijlis on tlen onikchiu: 21 Ipan on ueyikalpan Jericó, onikitak sen kualtsin tela yejuan ualeua Babilonia. Niman onikitak 200 tepostomin plata niman se patlachtli oro kanaj tlajko kilo ika yetik. Nejua sanoyej onikuelitak on tlajtlamach*, niman oniknoyaxkatij. Niman oniktlalpacho nokalijtik. On plata oniktlalij hasta tlatsintlan.
22 Josué okintitlan keskimej tlakamej ichan Acán. Yejuamej onotlalokej niman okinextijkej nochi on tlen iyantikatka* ijtik on tlajli. On plata onkatka hasta tlatsintlan. 23 Okixtijkej on tlajtlamach* niman okiktikej itech Josué niman intech on israelitas. Niman ompa okitlalijkej nochi ixpan toTEKO. 24 Kemaj Josué niman nochimej on israelitas okuikakej Acán, ixuiu Zara, ipan on ixtlauatl yejuan itoka Acor. No okiktikej on plata, on kualtsin tela, on tepatlachtli de oro, itlakakoneuan iuan isiuakoneuan, iuakaxuan, ipolokouan, iborregos, ikal niman nochi on tlen iyaxka* katka.
25 Niman Josué okijlij Acán:
—¿Tline topan otikuajkik in ueyi tlajyouilistli? Aman toTEKO no ma mitsmaka sen ueyi tlajyouilistli.
Ijkuak ijkin okijtoj, nochimej on israelitas okitemojmotlakej Acán iuan nochi ifamilia, niman kemaj okintlatijkej iuan nochi on tlajtlamach* yejuan iyaxka. 26 Ipan Acán okitlalijkej sen teolochojli yejuan hasta aman onkaj. Yejua ika ompa sanken* kitokayotiaj iixtlauau Acora. Ijkon otlan itlauel toTEKO intechkopa on israelitas.