On israelitas okitlankej on ueyikalpan Hai
8
ToTEKO okijlij Josué: "Maka xmomojti, yej xmoyolchikaua. Xkinuika nochimej mosoldados ipan on ueyikalpan Hai pampa nejua nimitsmaktilis on rey de Hai iuan ichanejkauan. Niman nemoyaxka*tiskej iminueyikalpan iuan inueyitlalpan. 2 Tejua tikinchiuilis on chanejkej Hai iuan iminrey ken otikchiuilij Jericó iuan irey. Pero aman kemaj uelis nenmoyaxkatiskej* nochi on tlajtlamach* yejuan ompa onkaj iuan nochi iminyolkauan. Aman tej, ichtaka xkintlali sekimej soldados ikuitlapan ika on ueyikalpan para nenkinmichtakauijsokiskej."3 Kemaj Josué okinsentlalij nochimej isoldados para konuijsokiskej Hai. Okintlapejpenij 30 mil tlakamej yejuan más ueliyaj tlauijsokij, niman okintitlan ijkuak tlayoua. 4 Ijkin okinnauatij: "¡Xkakikan kuajli! Xuiyan ikuitlapan ika on ueyikalpan niman ompaka nisiu xmiyanakan. Sa xnemikan listos para nenkinuijsokiskej. 5 Nejua iminuan on soldados yejuan nokauaj, san sekan tiknisiuiskej on ueyikalpan. Kemaj ijkuak yejuamej kisaskej techajuijsokiskej, tontlatlaksaskej ken achtoj otichchijkaj. 6 Yejuamej techtojtokaskej ijkuak tontlatlaksaskej, niman ijkon tikinkixtiskej uejka de on ueyikalpan. Kinemiliskej ika oksejpa ye techtotokatokej ken achtoj otechchiuilijkaj. 7 Kemaj nemejuamej nimantsin nenkisaskej ne kampa nenmiyantokej. Niman kemaj, nenmoyaxkatiskej* on ueyikalpan pampa nemoTEKO Dios mechmakas. 8 Ijkuak nemejuamej yonenkitlankej on ueyikalpan, nenkitlatiskej ijkon ken toTEKO yokijtoj. Xchiuakan pampa in sen tlanauatijli".
9 Kemaj Josué okintitlan, niman oyajkej oniyanatoj entre on ueyikalpan Betel niman Hai kampaka ikalakiyan tonaltsintli de Hai. Pero Josué okipanok on yeuajli ipan on campamento iminuan nochimej on israelitas. 10 Uajmostla Josué onokuiteu sanimantsin, niman okinsentlalij isoldados. Kemaj Josué iminuan on tlajtlajmatkej otlayekantiajkej para okuijsokitoj on ueyikalpan Hai. 11 Nochimej on soldados onejnentiajkej niman oajsikej ixpan on ueyikalpan kampaka norte. Ompa onkaj sen ixtlauatl yejuan kinxelouaya kampa yejuamej nokauayaj itech on ueyikalpan Hai. 12 Josué okititlan 5 mil tlakamej para oniyanatoj entre on ueyikalpan Betel niman Hai kampaka ikalakiyan tonaltsintli de Hai. 13 Ijki tej, cada se oyaj kampa nonekiya, sekimej kampaka ikalakiyan tonaltsintli, niman sekimej onokajkej imelajkan on kalpan kampaka norte. Niman ipan on yeuajli Josué oyaj hasta itlajkotian on ixtlauatl.
14 Ipan on kualkan, on rey de Hai okintak isoldados Josué, niman isijkapan ouajkis iuan isoldados para okinuijsokito on israelitas ipan on ixtlauatl itech ika on río Jordán. Pero xkimatiya ika oksekimej israelitas niyantikatkaj ikuitlapan on iueyikalpan. 15 Josué niman isoldados onochijkej ken nomojtiayaj, niman ontlatlaksakej para ma kintojtokakan on tlakamej de Hai. Yejuamej onotlajtlalojkej* ipan on ojtli yejuan yau xalpatlajkan. 16 Nochimej isoldados on ueyikalpan Hai okinnauatikej para ma kintojtokakan insoldados on israelitas. Niman ika okitojtokakej Josué, oyajkej okitlalkauijkej on ueyikalpan. 17 Nochimej on tlakamej chanejkej Hai niman Betel okintojtokakej on israelitas. Nion se tlakatl xonokau, niman on ueyikalpan iselti okajtejkej. 18 Kemaj toTEKO okijlij Josué: "Xkontlachalti iyakapits molanza kampaka onkaj on ueyikalpan Hai, niman ijki xkintiti mosoldados para ma kalakikan ipan on ueyikalpan, pampa nejua nimitsmaktilia." 19 Kemaj on tlakamej yejuan niyantikatkaj nimantsin ouajkiskej niman okalakkej ipan on ueyikalpan. Niman ijkuak yokalakkej, nimantsin okitlatijkej on ueyikalpan.
20 Ijkuak on tlakamej de Hai ontlachixkej inkuitlapan, okitakej ika ipokyo on inueyikalpan tlejkotikatka tlakpak. Yejuamej xok kitayaj kanika nomanauiskej pampa on soldados israelitas yejuan kintojtokayaj ipan on xalpatlajkan, impan ouajnokuepkej niman opeu kinuijsokij. 21 Ijkon tej, ijkuak Josué niman on soldados israelitas okitakej ika on yejuan oniyankaj ikuitlapan on ueyikalpan yokalakaj ipan on ueyikalpan, niman ye kitlatijtikatkaj, no opeu kinuijsokij on tlakamej de Hai. 22 Kemaj on soldados israelitas yejuan okalakkej ipan on ueyikalpan, okiskej ompa niman no opeu kinuijsokij on soldados de Hai. Yejua ika, on tlakamej chanejkej ipan on ueyikalpan Hai xok kanaj ouel ocholojkej pampa kinyeualojtikatkaj on israelitas. Niman on israelitas otlan kinmiktiaj nochimej on chanejkej ipan on ueyikalpan Hai. 23 Sa xokimiktijkej on rey de Hai yejuan okajsikej, niman okuikakej ixpan Josué.
24 Sakin ijkuak on israelitas nochimej yokiminmimiktijkej on tlakamej de on ueyikalpan Hai yejuan kintojtokayaj ipan on xalpatlajkan, nochimej on israelitas oyajkej ipan on ueyikalpan Hai niman otlan kiminmiktiaj yejuan ompa onokajkaj. 25 Ipan on tonajli omikkej 12 mil tlakamej niman siuamej yejuan nemiyaj ipan on ueyikalpan Hai. 26 Ijkon onochiu pampa Josué kontlachaltijtikatka iyakapits ilanza kampaka onkaj on ueyikalpan Hai hasta kaman otlan kiminmiktiaj nochimej on chanekej. 27 On israelitas okinnoyaxkatijkej nochi iminyolkauan niman on tlajtlamach* yejuan onkatka ipan on ueyikalpan ken toTEKO yokijlijka Josué ma kichiua. 28 Niman Josué otlan kitlatia on ueyikalpan Hai niman xok itlaj okajkej. Niman hasta aman ijki onkaj. 29 Kemaj Josué okajkopiloj on rey de Hai ipan sen kojtli, niman ompa onokau hasta ijki otiotlakilij. Niman ijkuak ye kalaktikatka tonaltsintli, Josué otlanauatij ma kitemoltikan imikatlakayo niman ma kitlajkalitij kampa ikalakiyan on ueyikalpan. Niman ipan okitlalijkej sen teolochojli. In teolochojli sanken* onkaj.
Josué okinkakistilij on israelitas iley toTEKO ne ipan on tepetl Ebal
30 Kemaj ipan on tepetl Ebal, Josué okichijchiu sen tlaixpan* para toTEKO iDios Israel, 31 ijkon ken Moisés, itekitkau toTEKO, okinnauatij on israelitas ma kichiuakan. Ijki okichijchijkej on tlaixpan* ika temej yejuan xtlaxintin, ken tlajkuilolnestikaj ipan on amamoxtli* de iley Moisés. Kemaj on israelitas okimakakej toTEKO uentin yejuan nochi tlatla ipan on tlaixpan* niman no okimakakej okseki uentin para yoltlalilistli yejuan xnochi tlatla yejuan on israelitas okikuakej se parte. 32 Kemaj inmixpan nochimej on israelitas Josué okijkuiloj ipan on temej de on tlaixpan*, on leyes yejuan Moisés okinmakaka. 33 Kemaj nochimej on iuejkakoneuan Israel, sanken* on chanejkej niman xchanejkej, iminuan nochimej on uejueyixtokej, on tlayekankej niman on teyolkuitijkej, onotelketskej inajnakastlan iyekcaja toTEKO yejuan kipiya on pacto*. Onotelketskej imixpan on levitas yejuan kechpanouaj ijkuak nejnemij. Tlajkotipan de yejuamej onotelketskej inakastlan on tepetl Gerizim niman on okse tlajkotipan nemiyaj inakastlan on tepetl Ebal. Ijkon okichijkej ken yeuejkaui otlanauatijka Moisés, itekitkau toTEKO, para okintiochijkej on israelitas.
34 Kemaj Josué chikauak okinomachtij on amamoxtli* kampa onkaj on tlanauatiltin yejuan toTEKO okinmakaka. Nochi okinkakistilij de on tlatiochiualistin niman de on tlaueliltin yejuan onkaj ipan on ley. 35 Josué xokau nion se tlajtojli yejuan okijkuilojka Moisés. Nochi okinkakistilij on israelitas yejuan ompa nemiyaj nochi inuan siuamej, kokonej niman on yejuan xchanejkej yejuan chantiyaj intsajlan.