Israel okichiu pacto* iminuan on Gabaonitas para tlajsojkaiknijtin yeskej
9
On reyes hititas, amorreos, cananeos, fereseos, heteos niman jebuseos okimatkej on tlen onochiu. In reyes chantiyaj inakastlan on río Jordán kampaka ikalakiyan tonaltsintli, ipan on tepemej, ipan on ixtlauatl itenko on mar Mediterraneo, niman hasta on regiones de Líbano. 2 Kemaj nochimej onotlajtolmakakej para kuijsokiskej Josué niman on israelitas. 3 Pero ijkuak on yejuan chantiyaj ipan on kalpan Gabaón no okimatkej tlinon okinchiuilij Josué on uejueyikalpanmej Jericó iuan Hai, 4 okinemilijkej kenijki uelis kinkajkayauaskej on israelitas para ijki nomanauiskej. Yejua ika, okuikej tlajtlamach* yejuan yoijsoliu, niman onochijkej ken uejka oualejkej. Okitlalijkej costales isoltikej ipan impolokouan. Niman no okuikej kuetlaxtekomamej yejuan ijsoltikej niman tlamanilijlojkej para impan okitekakej vino. 5 Okintlalijkej kaktin yejuan yoijsolijkej niman tlamanilijlojkej. No onotlakentijkej ikan tlakentin yejuan yoijsolijkej niman yotsajtsayankej. Niman okiktikej pan yejuan uaki niman yopoxkau niman yokuepitsiu. 6 Ijkuak oajsikej ipan incampamento on israelitas ne Gilgal, okijlijkej Josué niman on israelitas:—Tejuamej tiualeuaj sanoyej uejka. Xchiuakan sen pacto* de tlajsojkaiknijtin touan.
7 Niman on israelitas ijkin okinnankilijkej on Gabaonitas:
—Manin nemejuamej nenchantij nanika nisiu. Tla ijkon, xuelis tikchiuaskej sen pacto* nemouan.
8 Pero yejuamej okijlijkej Josué:
—Tejuamej titotemakaj nenmotech ken nemotekitkauan.
Kemaj Josué okintlajtoltij:
—¿Nenakinomej niman kanon nenualeuaj?
9 Niman yejuamej okinankilijkej:
—Otiualejkej sanoyej uejka, pampa otikakej on tlen nemoTEKO Dios okichiu nemopampa. Otikmatkej nochi on tlen yejua okichiu ipan on tlajli Egipto, 10 niman nochi on tlen okinchiuilij on omemej reyes amorreos ne okse ilado on río Jordán —Sehón on rey de Hesbón niman Og rey de Basán yejuan chantiyaj ipan on kalpan Astarot. 11 Yejua ika tej, totlayekankauan niman tochanejkauan otechijlijkej ma tikuikan tlen nonekis tikuaskej ipan ojtli, niman ma tiuajlakan ma temechitakij. Okinekkej ma temechijlikij ika tiknekij tinemotekitakauan yeskej, niman ika tiknekij tikchiuaskej sen pacto* de tlajsojkaiknijtin nemouan. 12 Ipan on tonajli ijkuak otiualejkej para otemechtejtemokoj, in pan sanken* totonki katka. Aman uaki, niman yopoxkau. 13 No ijki in kuetlaxtekomamej yejuan ipan tikeuaj vino, no yenkuikej katkaj ijkuak otikintemiltijkej, niman aman yotsajtsayankej. Niman no ijki no yoijsolijkej totlakeuan niman tokakuan, pampa sanoyej uejka otiuajnejnenkej.
14 On israelitas okijitakej on tlakuajli yejuan kuajkiyaj on gabaonitas, pero xachtoj okitlajtoltijkej iminTEKO tlinon kichiuaskej. 15 Kemaj Josué okichiu sen pacto* de tlajsojkaiknijtin iminuan para kuajli nouikaskej niman xkinmiktiskej. No ijki on oksekimej tlayekankej israelitas onotlajtolmakakej ika itokatsin Dios ika no ijki kichiuaskej.
16 Niman ijkuak yopanok yeyi tonajli, on israelitas okimatkej ika on gabaonitas ualeuayaj nisiu niman chantiyaj san ompaka nisiu kampaka nemiyaj. 17 Kemaj on israelitas oyajkej okintejtemotoj on gabaonitas, niman ipan yeyi tonajli oajsikej ipan iminueyikalpanuan yejuan imintoka katkaj Gabaón, Cafira, Beerot niman Quiriat-jearim. 18 Pero on israelitas xokinmiktijkej, pampa imintlayekankauan yonotlajtolmakakaj ika itokatsin Dios ika xkinmiktiskej.
Yejua ika, nochimej on israelitas opeu tlamach kinmijtouiliaj on tlayekankej israelitas. 19 Pero on tlayekankej okinmijlijkej on israelitas:
—Tejuamej otitotlajtolmakakej ika itokatsin Dios ika xtinkinmiktiskej. Yejua ika aman xuelis itlaj tikinchiuiliskej. 20 Ijki tikinkauaskej, pampa tla xtikchiuaskej on tlajtolmakalistli yejuan otikijtojkej ixpan toTEKO Dios, yejua sanoyej kualanis touan.
21 Ijkon tej, on tlayekankej israelitas otlanauatijkej maka ma kinmiktikan on Gabaonitas, yej ma kintlalikan ken kuajkuaukej niman asakakej para nochimej on israelitas. Niman on tlayekankej ijki okichijkej ken yonotlajtolmakakaj.
22 Kemaj Josué okinnots on gabaonitas, niman okintlajtoltij:
—¿Tline onentechkajkayajkej ijkuak onentechijlijkej ika uejka nenualeuaj, niman aman tikitaj ika nenchantij sano nikan? 23 Yejua ika tej, pampa ijkon onenkichijkej, toTEKO Dios yomechtlauelij niman nochipa nentotekitkauanyeskej. Nenkuajkuauiskej niman nenasakaskej para ipan itiopan toTEKO.
24 Niman yejuamej okinankilijkej Josué:
—Tejuamej otikchijkej pampa sanoyej titomojtiayaj tla nentechmiktiskiaj. Otikakkej ika nemoTEKO Dios yokinauatijka Moisés itekitkau ma mechmaka nochi in región niman ma kimpopolo nochimej yejuan nikan chantij. 25 Aman nikan tinemij nemomak. Xtechchiuakan tlinon nenkitaj kuajli.