Rubén, Gad niman on itlajko tribu* Manasés onokuepkej para iminchan
22
Kemaj Josué okinsentlalij itribu* Rubén, itribu* Gad niman on itlajko tribu Manasés, 2 niman okinmijlij: "Nemejuamej yonenkichijkej nochi yejuan omechnauatij Moisés, itekitkau toTEKO, niman onenkintlakamatkej nochi notlanauatiluan. 3 Nochi in tonaltin yejuan yopanok, niman hasta aman, nemejuamej xonenkinkajkej nemokniuan israelitas, niman onenkichijkej nochi on tlen nemoTEKO Dios omechnauatij. 4 Aman nemoTEKO Dios yokichiu tlen okiprometeroj niman yokinmakak seuilistli nemokniuan israelitas. Aman tej, xuiyan nemochan, ipan on tlaltin yejuan Moisés itekitkau toTEKO omechmakak kampaka ikisayan tonaltsintli de on río Jordán. 5 San nemechtlajtlanilia xmotlajkalikan xchiuakan on tlanauatijli niman on ley yejuan omechmakak Moisés itekitkau toTEKO. Xtlajsojtlakan nemoTEKO Dios, niman xmouikakan nochipa ipan iojui. Xtlakamatikan nochi itlanauatiluan. Xtekipanokan ikan nochi nemoyojlo niman ikan nochi nemoalma."6 Ijkuak Josué otlan ijkin kinmijlia, okintiochiu, niman yejuamej ononauatijkej. Kemaj oyajkej iminchan.
7 (Moisés yokinmakaka on tlaltin itlajko tribu* Manasés, ipan on región de Basán. Niman on okse itlajko tribu Manasés, Josué okiminmakak on tlaltin intech on israelitas kampaka ikalakiyan tonaltsintli de on río Jordán.) Ijkuak Josué okintiochiu niman okinnauatij ma uiyan iminchan, 8 no okinmijlij: “Aman nemejuamej nenyauij nemochan ikan miyek tlajtlamach*. Nenkipiyaj sanoyej miyek yolkej, plata, oro, bronce , hierro niman tlakentin. Ijkuak nenmajsiskej, seki xkinmakakan nemokniuan in yejuan onenkinkuilijkej nemotlauelikniuan.”
9 Ijki tej itribu Rubén, itribu Gad niman itlajko tribu Manasés okiskej intech on oksekimej israelitas ne Silo ipan on iueyitlalpan Canaán, para onokuepkej ipan on tlajli ipan iueyitlalpan Galaad kampa kipiyayaj tlaltin ijkon ken toTEKO otlanauatij itechkopa Moisés.
On tlaixpan* itech on río Jordán
10 Ijkuak itribu* Rubén, itribu Gad niman on itlajko tribu Manasés oajsikej itenko on río Jordán, kampa sanken* katka ipan on ueyitlalpan Canaán, okichijchijkej itech on río sen ueyi tlaixpan*. 11 Ijkuak on oksekimej israelitas okimatkej ika on tribus de Rubén, Gad niman itlajko tribu Manasés okichijchijkej sen tlaixpan, itech itlalnamikiyan on tlajli de Canaán, itech on río Jordán, ipan iminueyitlalpan on israelitas, 12 onosentlalijkej ne Silo para yaskej kominuijsokiskej on imikniuan. 13 Pero achtoj okititlankej Finees yejuan itelpoch on tiopixki Eleazar, para ma uiya ne Galaad kampa nemiyaj on tribus de Rubén, Gad niman itlajko tribu Manasés. 14 Iuan oyajkej majtlaktlimej on uejueyitlayekankej israelitas, se tlayekanki de cada tribu yejuan no se tlayekanki katka itech se clan. 15 Nochimej yejuamej oyajkej Galaad kampa nemiyaj on tribus de Rubén, Gad niman itlajko tribu Manasés, niman okinmijlijkej:
16 —Tejuamej titlajtouaj intenkopa nochimej on ikoneuan toTEKO. ¿Tline nenkinekij nenkauaskej toTEKO ika on tlen nenkichiuaj? ¿Tline onenkichijchijkej sen tlaixpan* yejuan ika nenkiteititiaj ika xipan nenkitaj on Dios de Israel? 17 ¿Xnenkelnamikij on tlajtlakojli yejuan sekimej okichijkej nepa kampa itoka Peora, niman toTEKO otechcastigaroj ikan se ueyi kokolistli, yejuan hasta aman tikijyouiyaj? 18 ¿Xnenmixtojtomij yejua ika on? ¿Aman nemejuamej no ijki nenkinekij nemoxeloskej itech toTEKO? Tla aman ixpan toTEKO nemoyoltechikauaj, mostla yejua kualanis intechika nochimej on israelitas. 19 Tla nenkitaj ika on ueyitlalpan yejuan omechmakakej xchipauak para nenkimauistiliskej toTEKO, xuajlakan nanika ipan itlal toTEKO kampa onkaj itiopan. Xkuikan sen ueyitlalpan totech. Pero maka xmoyoltechikauakan itech toTEKO nion touan, ika nenkichijchiuaj sen tlaixpan yejuan xitlaixpan toTEKO Dios. 20 Xkelnamikikan ika Acán, ikoneu Zara, otlajtlakoj ixpan toTEKO ijkuak okimayau tlen toTEKO otlanauatijkaj para ma kixoxotonikan. Niman san ipampa itlajtlakol, toTEKO okualan iminuan nochimej on israelitas. Xsan Acán omik ipampa itlajtlakol.
Okichijchijkej on tlaixpan* pampa kitlajsojtlaj toTEKO
21 Kemaj on tribus de Rubén, Gad niman on itlajko tribu Manasés okinnankilijkej on tlayekankej israelitas, niman okinmijlijkej:
22 —ToTEKO Dios, yejua melauak ueyixtikaj xken on oksekimej dioses. Yejua kimatstikaj ika in tlaixpan* otikchijchijkej xpampa tla yotitoyoltechikajkej noso para tiktlalkauiskej. Yejua kimatstikaj, niman tiknekij nenmochimej xmatikan ika xijki ken nenkijtouaj. Niman tla xmelauak, tla ijkon, xtechmiktikan. 23 Tla otikchijchijkej in tlaixpan para tiktlalkauiskej toTEKO, noso para tikinmakaskej uentin yejuan tlatla, noso de trigo noso cebada , noso uentli para yoltlalilistli, tla ijkon, ma toTEKO techcastigaro. 24 Otikchijchijkej pampa xtiknekij se tonajli nemouejkakoneuan kinmijliskej touejkakoneuan: ‘Nemejuamej xnenkipiyaj tline nenkimauistiliskej toTEKO, iminDios on israelitas. 25 ToTEKO okitlalij on río Jordán para techxelos de nemejuamej yejuan itribu Rubén niman itribu Gad. Nemejuamej xnenkipiyaj tline nenkimauistiliskej toTEKO.’ Tla ijkon nochiuas, kas nemouejkakoneuan kichiuaskej para touejkakoneuan xok kimauistilijkej toTEKO. 26 Yejua ika otiknemilijkej tikchijchiuaskej sen tlaixpan*, pero xpara ipan tiktlatiskej uentli para toTEKO noso tiktemakaskej okseki uentli. 27 Yej para nemejuamej niman tejuamej niman touejkakoneuan ma tikelnamikikan ika tejuamej uelis tikmauistiliskej toTEKO, niman uelis tikuentlaliskej uentin yejuan tlatlas, uentin para on tlajtlakojli niman de yoltlalilistli. Ijki, nemouejkakoneuan xuelis kinmijliskej touejkakoneuan: “Nemejuamej xnenkipiyaj tline nenkimauistiliskej toTEKO”. 28 Tla yakaj ijkon techijlia, noso ijkon kimijliaj touejkakoneuan, tejuamej uelis ikin titenankiliskej: “Xkitakan, toachtojtajuan okichijchijkej in itlaixpan toTEKO xpara ipan kintlatiskej uentin, nion para ipan tiktemakaskej okseki uentin, yej okichijchijkej san para nesis ika nemejuamej niman tejuamej, san sekan tinemij.” 29 "Maka kaman tiknemiliskej titoyoltechikauaskej itech toTEKO, noso tiktlalkauiskej, nion tikchijchiuaskej okse tlaixpan kampa tikinuentlaliskej uentin yejuan tlatlas, uentli de trigo noso cebada, noso okseki uentin, aparte de itlaixpan* toTEKO Dios yejuan onkaj ixpan on tabernáculo* kampa nemi Dios."
30 Ijkuak on tiopixki Finees, iuan imintlayekankauan on israelitas, yejuan no tlayekankej de on clanes yejuan iuan yayaj, okakkej on tlen okijtojkej on tribus de Rubén, Gad, niman on itlajko tribu Manasés sanoyej okuelkakkej. 31 Kemaj Finees, itelpoch on tiopixki Eliazar, okinmijlij:
—Pampa nemejuamej xonemoyoltechikajkej itech toTEKO, aman tikmatij ika toTEKO nemi touan, niman xtechcastigaros.
32 Ijkuak nochi in yonochiu, Finees niman on yejuan iuan yayaj ononauatijkej niman okiskej de on tlajli Galaad para oyajkej ipan on tlajli Canaán, kampa nemiyaj on oksekimej israelitas. Niman ijkuak on israelitas yejuan nemiyaj Canaán okintlajtlajtouilijkej kenijki otenankilijkej on yejuan de oksekimej tribus, 33 okuelkakej on tlen okinmijlijkej, niman okiueyilijkej toTEKO Dios. Kemaj xokaman okinemilijkej kinuijsokiskej on tribus de Rubén niman de Gad nion para kinxoxotoniliskej iminueyitlalpan. 34 Inuejkakoneuan Rubén niman de Gad okitokayotijkej on tlaixpan: "Teixpantilistli” pampa okijtojkej: " In tlaixpan ken sen testigo para techelnamiktis ika tinochimej tikpiyaj san se yejua toTEKO Dios."