Sa ika nochi itlajtol Josué
23
Ijkuak yopanok miyek tonaltin ika toTEKO okichiu para on israelitas xok okipixkej nouijsokilistli iminuan intlauelikniuan, niman ika Josué ye ueuentsin katka, 2 okintekuitlan nochimej on israelitas inuan on ueuetkejtlayekankej, intlayekankauan, teyolkuitijkej niman on uejueyi tekiuajkej niman okinmijlij: “Nejua sanoyej ye niueuentsin. Nikpiya miyek xipan. 3 Nemejuamej yonenkitakej nochi on tlen toTEKO okinchiuilij nochimej on tlakamej yejuan mechixnamikiyaj. San nemoTEKO Dios otlauijsok nemopampa. 4 Nejua onemechmajmakak ikan sorteo nochi on tlaltin itech on río Jordán hasta on Mar Mediterráneo kampaka ikalakiyan tonaltsintli. Nejua yonemechxelouilij on uejueyitlalpanmej yejuan yotikintoyaxkatijkej teuan on yejuan poliui tikintoyaxkatiskej. 5 ToTEKO kinkixtis on yejuan chantij ipan on tlaltin niman kemaj nenkinmoyaxkatiskej, ijkon ken nemoTEKO Dios yomechprometerouilij.6 “Xchiuakan kanika para nenkichiuaskej on tlen tlajkuilolnestikaj ipan on amamoxtli* de iley Moisés. Cada tlanauatijli kuajli xchiuakan. 7 Maka xmonelokan iminuan on oksekimej tlakamej yejuan sanken* chantij ipan in tlajli. Maka xkinmauistilikan imindioses, nion maka xkintlakamatikan, nion maka xteneuakan imintoka on dioses, niman no maka xkintestigotlalikan. 8 Yej nochipa xtokakan nemoTEKO Dios, ijkon ken nenkuajchijtiuij hasta aman. 9 ToTEKO yokinkixtij nemixpan nemotlauelikniuan yejuan sanoyej tojlamej niman kojtikej. Niman hasta aman xakaj ueli mechixnamiki. 10 San se de nemejuamej uelis kintotokas se mil tlakamej, pampa nemoTEKO Dios tlauijsoki nemopampa, ijkon ken yejua yokijtoj. 11 Aman tej, xmotakan sano nemejuamej, niman xtlajsojtlakan nemoTEKO Dios. 12 Tla nemejuamej nenkitlalkauiskej Dios niman nemoneloskej iminuan on tlakamej yejuan sanken* chantij ipan in tlaltin, niman tla nemejuamej nenmonamiktiskej iminuan, 13 xmatikan ika nemoTEKO Dios xok kinkixtis nemotech. Yej kichiuas para ma mechtlajkalikan ipan tlajtlakojli niman yeskej ken itlaj kuetlaxtli yejuan ika mechmailiskej nemotlakapan. No, yeskej ken uitstli ipan nemixtololojuan, hasta kaman tlamis nenmikiskej ipan on kuajli tlajli yejuan nemoTEKO Dios yomechmakak.
14 "Nejua ye nimikis, pero achtoj nikneki kuajli xkitakan ikan nochi nemoyojlo, niman ikan nochi nemoalma, ika nochi yonochiu on tlen kuajli toTEKO omechprometerouilij. Nochi tlen okiprometeroj okichiu, nion se xokikau, yej nochi okichiu. 15 Pero ijkon ken onochiu nochi on tlen kuajli yejuan toTEKO omechprometerouilij, no ijki yejua mechajtitlanilis nochi on xkuajli tlajtlamach* yejuan yejua omechmelajkaijli ika mechchiuilis. Ijkon mechchiuilis hasta kaman tlami nenmijmikij ipan on kuajli tlajli yejuan yejua omechmakak. 16 Tla xnenkitlakamatij on pacto* yejuan toTEKO okichiu nemouan, tla nenkinmauistiliaj oksekimej dioses niman tla nemotlakuantelketsaj inmixpan, toTEKO sanoyej kualanis nemouan, niman yejua nimantsin mechpopolos ipan in kuajli tlajli yejuan yejua omechmakak."