Josué ononauatij iminuan on israelitas
24
Josué okinsentlalij nochimej intribus on israelitas ipan on ueyikalpan Siquem. Okinnots on uejueyixtokej, tlayekankej, teyolkuitijkej niman nochimej on oksekimej tlapaleuijkej intech on israelitas. Kemaj ixpan Dios, 2 ijkin okinmijlij on israelitas:—In yejua on tlen kijtoua toTEKO Dios yejuan iminDios on israelitas: "Sanoyej yeuejkaui, Taré niman ikoneuan, Abraham niman Nacor, yejuan ikoneuan nemoachtojtajuan, chantiyaj okse ilado on río Éufrates, niman kinmauistiliayaj oksekimej dioses. 3 Niman nejua onikixtij Abraham ne itech on río Éufrates niman onikyekan ipan nochi on tlajli Canaán. Nejua onikchiu para ma miyekiyakan ikoneuan. Achtoj onikmakak Isaac. 4 Niman Isaac onikmakak ome ikoneuan, Jacob niman Esaú. Niman Esaú onikmakak iueyitlalpan Seir kampa tepeyoj. Pero Jacob iuan ikoneuan oyajkej ipan on tlajli Egipto. 5 Kemaj nejua oniktitlan Moisés iuan Aarón. Niman on egipcios sanoyej onikintlajyouiltij hasta kaman onemechkixtij ipan on tlajli. 6 Ijkuak nemouejkatajuan okiskej de on tlajli Egipto, on egipcios ikan imincarretas de guerra niman imincaballos okintojtokakej hasta itech on Mar Rojo. 7 Pero nemouejkatajuan onechtsajtsilijkej, niman nejua onikintsakuilij on egipcios ika sen tlayouajlotl. Niman kemaj onikchiu para on mar impan ma notsakua on egipcios niman okinapachoj. Nemejuamej onemixpantik nochi on tlen onikchiu ne Egipto.
"Sakin nemejuamej onenkistinenkej miyek xipan ipan on xalpatlajkan 8 hasta onemechajuikak ipan imintlal on amorreos, kampaka ikisayan tonaltsintli de on río Jordán. Yejuamej omechuijsokkej, pero nejua onemechpaleuij para onenkintlankej, niman onemoyaxkatijkej imintlal. 9 Kemaj Balac, ikoneu Zipor yejuan iminrey katka on moabitas, omechuijsokiko. Balac okitekuitlan Balaam, ikoneu Beor, para ma mechtlaueli. 10 Pero nejua xonikauilij Balaam ma mechtlaueli, yej miyekpa omechtiochiu niman ijki onemechmanauij. 11 Kemaj nemejuamej onenkipanokej on río Jordán, niman onemajsikej hasta ipan on ueyikalpan Jericó. On chanejkej Jericó omechuijsokkej, pero nejua onikchiu para nemejuamej onenkintlankej. On amorreos, ferezeos, cananeos, heteos, gergeseos, heveos niman jebuseos no omechuijsokkej, pero nejua onikchiu para nemejuamej xkintlanikan. 12 On omemej reyes amorreos xonenkintlankej nemejuamej ikan nemoespadas nion ika nemoarcotlaminal. Yej, nejua onikuajtitlan sanoyej miyek sayolimej yejuan tekuanimej intoka tábanos niman okintotokakej, niman ijki yejuamej ocholojtejkej ijkuak xe nemajsiyaj. 13 Nejua onemechmakak on tlaltin yejuan xonenkitekitkej, niman onemechmakak uejueyikalpanmej yejuan xonenkinchijchijkej. Aman ompa nenchantij. Niman nenkikuaj uvas yejuan kisa de nemouvasyoj niman itlakyo olivo de nemoolivojkojyoj yejuan xonenkintôkakej."
14 Kemaj, Josué okinmijlij:
—Ipampa nochi tlen yokichiu toTEKO, xtlakaitakan niman xtekipanokan ikan nochi nemoyojlo. Xkintlalkauikan on dioses yejuan nemouejkatajuan okinmauistilijkej ipan iokse lado on río Éufrates, niman ipan on tlajli Egipto. Nemejuamej xtekipanokan san toTEKO. 15 Pero tla xnenkinekij nenkitekipanoskej toTEKO, xtlapejpenikan aman akinon nenkitekipanoskej, tla on dioses yejuan nemouejkatajuan okintekipanojkej ne iokse lado on río Éufrates, noso imindioses on amorreos yejuan chantij ipan in tlajli. Pero xmatikan ika nofamilia niman nejua tiktekipanoskej toTEKO.
16 Kemaj nochimej on israelitas otlanankilijkej:
—Xkaman tiktlalkauiskej toTEKO para tikintekipanoskej oksekimej dioses. 17 ToTEKO yejua otechkixtij tejuamej niman toachtojtajuan ipan on tlajli Egipto kampa tiesclavos katkaj. Yejua okichiu miyek uejueyi tlamauisoltin tixpan. Yejua otechejeu niman otechmanauij intech totlauelikniuan ipan toojui, chika tipanouayaj ipan miyek naciones. 18 ToTEKO okinkixtij toyakapan nochimej on tlakamej yejuan chantiyaj ipan on tlalpamej kampa tipanotiayaj, niman no okinkixtij on amorreos yejuan chantiyaj nikan ipan in tlajli. Yejua ika, tejuamej no tiktekipanoskej toTEKO pampa yejua toTEKO Dios.
19 Pero Josué okinmijlij:
—¿Nenkuitiaj nenueliskej nenkitekipanoskej toTEKO?, pampa yejua sen Dios yektli. Yejua xkijyouis kitas nenkinmauistiliaj oksekimej dioses, nion yejua xmechijyouilis nemoxompayejyeualis niman nemotlajtlakoluan. 20 Tla nemejuamej nenkitlalkauiyaj niman nenkintekipanouaj oksekimej dioses, toTEKO mechchiuilis on tlen xkuajli, niman mechpopolos maski miyek yokichijka nemopampa tlen kuajli.
21 Pero nochimej on israelitas okinankilijkej Josué:
—Xkaman ijkon tikchiuaskej. Tejuamej tiktekipanoskej san toTEKO.
22 Kemaj Josué okinmijlij:
—Aman sano nemejuamej nemixpanti ika yonenkitlapejpenijkej nenkitekipanoskej toTEKO.
Kemaj otlanankilijkej:
—Kemaj, sano tejuamej tixpanti.
23 Josué no okinmijlij:
—Tla ijkon, xkinkixtikan nochimej on yejuan xmelauak dioses yejuan onokej nemotsajlan, niman ikan nochi nemoyojlo xmokuepakan itech toTEKO Dios yejuan iminDios on israelitas.
24 Niman nochimej on israelitas okinankilijkej Josué:
—Tejuamej san toTEKO Dios tiktekipanoskej niman tikchiuaskej san on tlen yejua technauatis.
25 Sano ipan on tonajli, ompa ne Siquem, Josué okichiu sen pacto* iminuan on israelitas, niman okinmakak on tlanauatiltin niman on leyes. 26 Niman Josué okijkuiloj nochi in tlanauatiltin niman leyes ipan on amamoxtli* de ileyes Dios. Kemaj okikuik sen ueyi tetl niman okitelkets itsintlan on auakojtli yejuan onkatka nisiu itech itiopan toTEKO. 27 Kemaj Josué okinmijlij nochimej on israelitas:
—In tetl ixpanti nochi tlen toTEKO yotechijlij. Yejua ika, tla xnenkichiuaj ken yonenkijtojkej, yejua mechteixpanuis.
28 Kemaj Josué okintitlan on israelitas cada se ipan iueyitlalpan.
Josué omik
(Jue. 2.6-10)
29 Kemaj san xuejkajtika omik Josué, itekitkau toTEKO, yejuan ikoneu katka Nun. Omik ijkuak kipayaya 110 xipan. 30 Okitokakej ipan itlal, ne Timnat-sera, yejuan onkaj ipan on itepeyoj Efraín, kampaka norte de on tepetl Gaas.
31 On israelitas okitekipanojkej toTEKO chika sanken* nemiya Josué, niman chika sanken* nemiyaj nochimej on uejueyitlayekankej yejuan kimatstikatkaj nochi on tlen toTEKO okichiu impampa on israelitas.
Okintlaltokakej iomiyouan José
32 Iomiyouan José yejuan on israelitas okuajkikej desde Egipto, okintlaltokakej ne Siquem. Okintlaltokakej ipan on tlajli yejuan Jacob okinkouilijka ikoneuan Hamor, yejuan itataj katka Siquem, ika 100 plata tomin. Niman sakin* in tlajli okinmakakej iuejkakoneuan José.
On tiopixki Eleazar omik
33 Ijkuak Eleazar itelpoch Aarón omik, okitokakej Guiveá kampa onkatkaj tepetsitsimej yejuan iyaxka* katka Finees itelpoch niman nokauaya ipan on itepeyoj Efraín.