Levítico
On uentli yejuan tlatla
1
ToTEKO okinots Moisés ipan on tabernáculo* kampa yejua nemi,
niman okijlij:
2 “Xkinmijliti on israelitas in tlanauatiltin.
Ijkuak yakaj nechmakas sen uentli de yolki nejua nemoTEKO,
noneki nechajuikilis sen uakax,
sen borrego noso sen chivo.
3 ’Tla yakaj nechmakas sen uentli yejuan nochi tlatla,
noneki nechmakas sen okichuakax yejuan xkanaj tlakokojli* ipan itlakayo.
Para uelis nikselisa,
noneki kuajuikas niman nechixpantilis nejua nemoTEKO,
kampa ikalakiyan on tabernáculo* kampa nejua ninemi.
4 On tlakatl yejuan kuajuikas kitlalis ima ipan itsontekon on yolki.
Ijkuak ijkon kichiuas,
on yolki kiselilis itlajtlakoluan on tlakatl,
niman itlajtlakoluan kintlapojpoluiliskej.
5 Kemaj on tlakatl kechkoyonis on okichuakax nixpan nejua nemoTEKO.
Kemaj itelpochuan Aarón,
on tiopixkej,
kuiskej on yestli niman kajuichiskej tlapani niman ipan nochi ilados on tlaixpan*,
yejuan onkaj nisiu itsakuijlou on tabernáculo* kampa nejua ninemi.
6 Niman on yejuan kitemaka on yolki para on uentli yejuan nochi tlatla,
kixtilis ikuetlaxyo* niman kitejtekis on yolki.
7 Kemaj on tiopixkej kitlaliskej miyek kojtli* ipan on tlaixpan* niman tlatlatiskej,
8 niman ipan kitlaliskej nochi on nakatl tlatejtektli de on yolki iuan itsontekon niman ichajka de ikuetlaxkol.
9 Yejuan kitemaka on uentli yejuan tlatlas,
kipajpakas on tlajtlamach* yejuan ijtik kuika niman imetskojyouan on yolki.
Niman on tiopixki kitlalis nochi ipan on tlaixpan*.
Ijki nochiuas sen uentli yejuan nochi tlatlas,
niman ajuiyak yes,
nechyolpaktis nejua nemoTEKO.
10 ’Tla on yolki yejuan kitemakas para uentli yejuan nochi tlatlas,
kixtia itech iborregos noso itech ichivos,
noneki yes okichtli yejuan xkanaj tlakokojli* ipan itlakayo.
11 Ma kechkoyoni kampaka norte ika de on tlaixpan*,
nixpan nejua nemoTEKO.
Niman itelpochuan Aarón,
on tiopixkej,
kajsiskej iyesyo on yolki niman kajuichiskej tlapani niman ipan inajnakastlan on tlaixpan*.
12 Kemaj on tlakatl kitejtekis on yolki,
niman kemaj on tiopixki kitlalis on nakatlatejtektli ipan on kojtli* yejuan tlikuitikaj ipan on tlaixpan* iuan itsontekon niman ichajka on ikuetlaxkol.
13 Kemaj on yejuan kitemaka on yolki,
kipajpakas on tlajtlamach* yejuan ijtik kuika niman imetskojyouan.
Niman on tiopixki kitlatis nochi ipan on tlaixpan*.
Ijki nochiuas sen uentli yejuan nochi tlatla,
niman ajuiyak yes,
nechyolpaktis nejua nemoTEKO.
14 ’Tla kuentlalis sen tototl yejuan tlatlas para nechtlakaitas nejua nemoTEKO,
tla ijkon,
uelis kitemakas sen kokotetsin noso sen pichontsin.
15 On tiopixki kiuentlalis on kokotetsin noso on pichontsin ne tlaixpan*.
Ompa kechmatilos niman kechkotonas.
Niman tla yokipatskilij iyesyo inakastlan on tlaixpan*,
kitlatis itsontekon on tototl ipan on tlaixpan*.
16 Kemaj kixtilis itlakuajkualtekon iuan nochi on yejuan ijtik onkaj,
niman konxinis inakastlan on tlaixpan* kampaka ikisayan tonaltsintli,
kampa onkaj on tlikonextli.
17 Kemaj kajsis ipan imajtlakapaluan niman kitlajkotekis,
pero xnochi kotonas.
Kemaj on tiopixki kitlatis on kokotetsin noso on pichontsin ipan on tlitl yejuan onkaj tlaixpan*.
Ijki nochiuas sen uentli yejuan tlatlas,
niman ajuiyak yes,
para nechyolpaktis nejua nemoTEKO.