On uentli de trigo noso cebada
2
’Ijkuak yakaj kuajkis notech nejua nemoTEKO,
sen uentli de trigo noso cebada,
kuajkis on yejuan más kuajli,
niman kitekilis aceite,
niman kitlalilis kopajli.
2 Kemaj kiktis itech itelpochuan Aarón on tiopixkej.
Semej de yejuamej kikuis se mapichtli harina yejuan kipiya aceite niman on kopajli,
niman kitlatis ipan on tlaixpan* ken uentli yejuan tlatlas.
In kijtosneki ika on se mapichtli harina yejuan tlatla kiteixpantilia ika nochi kiuentlalia on harina yejuan okuajkik on tlakatl.
In uentli ajuiyak nechyolpaktis nejua nemoTEKO.
3 Niman nochi on trigo noso cebada yejuan nokauas de on uentli de harina,
inyaxka yes Aarón niman itelpochuan.
On harina yejuan nokauas,
sanoyej yektli yes pampa okis itech on harina yejuan otlatlak,
para nejua nemoTEKO.
4 ’Ijkuak tinechmakas sen uentli de harina yejuan iksik ipan horno,
tinechmakas memelatsitsimej yejuan tlachijchijtli ikan harina yejuan más kuajli niman tlanelojli yes iuan aceite.
Pero xkipiyas tlaxokolilistli*.
Noso tikchijchiuas pan kajkanauak yejuan xkipiya tlaxokolilistli* niman kajuichiskej ikan aceite.
5 ’Tla mouen de trigo noso cebada tlaikxitijli ipan sen komajli,
tla ijkon,
noneki tlachijchijtli yes ikan harina yejuan más kuajli,
yejuan xkipiyas tlaxokolilistli* niman yejuan tlanelojli iuan aceite.
6 Kemaj tiktlatlapanas on pan niman tikajuichis ikan aceite,
pampa in sen uentli de trigo noso cebada.
7 ’Tla mouen de trigo noso cebada yes tlaikxitijli ipan tlalkajxitl yejuan ueyi,
tla ijkon,
noneki tlachijchijtli yes ika harina yejuan más kuajli niman tlanelojli yes iuan aceite.
8 Tla yotikchijchiu on uentli de harina ika in tlajtlamach*,
noneki tikiktis nixpan nejua nemoTEKO,
niman tikmakas on tiopixki,
para yejua kiktis ne tlaixpan*.
9 On tiopixki kikuis san achijtsin on uentli de harina para kitlatis ne tlaixpan* ken sen uentli yejuan nochi tlatlas.
In kijtosneki ika se mapichtli harina yejuan tlatla,
kiteixpantilia ika nochi kiuentlalia yejuan okuajkik on tlakatl.
In uentli yejua ika nechelnamikij,
on iajuiyalis nechyolpaktis nejua nemoTEKO.
10 Niman nochi on tlen nokauas de on uentli de harina,
iyaxka* yes Aarón niman itelpochuan.
Ijkon nochiuas pampa in sen uentli yejuan sanoyej yektli yejuan okixtikej itech on okseki uentli yejuan notlatia para nechtlakaitaj nejua nemoTEKO.
11 ’Nochi uentli de trigo noso cebada yejuan nennechajkuiliskej nejua nemoTEKO,
xkipiyas tlaxokolilistli* pampa nochi uentli yejuan nochi tlatla para nejua nemoTEKO,
xuelis kipiyas tlaxokolilistli* nion nekutli.
12 Uelis tikuajkis on tlaxokolilistli* iuan on nekutli nixpan nejua nemoTEKO para sen uentli de pixkilistli,
pero xuelis notlatis ipan on tlaixpan* para sen uentli ajuiyak.
13 ’Ipan nochi uentli de trigo noso cebada,
noneki nenkitlaliliskej istatl.
Niman maka xkauili mouen de harina ma kipolo istatl pampa on istatl teelnamiktia on pacto* yejuan Dios okichiu nemouan.
Ipan nochi nemouen,
noneki nenkitlaliliskej istatl.
14 ’Tla nennechmakaskej nejua nemoTEKO sen uentli de trigo noso cebada yejuan achtoj otlak ipan nemotlatok,
xnechmakakan on yejuan kuajli yochikau imiyauayo,
yejuan kemach yenkuixtikaj nenkipapaxoskej niman nenkitliuatsaskej ipan tlitl.
15 Ipan on uentli tiktekilis aceite niman kopajli.
On sen uentli de trigo noso cebada.
16 Kemaj on tiopixki,
kitlatis achijtsin on uentli yejuan okipapaxojkej,
niman kipiya aceite iuan kopajli.
In yes sen uentli yejuan kiteititis ika nechmaktiliaj nochi yejuan tlatla para nechtlakaitaj nejua nemoTEKO.