Éxodo
Imintlajyouilis on israelitas ipan on tlajli Egipto
1
In yejua ikoneuan Jacob yejuan oyajkej ipan on tlajli Egipto,
niman cada se okuikak ifamilia.
Yejuamej ijkin imintoka katkaj:
2 Rubén,
Simeón,
Leví,
Judá,
3 Isacar,
Zabulón,
Benjamín,
4 Dan,
Neftalí,
Gad niman Aser.
5 Nochi ifamilia Jacob yejuan iuan oyajkej Egipto 70 tlakamej katkaj.
Pero José,
on okse itelpoch ye nemiya ipan on tlajli Egipto.
6 Ijkuak yopanok miyek xipan,
José,
ikniuan niman nochimej on tlakamej yejuan imiuan yeuayaj omikej.
7 Pero on israelitas okimpixkej miyekej inkoneuan niman sanoyej miyekixtiayaj hasta onochijkej sanoyej miyekej niman nochi on país ye kitemiltijtiayaj.
8 Ijkuak yopanok miyek xipan,
ne egipto opeu tlamandaroua okse rey yejuan xkixmatiya José.
Niman on yenkuik rey okinmijlij on egipcios:
9 “Xkitakan,
on israelitas sanoyej ye miyekixtokej niman kipiyaj más poder xken tejuamej.
10 Yejua ika,
noneki tikchiuaskej itlaj para maka sa ma nomiyekilikan,
pampa tla onyas sen nouijsokilistli,
uelis nosentlaliskej inuan totlauelikniuan para techuijsokiskej niman sakin* cholojteuaskej nikan.”
11 Yejua ika,
on egipcios okintlalijkej tlakamej yejuan tlatekitiltiaj chikauak para kinchiualtiayaj on israelitas sanoyej ma tekitikan.
Okinchiualtijkej ma kinchijchiuakan on kalpanmej Pitón niman Ramesés kampa on rey kitekitiltiaya para keuaya tlakuajli.
12 Pero maski más kintlajyouiltiayaj on israelitas,
yej más nomiyekiliayaj.
Yejua ika,
on egipcios opejkej más kinmakajsij on Israelitas.
13 On egipcios sanoyej opeu inka nauiltiaj niman kintekitiltia chikauak on israelitas.
14 Ijkon kintlajyouiltiayaj pampa kintekitiltiayaj sanoyej chikauak.
Okinchiualtijkej ma kichijchiuakan xantli niman tabiques.
Niman no okinchiualtijkej para ma kitekitikan nochi tlajtlamach* de on tepetekitl.
On egipcios xokinmiknelijkej on Israelitas,
yej kinchiualtiayaj para sanoyej tlajyouiyayaj ipan on tekitl.
15 No ijki,
on rey okinots Sifra niman Fúa,
on siuamej yejuan tlaxiktekkej niman kimpaleuiyayaj on hebreas ijkuak tlanemitiayaj,
niman ijkin okinmijlij:
16 —Ijkuak nenkipaleuiskej sen hebrea yejuan tlanemitis,
xkitakan tlinon tlakati.
Tla tlakati sen siuakonetl,
xkauakan ma nemi,
pero tla sen tlakakonetl,
¡xmiktikan!
17 Pero maski ijkon okinmijlij on rey,
on siuamej okimakaskej Dios niman xokichijkej on tlen okiminauatij on rey.
Yej okinkauilijkej ma nemikan on tlakakokonej.
18 Yejua ika,
on rey de Egipto otlatitlan ma kinnotsatij on omemej siuamej niman okintlajtoltij:
—¿Tline* nenkinkauiliaj ma nemikan on tlakakokonej?
¿Tline xnenkinmiktiaj?
19 Niman on hebreas tlaxiktekkej okinankilijkej on rey:
—On hebreas xtlanemitiaj yolik ken on egipcias.
Más tlaxikouaj,
niman amanaman tlanemitiaj ijkuak tejuamej xe tajsij para tikimpaleuiskej.
20-21 Niman pampa on siuamej okitlakaitakej Dios,
yejua okintiochiu niman okichiu ma kimpiyakan miyekej inkoneuan.
Niman on hebreos* más otojlantikej hasta onochijkej sanoyej miyekej.
22 Yejua ika,
on rey okinmakak sen tlanauatijli nochi on chanejkej:
“Nochi on hebreos* tlakakokonej yejuan tlakatiskej,
xkomintlajkalikan ipan río,
pero on siuakokonej xkinkauakan ma nemikan.”