Génesis
Ijkuak nochi opeu onkaj
1
Ijkuak nochi kemach opeu onkaj,
Dios okichijchiu on cielo,
on tlaltikpaktli niman nochi tlen onkaj niman yoltikaj.
2 Ijkuakon,
on tlaltikpaktli xnesiya ken onkatka.
Nochi tentikatka ikan atl sanoyej uejkatlan niman sanoyej tlayouatok katka.
Niman iEspíritu toDios kistinemiya ixko on atl.
3 Kemaj Dios okijtoj:
“¡Ma onya tlastajlotl!”
Niman on tlastajlotl ouajnes.
4 Dios okitak ika nochi kuajli okis on tlastajlotl.
Niman Dios okixeloj on tlastajlotl iuan on tlayouajlotl.
5 Niman Dios okitokayotij on tlastajlotl “tonajli”,
niman on tlayouajlotl okitokayotij “tlayoua”.
Ijkon onochiu tiotlak niman kualkan ipan on achtoj tonajli.
6 Kemaj Dios okijtoj:
“Ma onya ajakatl itlajkotian on atl.”
Niman ijkon okixeloj on atl.
7 Ijkon tej,
Dios okitlalij ajakatl itlajkotian on atl para okixeloj.
Seki on atl onokau tlatsintlan niman on okseki onokau tlakpak.
Niman ijki onochiu.
8 On tlakauyan yejuan tlakpak onokau okitokayotij “cielo”.
Ijkon onochiu tiotlak niman kualkan ipan on ika ome tonajli.
9 No ijki,
Dios okijtoj:
“Ma nosentlali san sekan on atl yejuan onokau tlatsintlan,
niman ma nesiki on kampa tlauakan.”
Niman ijki onochiu.
10 Niman Dios okitokayotij on kampa tlauakan “tlajli”.
Niman on atl yejuan san sekan onosentlalij okitokayotij “mar”.
Niman Dios okitak ika nochi kuajli okis.
11 Kemaj Dios okijtoj:
“Ma onya ipan tlajli nochi kech sesekneka xojtli:
xojtli yejuan kipiyas ixinachyo,
niman kojtin* yejuan kipiyas itlakyo.”
Niman ijki onochiu.
12 Ijkon tej,
ipan tlajli opeu ixua nochi kech sesentlamantik xojtli:
xojtli yejuan ixinachyo sano yejua xojtli kitsmolinaltia,
niman kojtlakijlomej yejuan itlakyo sano yejua tlakyotl kipiya.
Niman Dios okitak ika nochi kuajli okis.
13 Ijkon onochiu tiotlak niman kualkan ipan on ika yeyi tonajli.
14-15 Kemaj Dios okijtoj:
“Ma onyakan tlauiltin ipan cielo:
on tonaltsintli,
on metstli niman on sitlalimej.
Yejuamej tlauiloskej ipan tlajli niman kixeloskej on tonajli iuan on tlayoua,
niman no para kiteititiskej on tonaltin,
on xiutin niman on estaciones yejuan onkaj ipan se xipan.”
Niman ijki onochiu.
16 Dios okichijchiu on ome tlauijlij.
On tonaltsintli okichijchiu para tlauiloua ipan tonajli,
niman on metstli para tlauiloua ijkuak tlayoua.
Niman no okinchijchiu sitlalimej.
17 Dios okintlalij on tlauiltin ipan cielo para ma kitlauiluikan in tlaltikpaktli,
18 para ma tlauilokan ipan tonajli niman ijkuak tlayoua,
niman para kixelouaj on tlastajlotl iuan on tlayouajlotl.
Niman Dios okitak ika nochi kuajli okis.
19 Ijkon onochiu tiotlak niman kualkan ipan on ika naui tonajli.
20 Kemaj Dios okijtoj:
“Ipan on atl ma yolikan sanoyej miyek nochi kech sesentlamantikej ayolkej,
uejueyimej niman pipitikej.
Niman no ma yolikan yolkej yejuan patlanij tlakpak ipan ajakatl.”
Niman ijki onochiu.
21 Dios okinyolitij on temojtijkej ayolkej uejueyimej ijtik on mar,
niman nochi kech ayolki nemi ijtik on atl.
Niman no,
okinyolitij nochi kech yolkej patlanij.
Niman Dios okitak ika nochi kuajli okis.
22 Kemaj Dios okintiochiu niman ijkin okinmijlij:
“Xtlaxinachokan ikan miyek nemokoneuan niman xtemiltikan on atl ipan on mares.
Niman ma miyekiyakan on yolkej yejuan patlanij nochiuiyan ipan tlaltikpaktli.”
23 Ijkon onochiu tiotlak niman kualkan ipan on ika makuijli tonajli.
24 Kemaj Dios okijtoj:
“Ipan on tlajli ma yoliuikan nochi kech sesentlamantikej yolkej.
Ma yoliuikan on kalpan yolkej,
on tepeyolkej niman on yejuan noteuilanaj ipan tlajli.”
Niman ijki onochiu.
25 Niman Dios okiyolitij nochi kech tlaltikpakyolki nemi,
cada se ika itlakatilis.
Okinyolitij on kalpan yolkej,
on tepeyolkej niman nochi kech yolki yejuan noteuilana ipan tlajli.
Niman Dios okitak ika nochi kuajli okis.
26 Kemaj Dios okijtoj:
“Aman ma tikinchijchiuakan tlaltikpaktlakamej yejuan tlajtlachaskej niman tlajtlamatiskej ken tejuamej,
niman yejuamej más uejueyixtiaskej niman tlajtlajmatkej yeskej ipan on michimej,
on yolkej yejuan patlanij,
on kalpan yolkej,
on tepeyolkej tekuanimej,
niman ipan nochimej on yolkej yejuan noteuilanaj ipan tlajli.”
27 Ijkuak Dios okinchijchiu on tlaltikpaktlakamej,
okinchijchiu sa no ijki ken yejua tlajtlamati.
Ijkon Dios okichijchiu sen tlakatl niman sen siuatl.
28 Niman Dios okintiochiu ika in tlajtojli:
“Xtlaxinachokan niman xkimpiyakan miyekej nemokoneuan.
Xtemiltikan in tlaltikpaktli,
niman xkinmomaktikan on michimej,
niman on yolkej yejuan patlanij,
niman nochi kech yolkej yejuan noteuilanaj.”
29 Kemaj Dios okijtoj:
“Aman kuajli xkakikan.
Nemejuamej nemechmaka nochi on sesentlamantik xojtli yejuan onkaj ipan tlajli,
on yejuan kipiya ixinachyo niman nochi on kojtlakijlomej.
Nochi in nemechmaka para nenkikuaskej.
30 Pero nochimej on tepeyolkej,
nochimej on yolkej yejuan noteuilanaj ipan tlajli,
nochimej on yolkej yejuan patlanij,
niman nochimej on yejuan kipiyaj nemilistli,
nikinmaka nochi kech xojtli niman sakatl onkaj para tlakuaskej.”