2
Ijkon tej,
Dios otlan kichijchiua on cielo niman on tlaltikpaktli niman nochi on tlajtlamach* yejuan imimpan onkaj.
2 Ijkuak oajsik on ika chikome tonajli,
Dios otlan kichiua itekiu.
Yejua ika onoseuij.
3 Niman Dios okitiochiu on yejuan ika chikome tonajli niman okitokayotij “yektonajli” pampa ipan on tonajli onoseuij de nochi on itekiu ijkuak okitlalij on cielo niman on tlaltikpaktli.
4 Ijkon onochiu ijkuak toTEKO Dios okichijchiu on cielo niman in tlaltikpaktli.
Adán niman Eva nemiyaj ne ipan on xochitlan Edén
Ijkuak toTEKO Dios okichijchiu on cielo niman in tlaltikpaktli,
5 achtoj xonkatka xojtli nion itlaj noskaltiaya pampa toTEKO Dios xe kaman tlakiauitiaya ipan in tlaltikpaktli.
No ijki,
xakaj nemiya para kitekitis on xochitlan.
6 Pero maski toTEKO Dios xe tla kiauitiaya,
kichiuaya para ma kisa ajuichtli ipan tlajli niman tlapatsouaya.
7 Niman toTEKO Dios okikuik tlajli niman okimachijchiu itlalnakayo sen tlaltikpaktlakatl.
Niman okijyopits ipan iyakak,
niman okimakak nemilistli.
Niman ijkon on tlaltikpaktlakatl opeu kipiya nemilistli.
8 ToTEKO Dios okitokak sen xochitlan yejuan okitokayotij Edén neka kampaka ikisayan tonaltsintli.
Niman ompa okau on tlakatl yejuan okimachijchiu.
9 Niman toTEKO Dios okichiu para ma noskalti ipan on xochitlan nochi sesentlamantikej kojtin* yejuan kualtsitsimej nesiyaj,
niman nochi sesentlamantikej kojtin* yejuan kipiyaj intlakyo para kikuaskej.
Niman itlajkotian on xochitlan,
toTEKO Dios okitokak sen kojtli* yejuan itlakyo temaka nemilistli.
No ijki,
okitokak okse kojtli* yejuan itlakyo kitemachistia on tlen kuajli niman tlen xkuajli.
10 Ipan on Edén onkatka sen río yejuan katekiaya on xochitlan.
Niman on río noxexelouaya naukan.
11 On achtoj axelojli de on río itoka katka Pisón.
Yejua in tlanenekuilojtiaya ipan nochi on tlajli yejuan itoka katka Havila kampa onkatka oro.
12 On oro de on tlajli sanoyej kuajli katka.
No ijki,
ompa onkatka sen kojtli* yejuan iyayo ajuiyak,
tsopelik,
niman patioj.
No onkatka tetl yejuan kualtsin,
itoka ónice.
13 Yejuan ika ome axelojli de on río itoka katka Guihón.
Tlanenekuilojtiaya ipan on tlajli yejuan itoka Cus.
14 Niman on ika yeyi axelojli de on río itoka katka Tigris,
niman panouaya itenko on tlajli Asiria kampaka ikisayan tonatsintli.
Niman on ika naui axelojli itoka katka Éufrates.
15 Kemaj toTEKO Dios okuikak on tlakatl,
niman okau ipan on xochitlan Edén para ma kitekiti niman ma kitlajpiya.
16 Niman toTEKO Dios ijkin okinauatij:
“Uelis tikuas itlakyo nochi on kojtin* ipan in xochitlan,
17 pero on kojtli* yejuan temachistia on tlen kuajli niman on tlen xkuajli,
maka tikuas itlakyo,
pampa ipan on tonajli ijkuak tikuas itlakyo,
xmatstia ika ika onkaj timikis.”
18 Sakin,
toTEKO Dios okijtoj:
“Xkuajli para nemis iselti in tlakatl.
Nikchijchiuilis akinon yejuan kuajli iuan nemis niman kipaleuis.”
19 Niman ikan tlajli toTEKO Dios okichijchiu nochi kech yolki nemi,
niman nochi kech totomej nemij.
Sakin,
okinuikilij on tlakatl para ma kintokayoti.
Niman on tlakatl okintokayotij,
niman hasta aman ijki imintoka.
20 Kemaj on tlakatl okintokayotij on sesentlamantikej yolkej.
Okintokayotij on yejuan kalpanyolkej,
niman totomej,
niman nochi yolkej yejuan tepeyolkej tekuanimej.
Pero intech on yolkej xokinextij nion se yejuan uelis iuan chantis on tlakatl.
21 Kemaj toTEKO Dios okichiu para sanoyej ma kochmiki Adán.
Niman chika kochiya,
okixtilij se iyelchikiuomiyo,
niman oksejpa okitsakuilij inakayo ken onkatka.
22 Niman ika iyelchikiu on tlakatl,
toTEKO Dios okichijchiu sen siuatl.
Niman kemaj okuikak kampa nemiya on tlakatl.
23 Niman ijkuak on tlakatl okitak on siuatl,
opakatsajtsik:
“¡Aman kemaj!
Nejua ninochiua san se iuan in siuatl,
pampa inakayo okis itech nonakayo,
niman iomiyo okis itech noomiyo.
Aman itoka yes ‘siuatl’,
pampa toTEKO Dios okixtij notech nejua yejuan nitlakatl.”
24 Niman yejua ika,
sen tlakatl kikaua itataj niman inanaj
para nosentlalia san sekan iuan isiuau,
niman on omemej nochiuaj san se.
25 Niman maski on tlakatl niman isiuau tsotsoltikej nemiyaj,
xnopinauiliayaj.