Adán niman Eva otlajtlakojkej ixpan Dios
3
On kouatl más kimatiya kenijkitlakajkayauas xken nochi on oksekimej tepeyolkej yejuan toTEKO Dios okinchijchiu.
Niman se tonajli on kouatl okitlajtoltij on siuatl:
—¿Tlen melauak omechijlij Dios para nion se xnenkuaskej itlakyo on kojtin* yejuan onokej ipan in xochitlan?
2 Niman on siuatl okinankilij:
—Uelis tikuaskej itlakyo nochi on kojtlakijlotl,
3 pero san on yejuan onkaj itlajkotian on xochitlan,
Dios otechijlij maka tikuaskej,
nion tikitskiskej itlakyo,
pampa tla tikitskiskej timikiskej.
4 Pero on kouatl okijlij on siuatl:
—Xnejli.
Xnenmikiskej.
5 Kuajli kimati Dios ika tla nenkikuaskej itlakyo on kojtlakijlotl nentlakajsikamatiskej,
niman nenkimatiskej on tlen kuajli niman on tlen xkuajli.
Niman ijkon nemochiuaskej ken yejua Dios.
6 Kemaj on siuatl okitak ika sa yejyektli itlakyo on kojtli* niman nesiya kuajli para kikuas.
Niman nesiya ika melauak kitemaka tlamachilistli.
Kemaj okitek se itlakyo niman okikuaj.
Niman no okimakak iueuentsin,
niman yejua no okikuaj.
7 Ijkuakon nimantsin ken ouajixtlajtlapojkej niman onotakej ika tsotsoltikej katkaj.
Niman no otlamachilistlapojkej niman okajsikamatkej tlen kuajli niman tlen xkuajli.
Kemaj okitekkej ixojyo on kojtli* itoka higuera* niman ika onotlapachokej.
8 Niman ipan on tiotlak ijkuak ye tlaseseyaya,
on tlakatl niman isiuau okakkej toTEKO Dios ompaka kistinemiya ipan on xochitlan.
Niman onotlajtlalojkej* oniyanatoj ijtik on kojyoj para toTEKO Dios maka kintas.
9 Pero toTEKO Dios okinots on tlakatl niman okitlajtoltij:
—¿Kanon tinemi?
10 Niman on tlakatl okinankilij
—Onikak ika tikistinemi nikan xochitlan,
niman oninomojtij pampa nitsotsoltik.
Niman yejua ika oniniyan.
11 Kemaj Dios okitlajtoltij:
—¿Akinon omitsijlij ika titsotsoltik?
¿Otikuaj itlakyo on kojtlakijlotl yejuan onimitsnauatij maka tikuas?
12 Niman on tlakatl okinankilij:
—On siuatl yejuan otinechmakak para iuan ninemis,
yejua onechmakak sen itlakyo on kojkakijlotl niman onikuaj.
13 Kemaj toTEKO Dios okitlajtoltij on siuatl:
—¿Tline* ijkon otikchiu?
Niman on siuatl okinankilij:
—On kouatl onechkajkayau.
Yejua ika,
onikuaj itlakyo on kojkakijlotl.
ToTEKO Dios tetlajtlakolmaka
14 Kemaj toTEKO Dios okijlij on kouatl:
—De nochi on yolkej yejuan nemij,
san tejua tikselis más ueyi castigo pampa otikajkayau on siuatl.
Tejua san timoteuilantinemis ika moyelpan ipan tlajli niman tlalteutli tikuas nochi monemilis.
15 Niman nikchiuas para tejua iuan on siuatl xmotlauelita.
Niman nikchiuas para mouejkakoneuan niman iuejkakoneuan on siuatl ma notlauelitakan.
Se iuejkakoneu* mitskuatepaxos niman tejua tikotstlankechis.
16 Niman toTEKO Dios okijlij on siuatl:
—Nikchiuas para titlajyouis ijkuak timokoneanas,
niman ikan chikauak nekokojli titlanemitis.
Pero maski ijkon,
tejua tiknekis moueuentsin,
niman yejua mitsyekanas niman tiktlakamatis.
17 Niman toTEKO Dios okijlij on tlakatl:
—Pampa xotinechtlakamat,
yej otiktlakamat mosiuau niman otikuaj itlakyo on tlakojkakijlotl yejuan onimitsijlij maka tikuas,
nikchiuas para nochi in tlajli xok kuajli tlatlakitis ipampa motlajtlakol.
Yejua ika,
chikauak titekitis nochi monemilis para tiknextis tlen tikuas.
18 On tlajli kitsmolinaltis uitstli niman xojtli uitsyo.
Niman ika onkaj tikuas on xojtli yejuan xkitokaj yej san noskaltia iselti.
19 Niman timitonis sanoyej para tiknextis tlakuajli yejuan ika timopanoltis,
hasta kaman timiki,
niman oksejpa timokuepas tlajli.
Nejua onikchijchiu motlalnakayo ikan tlajli,
niman ijkuak timikis oksejpa timokuepas tlajli.
20 Niman Adán okitokayotij isiuau Eva pampa Eva onochiu nantli de nochi tlakatl yejuan nemi.
21 Niman toTEKO Dios okinchijchiuilij Adán niman Eva intlaken ika inkuetlaxyo* on yolkej,
niman okintlakentij.
ToTEKO okinkixtij Adán niman Eva ipan on xochitlan
22 Kemaj toTEKO Dios okinojlij:
“Aman in tlakamej onochijkej ken tejuamej pampa kimatij on tlen kuajli niman tlen xkuajli.
Para maka tej,
kitekiskej niman kikuaskej itlakyo on kojkakijlotl yejuan temaka nemilistli niman nemiskej para nochipa,
nikinkixtis ipan on xochitlan.”
23 ToTEKO okinuajkixtij ne xochitlan yejuan itoka Edén.
Niman okinnauatij ma kitekitikan on tlajli,
sano yejua on tlajli yejuan toTEKO ika okimachijchiu itlalnakayo Adán.
24 Niman ijkuak toTEKO Dios yokinuajkixtij,
okintlalij ángeles,
yejuan imintoka querubines*,
para nemiyaj ne itech on xochitlan kampaka ikisayan tonaltsintli para ma kitlajpiyakan on xochitlan.
Niman toTEKO Dios no okitlalij ompa sen espada yejuan tlikuitikatka niman nopalakachojtikatka para xakaj ueliya ajsi kampa onkaj on kojtli* yejuan temaka nemilistli.