Otlakat Moisés
2
Nemiya sen tlakatl yejuan kisaya intech iuejkakoneuan Leví.
Yejua okinosiuatij sen siuatl yejuan no kisaya intech on iuejkakoneuan Leví.
2 In siuatl onokonean niman okipix sen tlakakonetsintli.
Ijkuak okitak ika on konetsintli sanoyej kualtetsin,
okiyan kanaj yeyi metstli.
3 Pero ijkuak xok ouel okiyan,
okichijchiu sen chikiutli ikan akatl,
niman okalauilij chapopojtli iuan okotsotl para maka kalakis atl.
Kemaj okitlalij on konetsintli ijtik on chikiutli,
niman okauato kampa akayoj itenko on río Nilo.
4 Niman okijlij on siuakonetl yejuan ikniu on tlakakonetsintli ma konitstia san uejka para kimatis tlinon nochiuas.
5 Sakin,
ichpoch on reya otemokej para onaltijtoj ipan on río chika itekichiuilijkauan nejnentiayaj nisiu itenko on río.
Kemaj on ichpoch on rey okitak on chikiutli itlajkotian on akayoj,
niman okititlan se itekichiuilijkau ma kuajkuilij on chikiutli.
6 Kemaj okitlapoj on chikiutli niman ontlachix ijtik.
Okitak ompa nemiya sen tlakakonetsintli yejuan chokaya.
Niman ichpoch on rey okiknelij* niman okijtoj:
—In sen tlakakonetsintli hebreo.
7 Kemaj ikniu on konetsintli okinisiuij ichpoch on rey,
niman okijlij:
—¿Tikneki ma niknotsati sen siuaisraelita yejuan tlachichitia para ma kiskalti in konetsintli?
8 Niman ichpoch on rey okinankilij:
—Kemaj,
xnotsati.
Kemaj on ichpokakonetl oyaj okinotsato inanaj on tlakakonetsintli,
9 niman ichpoch on rey okijlij inanaj:
—Xkuika in tlakakonetsintli niman xnechiskaltili,
niman nejua nimitstlaxtlauilis motekiu.
Ijkon tej,
inanaj on tlakakonetsintli okuikak niman okiskaltij.
10 Ijkuak yonoskaltij,
okimaktilij ichpoch on rey.
Niman on ichpochtli okinokonetij niman okitokayotij Moisésb.
Ijkon okitokayotij pampa okijtoj:
—Nejua onikixtij ijtik atl.
Moisés ocholoj de on tlajli Egipto
11 Se tonajli ijkuak Moisés yotlakatiak,
okis para okintato on hebreos*,
ikniuan yejuan sano yejua yestli kipiyayaj.
Okitak ken sanoyej kintlajyouiltiayaj ikan tekitl.
Niman no okitak ika sen tlakatl Egipcio kitlatsuitekiya sen tlakatl hebreo.
12 Kemaj Moisés nochiuiyan ontlatlachix.
Ijkuak okitak ika xakaj nemiya,
okimiktij on tlakatl Egipcio niman okixalpachoj para okiyan.
13 Uajmostla oksejpa okis Moisés niman okitak ika omemej hebreos* nouijsokiyaj.
Kemaj okitlajtoltij on yejuan teuijsokiya.
—¿Tline tikmailia mokniu yejuan no hebreo?
14 Niman on hebreo* okinankilij:
—¿Akinon omitstlalij tejua ken tekiuaj noso tijuez toka tejuamej?
¿Tiknemilia no tinechmiktis ken yaloua otikmiktij on Egipcio?
Ijkuak Moisés ijkon okak,
onomojtij pampa okitak ika sekimej kimatiyaj ika okimiktij on tlakatl Egipcio.
15 Niman ijkuak on rey okimat ika Moisés okimiktij sen Egipcio,
otlatitlan ma kitejtemotij para kimiktis.
Pero Moisés ocholojteu niman oyaj Madián.
Ijkuak ompa oajsik,
onoseuij nisiu itech sen atlaltekontli*.
16 Ompa Madián nemiya sen tiopixki yejuan itoka katka Reuel,
niman kipiyaya chikome ichpoch.
Niman on tonajli yejuamej oyajkaj itech on atlaltekontli* para okixtitoj atl niman okitemitijkej on akuexomatl kampa atlij on yolkej,
niman okinmatlitijkej iborregos imintataj.
17 Pero oualajkej sekimej borregojtlajpixkej niman okintotokakej on ichpokamej.
Ijkuakon Moisés okinmixnamik,
okinmanauij on ichpokamej,
niman kemaj okinmatlitilij imborregos.
18 Niman ijkuak on ichpokamej onokuepkej kampa nemiya Reuel on imintataj,
yejua okintlajtoltij:
—¿Tline aman onenualajkej más saniman?
19 Yejuamej otlanankilijkej:
—Pampa sen egipcio otechmanauij intech on borregojtlajpixkej.
Niman kemaj yejua okixtij atl para tejuamej,
niman okimatlitij toborregos.
20 Niman imintataj okintlajtoltij:
—¿Kanon nemi on tlakatl?
¿Tline onenkuajkajtejkej iselti?
Xuiyan,
xnotsatij ma tlakuaki.
21 Sakin,
Reuel okijlij para ma chanti iuan,
niman Moisés okinek.
Niman Reuel okimakak Moisés sen ichpoch yejuan itoka Séfora para isiuau.
22 Kemaj,
sakin* Séfora okipix ikoneu yejuan Moisés okitokayotij Gersónc.
Ijkon okitokayotij pampa okijtoj:
“Nejua xnichanej ipan in tlajli teyaxka.”
23 Ijkuak yopanok miyek xipan,
on rey de Egipto omik.
Pero on israelitas sanken* sanoyej tlajyouiyayaj pampa tekitiyaj sanoyej.
Yejuamej kiknotlajtlaniliayaj Dios ma kimpaleui ipan imintlajyouilis,
niman Dios okak on ajmankatsatsilistlij.
24 Dios okinkak on israelitas niman okelnamik on pacto* yejuan okichiu iuan Abraham,
Isaac niman Jacob.
25 Yejua ika tej,
Dios okintak on israelitas niman okinmiknelij.