Dios okinots Moisés
3
Moisés kintlajpiyaya iborregos Jetro on imontaj.
Jetro no itoka katka Reuel.
Yejua katka sen tiopixki ipan on tlajli Madián.
Se tonajli Moisés okinuikak on borregos ipan nochi on xalpatlajkan hasta kampa onkaj on yektepetl itoka Sinaía kampa nonextia Dios.
2 Ompa se ángel yejuan toTEKO okuajtitlan ononextij ipan sen tlimilinajli yejuan tlatlaya itlajkotian sen tlakotepajsojli.
Niman Moisés okitak ika on tlakotepajsojli kauantikatka,
pero xtlatlaya.
3 Yejua ika,
okinemilij:
“Xkaman onikitak itlaj ken in.
Nias nikontas.
¿Tline on tlakotepajsojli kauantikatkaj niman xtlatla?”
4 Niman ijkuak toTEKO okitak ika Moisés kinisiuijtiaya para kitas,
okinots itlajkotian de on tlakotepajsojli niman okijlij:
—¡Moisés!
¡Moisés!
Niman Moisés okijtoj:
—Nikan ninemi.
5 Kemaj toTEKO okijlij:
—Maka xmonisiui.
Xmokakkixti pampa in kampa tijkatikaj tlatiochijkatlajli.
6 Niman toTEKO no okijlij:
—Nejua niiDios motataj niman iminDios mouejkatajuan Abraham,
Isaac niman Jacob.
—Nikitstikaj kenijkitlajyouiyaj nokoneuan yejuan nemij Egipto.
Nikaktikaj ken chokaj pampa on tlakamej yejuan tlatekitiltiaj chikauak sanoyej kinmailiaj.
Nikinmiknelia* pampa sanoyej tlajyouiyaj.
8 Yejua ika,
onitemoko para nikinmanauis intech on egipcios.
Nikiminkixtis ipan on tlajli,
niman nikinuikas ipan sen tlajli yejuan ueyi,
niman kuajli kampa sanoyej tlatlaki niman xitlaj* poliui.
Nikinuikas ipan on tlajli kampa nemij on cananeos,
heteos,
amorreos,
ferezeos,
heveos niman jebuseos.
9 Nejua nikaktikaj ken nechtsajtsiliaj on israelitas,
niman nikitstikaj ken on egipcios sanoyej kintlayouiltiaj.
10 Aman nimitstitlani xkitati on rey para tikinkixtis on nokoneuan israelitas ne Egipto.
11 Kemaj Moisés okijlij Dios:
—¿Akin nejua para nias nikonnotsas on rey,
niman nikinkixtis ne Egipto on israelitas?
12 Niman Dios okinankilij:
—Nejua ninemis mouan.
Niman in yejua yes sen neskayotl para uelis tikmatis ika melauak nejua nimitstitlani:
ijkuak yotikinkixtito nokoneuan ne Egipto,
nenmokuepaskej nikan,
niman nochimej nemejuamej nennechmauistiliskej ipan in tepetl Sinaí.
13 Pero Moisés okinankilij:
—Pero tla nias,
niman nikinmijlis on israelitas ika on yejuan iminDios nemouejkatajuan nechajtitlani ne motech,
nechtlajtoltiskej:
¿Ken ijki itoka?
Niman kemaj,
¿tlinon nikinmijlis?
14 Niman Dios okinankilij:
—NEJUA YEJUAN NINEJUA.
Ijkin tikinmijlis on israelitas:
“NEJUA YEJUAN NINEJUA onechajtitlan nemotech.”
15 Dios no okijlij Moisés:
—No xkinmijli on israelitas ika nejua yejuan nemoTEKO,
iminDios nemouejkatajuan Abraham,
Isaac niman Jacob nimitstitlani intech.
In yejua nochipa katka notokatsin niman nochipa yes notokatsin.
Ika in notokatsin nechnotsaskej para nochipa nochimej tlakamej yejuan tlakatitiaskej.
16 Xuiya niman xkinsentlali nochimej on uejueyixtokej tlakamej intech on israelitas,
niman xkinmijli:
“ToTEKO yejuan iminDios nemouejkatajuan Abraham,
Isaac niman Jacob ononextij notech.”
No xkinmijli:
“Nikmatstikaj niman nikitstikaj kenijkixkuajli mechchiuiliaj ne Egipto.
17 Nemechtlajtolmaka ika nemechinkixtis ipan on tlajyouilistli ne Egipto,
niman nemechuikas ipan on tlajli kampa nemij on cananeos,
heteos,
amorreos,
ferezeos,
heveos niman jebuseos.
Ijkon nikinuikas kampa sanoyej tlatlaki niman xitlaj* poliui.”
18 Ijkuak ijkon tikimijlis,
on uejueyixtokej tlakamej mitsneltokiliskej.
Niman kemaj tias iminuan para nenkontaskej on rey de Egipto.
Niman ijkin tikijlis:
“ToTEKO,
iminDios on hebreos*,
youajlaj yotechitako.
Nimitsiknotlajtlanilia,
xtechkauili ma tiuiyan yeyi tonajli ipan on xalpatlajkan kampa tikonmakaskej uentli toTEKO Dios.”
Ijkon xkijliti.
19 Pero nejua kuajli nikmati ika on rey de Egipto xmechkauilis nenkisaskej yej hasta nikchiualtis ma mechkauili xuiyan.
20 Nikpanextis nopoder,
niman nikintlajyouiltis on egipcios ikan miyek tlajtlamach* tejmoti hasta mijmikiskej.
Niman kemaj on rey mechkauilis nenkisaskej.
21 No ijki,
nikchiuas para on egipcios ma kinekikan mechpaleuiskej,
niman mechmakaskej tlajtlamach*,
para ijki ijkuak nenkisaskej,
xsan nenmapijpilkatiaskej.
22 Cada siuatl israelita kinotsas inisiuchanejkau yejuan egipcia,
noso sen egipcia yejuan iuan chanti,
para kitlajtlanilis tlajtlamach* de oro niman plata niman tlakentin.
Niman ika on nenkintlakentiskej nemokoneuan para ijki nenkinkuiliskej on Egipcios on tlen kipiyaj.