4
Niman Moisés okinankilij:
—¿Tlinon nikchiuas tla on israelitas xnechneltokaj niman xkinekij nechkakiskej?
Uelis san kualijtoskej:
“ToTEKO xmelauak omitsnotitij.”
2 Yejua ika,
toTEKO okijlij Moisés:
—¿Tlinon tikpiya ipan moma?
Niman Moisés okinankilij:
—Sen topijli.
3 Niman toTEKO okijlij:
—Xtlajkali ipan tlajli.
Kemaj Moisés okitlajkal ipan tlajli niman on topijli onokuep sen kouatl.
Niman Moisés otsinkistikis ikan inemojtil.
4 Pero toTEKO okijlij:
—Xkajsi ipan ikuitlapil.
—Ijkon tikchiuas imixpan on israelitas para ma kineltokakan ika motech oninonextij,
nejua yejuan niinTEKO Dios nemouejkatajuan,
Abraham,
Isaac niman Jacob.
6 Oksejpa toTEKO okijlij:
—Aman,
xkalakti moma ijtik motlaken moyelpan ika.
Kemaj Moisés okalaktij.
Niman ijkuak okuajkixtij,
okitak ika kipiyaya on temojti kokolistli itoka lepra.
Istak katka ken itlaj nieve.
7 Kemaj toDios okijlij:
—Oksejpa xkalakti moma ijtik motlaken moyelpan ika.
Moisés ijki okichiu.
Niman ijkuak oksejpa okuajkixtij ima,
okitak yopajtik,
niman onkatka kuajli ken nochi itlalnakayo.
8 Yejua ika,
toTEKO okijlij:
—Tla ika on achtoj neskayotl xmitsneltokiliaj,
ika on ome neskayotl mitsneltokiliskej.
9 Pero tla xmitsneltokiliaj ika in ome neskayotl,
nion xkinekij mitskakiskej,
xkixti atl ipan on río,
niman xtoyaua ipan tlajli.
Niman ijkuak on atl yejuan tikixtis ipan on río toyauis ipan tlajli,
nokuepas yestli.
10 Pero Moisés okijlij toTEKO:
—¡Ay,
noTEKO!
Nejua xniueli kuajli nitlajtlajtoua.
Xkaman oniuel nitlajtlajtoua kuajli,
nion aman ijkuak tinechnotstikaj nejua nimotekitkau.
Yej nochipa ijkuak nitlajtoua,
axkan* kisa notlajtol ipan nonenepil,
pampa nitenenepochiui.
11 Pero toTEKO okijlij:
—¿Akinon okinmakak inkamak on tlakamej?
¿Akinon tla xnejua nikchiua para se maka uelis tlajtos,
noso maka uelis tlakakis?
¿Akinon tla xnejua kichiua para se ma tlacha,
noso maka ma tlacha?
12 Yejua ika,
xuiya,
niman nejua nimitspaleuis ijkuak titlajtos,
niman nimitsijlis on tlen tikijtos.
13 Niman Moisés oksejpa okijtoj:
—¡Ay,
noTEKO!
Nimitsiknotlajtlanilia,
xtitlani yakaj okse,
maka nejua.
14 Yejua ika,
toTEKO okualan iuan Moisés,
niman okijlij:
—¡Nemi mokniu Aarón yejuan levita!
Nejua nikmati ika yejua kuajli tlajtlajtoua.
Yejua ye uajlau ipan ojtli niman mitsajnamikis.
Yejua sanoyej pakis ijkuak mitsitas.
15 Tiuelis tiknotsas Aarón niman tiktlajtlajtouilis nochi on tlen kijtos.
Kemaj yejua kijtos on tlen tikijlis.
Nejua ninemis nemouan ijkuak nentlajtoskej,
niman nemechititis on tlen nonekis nenkichiuaskej.
16 Aarón kinnotsas on tlakamej ken tejua tikinnotsaskia.
Yejua kimijlis on tlakamej tlen tejua tikijlis.
Ijkon tej,
para Aarón motlajtol nochiuas ken itlajtol yeskia Dios.
17 Xkikti in topijli ipan moma pampa ika in tikchiuas uejueyi neskayomej.
Moisés onokuep Egipto
18 Moisés onokuep ichan Jetro on imontaj,
niman okijlij:
—Noneki ninokuepas para Egipto kampa nemij nokniuan hebreos*.
Nikneki nikitas tla sanken* nemij.
Niman Jetro okinankilij:
—Kemaj,
kuajli xuiya.
19 Ijkuak Moisés nemiya Madián,
toTEKO okijlij:
—Xuiya ne Egipto.
Maka xmomojti tias Egipto,
pampa yomikej nochimej on yejuan kinekiyaj mitsmiktiskej.
20 Yejua ika,
Moisés okuikak isiuau niman itlakakoneuan,
niman okintlejkoltij ipan sen poloko,
niman onokuep para Egipto.
Ipan ima kiktiya on yektopijlia yejuan Dios okimakak.
21 Kemaj oksejpa toTEKO okijlij Moisés:
—Ijkuak tajsis Egipto,
xchiua kuajli ixpan on rey nochi on neskayomej yejuan otimitsmakak para tikchiuas.
Pero nejua nikyoltechikauas para maka kinkauilis ma kisakan on israelitas.
22 Yejua ika,
tikijlis on rey ika nejua nemoTEKO nikijtoua ika on israelitas nikintlajsojtla* ken sen tajtli kitlajsojtla* ikoneu yenkuiyotl.
23 Yonimitsijlij para xkinkauili ma kisakan nokoneuan para yaskej nechonmauistiliskej.
Pero xtikinkauilis ma kisakan.
Yejua ika,
nejua nikmiktis mokoneu yenkuiyotl.
Ijkon xkijliti on rey.
24 Ipan se tlayoua ijkuak Moisés yaya iuan ifamilia para Egipto,
onoteltijkej para kochiskej.
Niman ompa toTEKO okinotitij niman kinekiya kimiktis.
25 Kemaj Séfora okontilan sen cuchillo de tetl niman okitlalilij ikoneu on neskayotl itoka circuncisión*.
Kemaj ika ikuacuerito on kampa tlapiasoua on konetl,
okiteloj ikxiuan Moisés,
niman okijlij:
“Melauak,
tejua tinoueuentsin yejuan de yestli.”
26 Yejua ika,
toTEKO xok okualan itechkopa Moisés niman okikauilij ma uiya.
Niman Séfora okitokayotij Moisés “Noueuentsin Yejuan de Yestli” pampa nonekiya yejua kitlalilis circuncisión ikoneu.
27 No ijki,
toTEKO okinauatij Aarón para ma uiya ipan on xalpatlajkan para ma kinamikiti Moisés.
Yejua ika,
Aarón oyaj okinamikito Moisés ipan on tlatiochijkatepetl kampa nonextia toTEKO Dios.
Niman ompa Aarón okitlajpaloj niman okitenkuaj.
28 Kemaj Moisés okitlajtlajtouilij Aarón nochi on tlajtlamach* yejuan toTEKO okinauatij ma kijli,
niman no okitlajtlajtouilij de on uejueyi neskayomej yejuan okinauatij ma kichiua.
29 Kemaj Moisés niman Aarón oyajkej Egipto,
niman okinsentlalijkej on uejueyixtokej tlayekankej israelitas.
30 Niman Aarón okinmijlij nochi on tlen toTEKO okinauatij Moisés,
niman okichiub on neskayomej yejuan toTEKO okititij ma kichiua.
31 Niman nochimej on israelitas okineltokakej ika toTEKO okintitlan.
Niman ijkon okimatkej on israelitas ika toTEKO yokinkak niman kinmitstikaj ken tlajyouiyayaj.
Yejua ika,
onotlakuantelketskej ixpan toTEKO niman okimauistilijkej.