Moisés niman Aarón okinotskej on rey
5
Sakin,
Moisés niman Aarón oyajkej okinotsatoj on rey,
niman okilijkej:
—ToTEKO,
on Dios yejuan on israelitas tikmauistiliaj,
mitsijlia para xkinkauili ikoneuan ma uiyan kampa xalpatlajkan para ma kichiuiliskej iluitl.
2 Pero on rey okinminnankilij:
—¿Man akinon “on nemoTEKO” para nejua niktlakamatis,
niman nikinkauilis ma uiyan on israelitas?
Nion xnikixmati nemoTEKO,
niman nion xnikinkauilis ma uiyan on israelitas.
3 Yejua ika,
Moisés niman Aarón okijlijkej:
—ToDios tejuamej yejuan tihebreos*,
ouajlaj niman otechnotitij,
niman otechijlij on tlen noneki ma tikchiuakan.
Yejua ika,
xtechkauili ma tiuiyan yeyi tonajli ipan on xalpatlajkan para ma tikmakatij uentli toTEKO Dios,
pampa tlamo timikiskej ika sen ueyi kokolistli noso ika espada.
4 Pero on rey de Egipto okinmijlij Moisés niman Aarón:
—¿Tline nenkintlanenkaualtiaj in tlakamej?
Ma uiyan ipan imintekiu.
5 Niman no ijki on rey okinmijlij:
—Aman nemij sanoyej miyekej in israelitas ipan in país,
niman nemejuamej yej san nenkintlanenkaualtiaj ipan imintekiu.
6 Ipan san no yejua on tonajli on rey okinmakak sen yenkuik tlanauatijli on tlakamej egipcios yejuan tlatekitiltiaj chikauak niman intlayekankauan on israelitas.
Niman okinmijlij:
7 —Maka sa xkinmakakan sakatl on israelitas para kinelosej iuan sokitl para on xantli ijkon ken kichiuayaj.
Ma uiyan yejuamej para ma kisentlalitij on sakatl yejuan noneki.
8 Pero xkinchiualtikan ma kitemakakan sa no ichkich miyek xantli ken achtoj.
Nion sen xantli maka ma poliuiti pampa on israelitas tlatsiuij.
Yejua ika,
najkomanaj niman kijtouaj kinekij yaskej konmakaskej uentli iminDios.
9 Yejua ika,
xkinchiualtikan ma tekitikan más chikauak on tlakamej.
Xkinnauatikan para maka ma kakikan on tlakajkayaualistli yejuan Moisés niman Aarón kinmijliaj.
10 Yejua ika,
on israelitas tlayekankej niman on tlakamej yejuan tlatekitiltiaj chikauak,
oyajkej okimijlitoj on israelitas:
—On rey tlanauatia maka sa temechmakakan sakatl.
11 Aman noneki nenyaskej nenkontejtemoskej on sakatl.
Pero sa no ichkich nenkichijchiuaskej on xantli ken nenkichijchiuayaj achtoj.
12 Yejua ika,
on israelitas onochajchayakej ipan on tlajli Egipto okitejtemotoj sakakuechtli.
13-14 Niman mojmostla itlayekankauan on rey más kintlajsiuitiayaj,
niman kinmijliayaj:
—Xchijchiuakan sa no ichkich xantli ipan se tonajli ken ijkuak temechmakayaj sakatl.
Niman no ijki on tlakamej tlatekitiltijkej chikauak kinmajmailiayaj on israel tlayekankej,
niman kinmijliayaj:
—¿Tline,
nion yaloua,
nion aman,
xnenkichijchiuaj sa no ichkich xantli ken achtoj nenkichijchiuayaj?
15 Niman on israel tlayekankej oyajkej otlajtlanitoj tlapaleuijli itech on rey,
niman okilijkej:
—Ueyixtikaj rey,
¿tline ijkin titechchiuilia tejuamej motekitkauan?
16 Maski xok techmakaj sakatl,
technauatiaj ma tikchijchiuakan sa no ichkich ika miyek on xantli.
Niman hasta techmajmailiaj pampa xok tiuelij.
Pero on tlajtlakojli kipiyaj,
tejua ueyixtikaj rey,
mochanejkauan* pampa xok techmakaj sakatl.
17 Pero on rey okinnankilij:
—¡Nemejuamej san nentlatsiuij!
¡Melauak,
nentlatsiuij!
Yejua ika,
nenkijtouaj nenyaskej nenkomakaskej uentli nemoTEKO.
18 Xuiyan xtekititij,
niman maski xok mechmakaj sakatl,
sa no ichkich nenkitemakaskej on xantli.
19 On intlayekankauan on israelitas onajmankej ijkuak okinmijlijkej ika sanken* ichkich kichijchiuaskej on xantli ken achtoj kichijchiuayaj.
20 Kemaj ijkuak okiskej ixpan on rey,
okitakej Moisés niman Aarón yejuan kinchixtikatkaj.
21 Niman on israel tlayekankej okinmijlijkej:
—ToTEKO ma kita on tlen xkuajli nentechchiuaj toka tejuamej,
niman ma mechcastigaro.
Nemejuamej nemotlajtlakol ika itekitkauan on rey techtlauelitaj sanoyej.
Nochiua ken nenkitlalijtokej espada ipan iminma para ma techmiktikan.
Moisés onoteixpanuij itech toTEKO
22 Kemaj Moisés onoueyikatsajtsilij niman okijlij toTEKO: