50
Kemaj José okinapaloj imikatlalnakayo itataj niman chikauak ochokak niman okitenkuaj.
2 Kemaj okinnauatij on itepajtijkauan ma kitlalilikan ajuiyalistli ipan imikatlalnakayo itataj para maka palanis.
Niman ijki okichijkej.
3 Niman okitlalilijkej on pajtli ajuiyak ouejkau 40 tonajli pampa nonekiya nochi on tonaltin para maka palanis.
On egipcios okichokilijkej Israel 70 tonajli.
4 Ijkuak opanok on chokilistli,
José okiminnots on uejueyi tekiuajkej ipan ipalacio on rey niman okinmijlij:
—Tla nennechtlakaitaj,
xnechiknelikan.
Nopampa xnotsakan on rey niman xkijlikan
5 ika ijkuak notataj ye miktikatka,
onechchiualtij ma niktestigojtlali Dios ika nikontokas ipan on tekajli yejuan sano yejua okichijchiu ipan on tlajli Canaán.
Yejua ika,
xtlajtlanilikan ma nechkauili para nias ipan on tlajli Canaán nikontokas notataj.
Niman ijkuak yoniktokak,
ninokuepas.
6 On rey okinankilij José:
—Xuiya,
xtokati motataj ken otikprometeroj ixpan Dios.
7 Ijkon tej,
José oyaj okitato itataj.
Iuan oyajkej iuejueyitlayekankauan on rey yejuan nemiyaj ipan ipalacio niman nochimej on uejueyitlayekankej ipan on tlajli Egipto.
8 No ijki,
ifamilia Jacob,
ifamiliaj José niman ikniuan teuan oyajkej.
Ipan on tlajli Gosén,
san okinkajtejkej inkoneuan niman iminyolkauan.
9 No ijki,
oyajkej iuan José miyekej tlakamej ipan caballos niman miyekej carretas yejuan kitilanaj on caballos.
Onochijkej sanoyej miyekej yejuan oyajkej.
10 Ijkuak oajsikej kampa kiyolkixtiaj trigo ne Atad kampaka ikisayan tonaltsintli de on río Jordán,
nochimej okipixkej sen ueyi ajmantli niman ika miyek ajmantli José okichokilij itataj chikome tonajli.
11 Ijkuak on cananeos yejuan chantij ompa okitakej ika sanoyej chokayaj kampa kiyolkixtiaj trigo ne kampa itoka Atad,
okijtojkej:
“Sanoyej ueyi inajmanalis on egipcios.”
Niman yejua ika ompa okitokayotijkej Abel-mizraima.
Abel-mizraim nokaua nisiu on río Jordán para kampaka ikisayan tonaltsintli.
12 Niman itelpochuan Jacob okichijkej ipampa imintataj nochi on tlen yejua okintlajtlanilij.
13 Okuikakej Jacob ipan on tlajli Canaán niman okitokakej ipan on tekajli yejuan onkaj ipan on tlajli nisiu Macpela yejuan nokaua kampaka ikisayan tonaltsintli de Mamre.
Ompa Abraham okouilijka Efrón,
on heteo,
para ompa kitokas nochi ifamilia.
14 Kemaj,
ijkuak yokitokak itataj,
José onokuep Egipto iuan ikniuan niman nochimej on sekimej yejuan iuan oyajkaj.
José okinyoltlalij ikniuan
15 Ijkuak Jacob yomik,
ikniuan José onomojtikej niman okinojlijkej:
“Manin José notlauelkixtis niman kinekis techkuepiltis ika on tlen xkuajli otikchiuilijkej ye uejkaui.”
16 Yejua ika,
otlatitlankej ma kijlitij:
“Ijkuak motataj xe mikiya,
17 otechnauatij ijkin ma timitsijlikan:
‘Nimitstlajtlanilia xkintlapojpolui on tlen xkuajli omitschiuilijkej mokniuan pampa sanoyej omitstlajyouiltijkej.’
Yejua ika,
tejuamej timitstlajtlaniliaj xtechtlapojpolui on tlen otimitschiuilijkej.
Aman tiktekipanouaj Dios yejuan totataj okineltokak.”
Chika José kaktikatka on tlen okititlanilijkej ikniuan,
yejua sanoyej chokaya.
18 Kemaj oyejkotetskej ikniuan,
niman onotlakuantelketskej niman onopachojkej hasta ipan tlaljli ixpan,
para okitlakaitakej.
Niman kemaj okilijkej:
—Nikan titechpiya para timoesclavos yeskej.
19 Pero José okinmijlij:
—Maka xmomojtikan.
Nejua xniDios para nemechcastigaros.
20 Melauak nenkinekiyaj nennechchiuiliskiaj on tlen sanoyej xkuajli,
pero Dios okuep on tlen xkuajli onennechchiuilijkej niman okichiu on tlen kuajli.
Yejua kinekiya kinmanauis inemilis miyek tlakatl,
niman on yejua yejuan aman nenkitaj nochijtikaj.
21 Yejua ika,
maka xmomojtikan.
Nemechmakas nemejuamej niman nemokoneuan on tlen nenkuaskej.
Niman José okinminots ikan teiknelilistli* niman ijki okinyoltlalij.
Imikilis José
22 José iuan nochi ifamilia itataj sanken* ochantikej Egipto.
José onen 110 xipan.
23 Yejua nemiya hasta okintak on ika okpa ixuiuan Efraín.
No ijki,
onen hasta ijkuak Maquir,
ikoneu Manasés,
okimpix ikoneuan.
Yejua okinselij para onochijkej teuanmej ipan ifamilia ken yejua ikoneuan yeskiaj.
24 Se tonajli José okinmijlij ikniuan:
“Sa nechpoloua achijtsin para nimikis,
pero sakin*,
Dios uajlas,
mechpaleuis niman mechkixtis nikan para mechuikas ipan on tlajli yejuan okitlajtolmakak Abraham,
Isaac niman Jacob ika kinmakas.”
25 Yejua ika,
José okinminots ikniuan yejuan no katkaj itelpochuan Israel ken yejua.
Niman okinchiualtij ma kitestigojtlalikan Dios ika kiktiskej iomiyouan ipan on tonajli ijkuak kisaskej Egipto.
Okimijlij:
“Ijkuak Dios uajlas niman mechuikas oksejpa ipan on tlajli Canaán,
noneki nenkiktiskej noomiyouan.”
26 José omik ipan on tlajli Egipto ijkuak kipiyaya 110 xipan,
niman imikatlalnakayo okipajtijkej ikan pajtli ajuiyak para maka palanis.
Niman imikatlalnakayo okitlalijkej ipan sen mikacaja.