Jacob kintiochiua ikoneuan
49
Jacob okinnots itelpochuan niman okinmijlij:
“Xnechajnisiuikan,
niman nemechijlis on tlen sakin* nemopan nochiuas.
2 ’Nokoneuan,
xnechajnisiuikan niman xnechkakikan,
nejua yejuan nemotataj Israel.
3 ’Tejua Rubén,
tinoyenkuiyokoneu.
Mopan onkaj nochikaualis.
Tejua tinoachtokoneu.
Motech nesi nochi nochikaualis.
Tejua tiyatkatstikaj ika tetlakaitalistli niman ika poder.
4 Pero tejua xok takatstias,
pampa tejua xakaj ueli mitsteltia ken on atl yejuan sanoyej kojtitiu.
Ijkon onochiu pampa otinechpijpinajtij
ijkuak otimotekak ipan notlapech iuan notlakpasiuau.
5 ’Simeón niman Leví melauak neniknijtin
pampa sa no ijki nemouikaj.
Nemoespadas nenkitekitiltiaj para guerra.
6 ¡Xkaman nikneki nikakis nemotlajtol,
nion xkaman ninosentlalis nemouan!
Ijkuak nenkualaniyaj nentemiktiayaj,
niman san onenkinekej onenkinkotstlaluayotekej on toros.
7 ¡Ma kiseli tlauelijli nemokualankayo,
pampa nemokualankayo sanoyej xkuajli!
¡Nejua nemechchajchayauas nochiuiyan ipan nochi in tlajli Israel!
8 ’Judá,
mokniuan mitsueyiteneuaskej.
Niman tikinmajsis motlauelikniuan iminkechtlan niman tikintlanis.
Hasta mokniuan notlakuantelketsaskej para mitstlakaitaskej.
9 Tejua Judá nokoneu,
tikojtik ken ikoneu sen león yejuan yokikuaj sen yolki
niman nokuepa ichan ikan paktli.
Timochiuas ken sen ueyi león yejuan nopachoua
niman noteka ipan tlajli,
para kipijpiya on tlen kineki kajsis.
Niman xakaj tlakatl kinekis kipajsolos.
10 Xakaj uelis kuilis on tekiuajyotl yejuan kipiya ipan ima
hasta ijkuak yejkos on yejuan iyaxka* on tekiuajyotl,
niman nochimej on tlakamej
ipan nochi naciones kitlakamatiskej.
11 Timochiuas sanoyej rico.
On uvasyoj sanoyej miyek tikpiyas
hasta uelis ompa tiksalos mopoloko* niman xkitlamis.
Tikpiyas miyek vino
hasta tiuelis ika tikpakas motlaken on iyayo uvas.
12 Mixtololojuan más chichiliuiskej xken on vino
pampa tikonis miyek vino,
niman motlanuan más istayaskej xken on leche
pampa tikonis miyek leche.
13 ’Zabulón,
tejua tinemis itenko on mar,
niman ompa ajsis miyek barco.
Motlal ajsis hasta on tlajli Sidón.
14 ’Isacar,
tejua timochiuas ken itlaj yolki yejuan ueli kimama itlaj yetik,
pero xkimama,
yej noseuiya kampa kintsakuaj yolkej.
15 “Ijkuak tikitas ika mopaís sanoyej kuajli niman kualtsin para se ipan noseuis,
tikmokauilis mitstekitiltiskej oksekimej ken sen esclavo.
16 ’Dan,
tikinyekanas mouejkakoneuan
no ijki ken on oksekimej ikoneuan Israel kinyekanaj iminuejkakoneuan.
17 Tejua timochiuas ken sen kouatl yejuan nemi ipan ojtli,
niman kinkotstlankechia on caballos
niman kinuajtlajkali on yejuan yetiuij ipan on caballos.
18 ’¡NoTEKO,
nikcha para tinechmanauis!
19 ’Gad,
miyekej soldados uajlaskej niman mitsuijsokiskej,
pero sakin* tikintotokas.
20 ’Aser,
motlal kitlakitis tlakuajli yejuan sanoyej uelik.
Melauak,
temakaskej tlakuajli yejuan uelik ken on yejuan kikuaj reyes.
21 ’Neftalí,
tejua timochiuas ken sen masatl yejuan xtsakutikaj,
niman yejuan kintlakatilia kualtetsitsimej masakokonej.
22 ’José,
tejua timochiuas ken sen kuajli kojtli*
yejuan toktok kampa ameya.
Temaka miyek itlakyo niman imakojyouan noskaltiaj sanoyej
hasta tlejkoua ipan on tepantli yejuan tlakpak niman tilauak.
23 On tlakamej yejuan kipiyaj iminarcos
mitstlauelitaskej niman mitsmojmotlaskej ikan imintlaminaluan.
Nochipa mitspajsoloskej.
24 Pero tejua tikteketsas moarco melajki,
niman xkuekuetlakaskej momauan ijkuak tikintekitiltis
pampa nochiuaskej kojtikej.
Melauak,
titetlanis pampa Dios Yejuan Nochi Ueli mitspaleuis.
Yejua mitscuidaros pampa yejua inkatlajpixki on israelitas.
Yejua itemanauijkau on israelitas.
25 Melauak,
mitspaleuis iDios motataj.
Ma mitstiochiua tejua niman mouejkakoneuan on Dios Yejuan Nochi Ueli Kichiua.
Ma kintiochiua mouejkaoneuan ika miyek kiautli
yejuan uajlas de tlakpak ipan cielo*,
niman atl yejuan uajlas de uejkatlan ipan mar.
Ma mitsmaka miyek mokoneuan yejuan noskaltiskej kuajli,
niman ma nomiyekilikan moyolkauan.
26 Nejua yejuan nimotataj,
nimitstiochiuas más xken notajuan onechtiochijkej.
Hasta kampa tlamis on tepemej yejuan onyaskej nochipa,
in tlatiochiualistin iyaxka yes José
yejuan Dios okitlapejpenij intech ikniuan.
27 ’Benjamín,
tejua titetlanis ken sen tepeitskuintli tekuani.
Ijkuak kualkan tikuas on tlen tikmiktis,
niman ijkuak tlapoyajkan tiktemakas on tlakuajli yejuan tikixuikauas.”
28 In yejua on majtlaktli uan ome itelpochuan Israel niman on tlatiochiualistli yejuan imintataj okinmakak.
Okimijlij ken kintocaroua cada se kiselis ijkon ken toDios okimachistij.
Jacob omik niman okitokakej
29 No ijki,
Jacob okinmakak itelpochuan in tlanauatijli:
“Sa achijtsin poliui para nimikis.
Xnechtokakan iuan noachtojtajuan ipan on tekajli yejuan onkaj ipan itlal Efrón on heteo.
30 On tekajli onkaj ipan on campo nisiu Macpela kampaka ikisayan tonaltsintli ipan Canaán.
Abraham okouilijka Efrón on tekajli iuan on campo para ompa ma kintokakan nochi ifamilia.
31 Ompa okitokakej Abraham iuan Sara on isiuau,
niman Isaac iuan Rebeca on isiuau,
niman no ompa oniktokak Lea.
32 On tlajli niman on tekajli okinkouilij on heteos.”
33 Ijkuak Jacob otlan kinnajnauatia itelpochuan,
oksejpa onotekak ipan itlapech niman omik.