Jacob okintiochiu Efraín niman Manasés ixuiuan
48
Sakin,
ijkuak yopanoka keski tonajli,
okilijkej José ika itataj kualo.
Yejua ika,
José oyaj okitato,
niman okuikak on ome ikoneu,
Manasés niman Efraín.
2 Niman ijkuak okimachistijkej Jacob ika José,
ikoneu,
ompa yoajsik para okitato,
okichiu kanika para onotlalij ipan itlapech.
3 Niman okijlij José:
—ToDios yejuan nochi ueli kichiua onechnotitij kampa ninemiya nisiu on ueyikalpan itoka Luz ipan on tlajli Canaán niman onechtiochiu
4 ika in tlajtoltin:
“Xkita,
nejua nikchiuas para sanoyej ma miyekiyakan mokoneuan niman mouejkakoneuan hasta nochiuaskej sanoyej miyekej naciones.”
No ijki,
onechijli ika nouejkakoneuan kinmakas in tlajli niman nochiuas inyaxka para nochipa.
5 Yejua ika,
aman niman sakin* in ome mokoneu,
Efraín niman Manasés,
yejuan otlakatkej nikan ipan in país Egipto ijkuak xe nejkoya,
nochiuaskej ken nokoneuan para kiseliskej tlajli ne Canaán sa no ijki ken Rubén niman Simeón kiseliskej.
6 Pero on mokoneuan yejuan tlakatiskej sakin* nochiuaskej moyaxkauan* tejua.
Niman yejuamej kiseliskej iminherencia yejuan kintocaros ipan on tlajli yejuan yes inyaxka Efraín niman Manasés.
7 Ijkuak ninokuepaya de Padan-aram,
omik monanaj Raquel ipan on tlajli Canaán ijkuak tiuajlayaj ipan ojtli,
niman sa achijtsin poliuiya para tajsiskiaj ipan on kalpan Efrata.
Niman oniktokak ompa itenko on ojtli de on kalpan Efrata yejuan aman itoka Belén.
8 Kemaj,
ijkuak Israel okintak ikoneuan José,
okijtoj:
—¿Yejuamej in akinnomej?
9 Niman yejua okijlij:
—In nokoneuan yejuan Dios onechmakak nikan Egipto.
Niman itataj okijlij:
—Aman xnechinuajnisiuilti para nikintiochiuas.
10 Israel sanoyej ye ueuentsitsin katka niman xok kuajli tlachaya.
Niman José okinnisiuiltij itlakakoneuan itech itataj,
niman Jacob okintenkuaj niman okinnapaloj.
11 Kemaj Jacob okijlij José:
—Xok nikchaya para oksejpa nimitsitas,
pero Dios onechkauilij no ma nikinta mokoneuan.
12 Kemaj José okinmejkuanij ikoneuan yejuan yejyeuatikatkaj ipan ikxiuan itataj.
Kemaj onotlakuantelkets niman onopachoj hasta ipan tlajli ikan ueyi tetlakaitalistli ixpan itataj.
13 Kemaj José okinuikak on omemej ikoneuan.
Efraín okuikak ikan iyekma,
niman Manasés okuikak ikan iopochma.
Niman kemaj más okinnisiuiltij itech Israel on itataj.
Yejua ika tej,
Efrain onokau iopochmakopa Israel,
niman Manasés onokau iyekmakopa.
14 Pero ijkuak Israel okinkuamatokak,
onomanepanoj niman okitlalij iyekma ipan itsontekon Efraín maski yejua katka más piten.
Niman okitlalij iopoch ipan itsontekon Manasés maski yejua katka yenkuiyotl.
15 Yejua ika,
Israel ijkin okitiochiu José:
“Dios yejuan okitekipanokej notajuan Abraham niman Isaac,
niman nechajyekana ipan nonemilis desde ijkuak onitlakat,
16 niman okuajtitlan iángel yejuan nechajmanauijtiu de nochi on tlen xkuajli,
yejua ma kintiochiua in telpokakokonej.
Niman nochimej tlakamej ma kimatikan ika yejuamej noyaxkauan,
niman iyaxkauan* notajuan Abraham niman Isaac.
Ma kimpiyakan miyekej inkoneuan
niman ma nomiyekilikan iminuejkakoneuan ipan in tlaltikpaktli.”
17 Pero José okitak xkuajli ika itataj okitlalij iyekma ipan itsontekon Efraín.
Yejua ika,
okitskilij ima para okejkuanilij niman okitlalij ipan itsontekon Manasés.
18 Niman okijlij:
—¡Ka notataj!
In yejua yenkuiyotl.
Xtlali moyekma ipan itsontekon.
19 Pero itataj xokinek okichiu,
niman okijlij:
—Nejua ye nikmatztikaj nokoneu.
No ijki,
iuejkakoneuan nochiuaskej sanoyej miyek tlakatl yejuan nochimej kintlakaitaskej.
Pero ikniu piten nochiuas más ueyixtias xken yejua,
niman iuejkakoneuan ikniu más nomiyekiliskej,
niman nochiuaskej miyekej naciones.
20 Yejua ika,
ipan on tonajli,
Jacob okintiochiu Efraín niman Manasés niman okinmijlij:
—Nochimej on israelitas kitekitiltiskej nemotoka para tlatiochiuaskej niman kijtoskej:
“Dios ma mitstiochiua ueyi ken okichiu iuan Efraín niman Manasés.”
Ijkon Israel okitlalij para Efraín más ueyixtias xken Manasés.
21 Kemaj Israel okijlij José,
on itelpoch:
—Xkita,
ye ajsitikaj* on tonajli ika nimikis,
pero Dios nemis nemouan niman kichiuas para oksejpa nemokuepaskej ipan imintlal moachtojtajuan.
22 Tejua nimitsmaka on tlajli yejuan más kuajli xken on yejuan onikinmakak mokniuan.
Ijkon tej,
nimitsmaka Siquem,
on tlajli yejuan onikinkuilij on amorreos ika noespada niman noarcotlaminal.