Números
On israelitas okimpojkej ne Sinaí
1
Ipan on achtoj tonajli de on ika ome metstli ijkuak ye kipiyaya ome xipan ika on israelitas okiskej Egipto,
toTEKO okinots Moisés ne xalpatlajkan Sinaí.
Okinots ipan on tabernáculo* kampa nemi Dios,
niman okijlij:
2-3 “Xkimpouakan nochimej on israelitas yejuan ye kipiyaj sempoajli xipan para tlakpak yejuan uelis yaskej ken soldados ipan on guerra.
Xkijkuilokan itoka cada se,
niman itoka itataj,
niman itoka iclan*.
Xkimpouakan keskimej nemij,
niman Aarón ma mechpaleui.
4 No ijki,
mechpaleuis sen tlayekanki de cada tribu* yejuan kisas itech Israel,
yejuan no tlayekanki itech sen clan.”
5-15 Nikan onkaj imintoka on tribus niman imintoka intlayekankauan on tribus:
| Tribu | Tlayekanketl |
| Rubén | Elisur, itelpoch Sedeur |
| Simeón | Selumiel, itelpoch Zurisadai |
| Judá | Naasón, itelpoch Aminadab |
| Isacar | Natanael, itelpoch Zuar |
| Zabulón | Eliab, itelpoch Helón |
| Efraín, | itelpoch José Elisama, itelpoch amiud |
| Manasés, | itelpoch José Gamaliel, itelpoch Pedasur |
| Benjamín | Abidán, itelpoch Gedeoni |
| Dan | Ahiézar, itelpoch Amisadai |
| Azer | Pagiel, itelpoch Ocrán |
| Gad | Eliasaf, itelpoch Reuel |
| Neftalí | Ahira, itelpoch Enán |
16 In yejuamej katkaj on tlayekankej intech on tribus yejuan kisaj itech Israel niman yejuan okintlapejpenijkej itech cada clan.
17 Moisés iuan Aarón iminuan in tlayekankej,
18 okiminnotskej nochimej on israelitas para ma nosentlalikan ipan on achtoj tonajli kampa ika ome metstli.
Kemaj okimpojkej niman okimijkuilojkej imintoka nochimej on israelitas yejuan tlakamej de sempoajli xipan para tlakpak.
Cada se okijkuilojkej akinon tlayekanki ipan iclan* niman akinon tajtli ipan cada familia.
19 Moisés okimpou on israelitas ipan on xalpatlajkan Sinaí ijkon ken toTEKO okinauatij.
20-43 Moisés,
Aarón niman on majtlaktli uan ome tlayekankej otlankej kinmijkuilouaj intoka nochimej on israelitas.
Cada se okijkuilojkej itech tlen tribu* ualeua,
akinon tleyekanki ipan iclan,
niman akinon tajtli ipan cada familia.
Ichkich in okimpojkej yejuan kipiyayaj sempoajli xipan para tlakpak yejuan ueliskej yaskej ken soldados ipan guerra:
| Tribus | Tlapouajlotl |
| Rubén, iyenkuiyou Israel | 46,500 |
| Simeón | 59,300 |
| Gad | 45,650 |
| Judá | 74,600 |
| Isacar | 54,400 |
| Zabulón | 57,400 |
| Efraín, itelpoch José | 40,500 |
| Manasés, itelpoch José | 32,200 |
| Benjamín | 35,400 |
| Dan | 62,700 |
| Azer | 41,500 |
| Neftal | 53,400 |
44 In yejua ichkich okis de on tlapouajli yejuan okichijkej Moisés,
Aarón niman se tlayekanki itech cada tribu* yejuan no tlayekanki itech iclan.
45 Nochimej on israelitas yejuan yokajxitijkaj sempoajli xipan para tlakpak yejuan ueliskej yaskej ken soldados ipan guerra,
46 katkaj 603 mil 550.
On Levitas xokimpojkej
47 On levitas xokimpojkej iminuan on oksekimej israelitas,
48 pampa toTEKO ijkin okinauatij Moisés:
49 “Ijkuak tikimpouas on israelitas,
maka tikimpouas iuejkakoneuan Leví.
50 On levitas xkinmaka tekitl ipan tabernáculo* kampa onkaj on yekcaja,
niman nochi on tlajtlamach* yejuan ompa notekitiltia ipan on tabernáculo.
Ijkuak nenyaskej oksekan,
on levitas yejuamej intekiu yes para kiktiskej notabernáculo niman nochi on tlajtlamach* yejuan ijtik notekitiltia.
Niman on levitas kitelketsaskej iminkajkal iyeualkan on tabernáculo.
51 Niman ijkuak kiktiskej on tabernáculo,
yejuamej kixoxotoniskej.
Niman ijkuak nemajsiskej oksekan,
oksejpa yejuamej kisasaloskej on tabernáculo* ken onkatka.
Pero tla yakaj yejuan xlevita kinisiuis on tabernáculo* kampa ninemi,
ika onkaj kimiktiskej.
52 Nochimej on oksekimej israelitas nochachantiskej ken soldados cada se ipan icampamento,
niman ika ibandera.
53 On levitas kitelketsaskej iminkajkal iyeualkan on tabernáculo* kampa onkaj on yekcaja yejuan kipiya on pacto*.
Yejuamej kitlajpiyaskej on tabernáculo* para maka san akinon kalakis niman nikualanis intechkopa on israelitas.”
54 On israelitas okichijkej nochi ken toTEKO okinauatij Moisés.