Nochi tlen noteyaxkatia itech Dios uelis notlaxtlauas para nomanauis
27
ToTEKO okijlij Moisés:
2 “Ijkin xkinmijli on israelitas:
‘Ijkuak yakaj kinekis kitlaxtlauas ipampa yajkaj yejuan onoteyaxkatij itech toTEKO,
para kimanauis ijkin nonekis kitlaxtlauas:
3 Para sen tlakatl yejuan kipiya 20 xipan hasta 60 xipan,
kitlaxtlauas 50 tepostomin de plata ijkon ken kitlajtlanij ipan on tabernáculo.
4 Niman para sen siuatl,
kitlaxtlauas 30 tepostomin de plata.
5 Para yejuan kipiyaj makuijli xipan hasta sempoajli xipan,
kitlaxtlauaskej sempoajli tepostomin de plata tla tlakatl,
noso majtlaltli tepostomin de plata tla siuatl.
6 Para kokonej yejuan kipiyaj se metstli hasta makuijli xipan,
kitlaxtlauaskej majkuijli tepostomin de plata tla tlakakonetl,
noso yeyi tepostomin de plata tla siuakonetl.
7 Para on yejuan kipiyaj 60 xipan para tlakpak,
kitlaxtlauaskej kaxtojli* tepostomin de plata tla tlakatl,
noso matlaktli tepostomin de plata tla siuatl.
8 Niman tla sen tlakatl sanoyej mayanki niman xuelis kitlaxtlauas on tomin ken yoniktlalij,
tla ijkon,
noneki konijliskej on tiopixki.
Niman on tiopixki kixtlalos kech tepostomin de plata uelis kitlaxtlauas on mayanki yejuan okichiu on promesa ixpan Dios.
9 ’Tla sen yolki yejuan kuajli para kitemakaskej notech nejua nemoTEKO yejuan onechprometerouilijkej,
on yolki ikatlakajtli nokauas noyaxka.
10 On yolki xuelis kipatlaskej iuan okse yolki maski yejuan más kuajli noso xmás kuajli.
Tla saman kipatlaskiaj,
tla ijkon,
on omemej yolkej nokauaskej ikatlakatli noyaxkauan.
11 ’Pero tla yakaj kineki kiuentlalis sen yolki yejuan xchipauak nixpan nejua nemoTEKO,
tla ijkon,
on yolki kuikaskej itech on tiopixki,
12 para on tiopixki kixtlalos kech notlaxtlauas ijkuak yokitak kenemej on yolki.
Kemaj on tiopixki kijtos kech kitlaxtlauaskej,
niman ichkich yes.
13 Pero tla sakin* kinekis oksejpa kitilanas on yolki,
kitlaxtlauas on kech kixtlalos on tiopixki niman kitemakas okse 20 por ciento más,
para ijkon,
on yolki oksejpa iyaxka* yes.
14 ’Tla yakaj nechyaxkatis ichan para nejua nemoTEKO,
on tiopixki kixtlalos on kajli para kijtos kech ika patioj,
niman ken kijtos on tiopixki ichkich yes.
15 Pero tla on yejuan onechyaxkatij ikal oksejpa kinekis kipiyas on kajli para iyaxka* yes,
noneki kitlaxtlauas kech okijtoj on tiopixki niman kitemakas 20 por ciento más.
Niman ijkon,
on kajli oksejpa iyaxka* yes.
16 ’Niman tla yakaj nechyaxkatis seki itlal yejuan okiselij de itajuan,
tla ijkon,
on tiopixki noneki kitas kech ika ueyi on tlajli niman kixitilis kech kitlakitis on tlen kitokaskej ipan.
San ma tikonijtokan,
tla ipan on tlajli kalakis 220 litros iyoltsin cebada,
tla ijkon,
noneki kitlaxtlauas 50 tepostomin de plata.
17 Niman tla sen tlakatl nechyaxkatis itlal ijkuak peua on xipan de tlamakaualistli,
tla ijkon,
sano ichkich kitlaxtlauas para kouas oksejpa on tlajli.
18 Pero tla nechyaxkatis on tlajli ijkuak yopanok on xipan de tlamakaualistli,
tla ijkon,
on tiopixki kixtlalos on tlajli para kijtos kech ika patioj,
niman on tlakatl noneki kitlaxtlauas sa on keski xipan poliui ijkuak oksejpa ajsis on xipan de tlamakaualistli.
19 ’Niman tla on tlakatl yejuan onechyaxkatij itlal oksejpa kinekis kipiyas on tlajli para iyaxka* yes,
tla ijkon,
noneki kitlaxtlauas on kech kixtlalos on tiopixki niman okse 20 por ciento más.
Niman ijkon,
on tlajli oksejpa iyaxka* yes.
20 Pero tla xkouas para oksejpa iyaxka* yes,
niman yej kinamakiltiskej yakaj okse,
tla ijkon,
xokaman uelis iyaxka* yes.
21 Ijkuak ajsis on xipan de tlamakaualistli,
on tlajli nechyaxkatiskej nejua nemoTEKO para yeika,
niman inyaxka yes on tiopixkej.
22 ’Tla yakaj nechyaxkatia,
nejua nemoTEKO,
sen tlajli yejuan san okou yejuan xokiselij itech ifamilia,
23 tla ijkon,
on tiopixki kixtlalos iuan on tlakatl kech ika patioj on tlajli hasta ijkuak ajsis on xipan de tlamakaualistli.
Niman on tlakatl kitlaxtlauas ipan on tonajli ijkuak kijtoskej kech ika patioj on tlajli niman on tomin noyaxka* yes,
nejua nemoTEKO.
24 Pero ijkuak ajsis on xipan de tlamakaualistli,
on tlajli oksejpa iyaxka* yes on tlakatl yejuan más achtoj iyaxka* katka yejuan okinamakaka,
noso nokauas intech iuejkakoneuan.
25 ’Nochi on tlajtlamach* yejuan nenkitlaliliskej kech notlaxtlauas,
noneki nenkixitaskej ikan tepostomin yejuan yejtik majtlaktli gramos cada se,
ijkon ken kitlajtlanij ipan on tabernáculo.
On yenkuiyomej niman on tlajtlamach* yejuan teyaxka* itech toTEKO
26 ’Xakaj uelis nechinmaxkatis on yolkej yejuan achtoj tlakatij,
pampa on ye noyaxkauan,
ken on uakaxtin niman borregos.
Yejua ika,
maka oksejpa nennechyaxkatiskej nejua nemoTEKO.
27 Pero tla nenkinekij nennechyaxkatiskej sen yolki yejuan achtoj tlakati pero on yolki xchipauak nixpan,
iteko on yolki uelis kitlaxtlauas ken kixtlalos on tiopixki para kech yes.
Niman noneki kitlaxtlauas okse 20 por ciento más.
Pero tla iteko on yolki xkineki kouas,
tla ijkon,
on tiopixki kinamakiltis san akinon ken yejua kixtlalos kech yes.
28 ’Pero tla yakaj kiyaxkatia* toTEKO seki on tlen kipiya,
kenon yakaj tlakatl,
nose sen yolki,
noso sen tlajli yejuan kiselia itech ifamilia,
niman nechyaxkatia para nochipa,
xok yakaj uelis kinamakiltiskej nion kouaskej oksejpa,
pampa yejua on nochi noyaxka* para yeika niman sanoyej tlatiochijtli para nejua nemoTEKO.
29 Tla sen tlakatl yokitlajtlakolmakakej para mikis,
xakaj uelis kitlaxtlauas ipampa yejua.
Yej,
ika onkaj mikis.
30 ’On diezmo* de nochi on tlen tlaki ipan nemotlatok,
nochi iyol noso iteyo on tlatoktli,
noso itlakyo on kojtin,
noyaxka* niman tlakauijli para nejua nemoTEKO,
niman tlatiochijtli para nejua.
31 Tla yakaj kinekis oksejpa kikuis on diezmo* yejuan onechmakak,
noneki kitlaxtlauas on kech kitocaroua niman okse 20 por ciento más.
32 ’De cada majtlaktli yolki noneki se nenkixtiskej para nennechyaxkatiskej nejua nemoTEKO.
33 Maka yakaj kitlapejpenis sen yolki yejuan más kuajli noso yejuan xkuajli nion maka se kipatlas.
Pero tla saman se kipatlas,
tla ijkon,
on yolki yejuan yonechyaxkatijka niman on yejuan ika kipatlas,
nokauaskej tlatiochijtin niman ijkon xok uelis oksejpa kinkouas.”
34 In yejua tlanauatiltin yejuan toTEKO okimakak Moisés ipan on tepetl Sinaí para ma kimijli on israelitas.